Mɛn’n i awieliɛ blɛ nga nun’n maan e fa e wla’n gua Zoova su
“Amun fa amun wla gua Anannganman su tititi.”—EZA. 26:4.
1. ?Ngbaciɛ benin yɛ ɔ o Ɲanmiɛn i sufuɛ nin mɛn nunfuɛ’m be afiɛn ɔn?
MƐN nga nun’n, sran akpinngbin kpanngban kpa be wunman sran annzɛ like ng’ɔ fata kɛ be lafi su ɔ. Atrɛkpa’n, lakalɛ mɔ b’a laka be kpɛ sunman’n ti ɔ. Zoova i sufuɛ’m be liɛ’n ɔ timan sɔ mlɔnmlɔn! Kɛ mɔ ngwlɛlɛ m’ɔ fin Ɲanmiɛn’n i su yɛ be nanti’n ti’n, be si kɛ ɔ nin i fataman kɛ be fa be wla guɛ i mɛn nun ninnge nin “sran dandan’m” be su. (Jue. 146:3) Sanngɛ be fa be nguan’n ɔ nin be ɲrun lɔ sa’m be wlɛ i Zoova sa nun. Afin be si kɛ ɔ klo be yɛ i Ndɛ’n kpɛn su titi.—Rɔm. 3:4; 8:38, 39.
2. ?Wafa sɛ yɛ Zozie kleli kɛ be kwla fa be wla gua Ɲanmiɛn su ɔ?
2 Laa’n, Zozie kleli kɛ be kwla fa be wla gua Ɲanmiɛn su. Kɛ i wie cɛn’n mantannin koko’n, ɔ seli i wiengu Izraɛlifuɛ’m be kɛ: “Amun bɔbɔ amun si jrɛiin kɛ kasiɛ nga Anannganman b’ɔ ti amun Nyanmiɛn’n boli amun’n, i wie fi nun-man lɛ b’ɔ kali ngbɛn-ɔn. Be kwlaa be nuan yiali, wie fi a ka-man.”—Zoz. 23:14.
3. ?Ngue yɛ Ɲanmiɛn i dunman’n yi i nglo i bɔbɔ i su ɔ?
3 Zoova yo maan i kasiɛ’m be kpɛn su. Nán klolɛ m’ɔ klo i sufuɛ mun’n i ngunmin ti yɛ ɔ yo sɔ ɔ. Sanngɛ like bɔbɔ ba nga ti yɛ ɔ yo sɔ’n yɛle i dunman’n. Dunman sɔ’n i bo’n yɛle “sran’n i wafa nga n kunndɛ kɛ ń káci’n, yɛ ń káci ɔ.” (Tul. 3:14, NW; 1 Sam. 12:22) Joseph Rotherham i Biblu’n (The Emphasized Bible) i su fitilɛ nun’n, ɔ seli kɛ Ɲanmiɛn i dunman’n i bo’n yɛle kɛ Ɲanmiɛn kwla kaci sran’n i wafa ng’ɔ nin i fata’n naan like nga i waan ɔ́ yó’n w’a kpɛn su. Kɛ e ti i dunman’n, e wla kpɛn su kɛ ɔ yo ndɛ kwlaa ng’ɔ kan’n i nuan sa. Blɛ kwlaa nun’n, ɔ nin lika kwlaa ng’ɔ wo’n, ɔ kwla yo like ng’ɔ nin i fata kɛ ɔ yo’n. Ɔ leman like kun sa m’ɔ kwlɛmɛn i yo ɔ. Sa kwlaa nga Ɲanmiɛn waan ɔ́ yó’n, saan ɔ́ níɛn i dunman’n su yɛ ɔ́ yó ɔ.
4. (a) ?Ngue yɛ Ezai 26:4 wla e fanngan kɛ e yo ɔ? (b) ?Ngue yɛ é wá kɛ́n i ndɛ like suanlɛ nga nun ɔn?
4 Maan e usa e wun kɛ: ‘?N si Zoova kpa ti maan n kwla fa min wla’n kwlaa n guɛ i su? ?N si kɛ Ɲanmiɛn i sa o like kwlaa su ɔ maan n lafi su kɛ min ɲrun lɔ sa’m bé yó ye mán min?’ Ezai 26:4 se kɛ: “Amun fa amun wla gua Anannganman su tititi. Afin ɔ ti kɛ yɛbuɛ sa, i yɛ be talo i ɔ, ɔ o lɛ anannganman anannganman.” E si kɛ e blɛ liɛ nga su’n Ɲanmiɛn yoman abonuan sa kɛ nga ɔ fa yoli i laa’n sa kun. Kɛ m’ɔ ti kɛ “yɛbuɛ sa,” m’ɔ ‘o lɛ anannganman’n’ ti’n, e kwla fa e wla e guɛ i su “tititi.” ?Wafa sɛ yɛ e Ɲanmiɛn mɔ e kwla fa e wla e guɛ i su’n ɔ suɛn i sufuɛ nanwlɛfuɛ’m be bo andɛ ɔ? Maan e nian like nsan m’ɔ yo fa suan e bo’n. Kɛ e srɛ i kɛ ɔ uka e naan y’a jran lakalɛ’n i ɲrun kekle’n, ɔ wla e fanngan. Kɛ sran’m be sɔman e nun mɔ be tanndan e ɲrun’n, ɔ suan e bo. Kpɛkun kɛ ngokɔɛ o e su’n, ɔ man e wunmiɛn. Kɛ é kán like nsan sɔ’m be ndɛ é kɔ́’n, maan e bu wafa nga e kwla yo naan y’a fa e wla’n y’a gua Zoova su kpa’n i akunndan.
Kɛ sa tɛ yolɛ’n ba e klun’n
5. ?Ngue nun yɛ Ɲanmiɛn sulafilɛ’n kwla yo kekle man e ɔ?
5 E lafi su kɛ kasiɛ nga Zoova boli i kɛ ɔ́ mán e mɛn klanman kun naan ɔ́ cɛ́n sran mun’n ɔ́ kpɛ́n su. I kpa bɔbɔ’n ɔ ka e ngunmin nn w’a yo sɔ. Sanngɛ Ɲanmiɛn i sulafilɛ’n kwla yo kekle man e like kun nun. Like sɔ’n yɛle e nzuɛn’n i su mmla ng’ɔ man e’n be su nantilɛ’n. Asa ekun’n, kɛ ɔ yo naan e bu i kɛ ɔ nin i fata kɛ e fɛ i mmla’m be su naan sɛ e yo sɔ’n é dí aklunjuɛ’n, ɔ kwla yo kekle man e wie. Famiɛn Salomɔn mannin afɔtuɛ yɛ’n. I waan: “Nán lafi ɔ bɔbɔ wɔ akunndan liɛ’n su. Anannganman i su yɛ lafi-ɔ. Sɛ á fín ase o á jáo o, Anannganman i dunman, yɛ bo-ɔ. Sɛ a bo i dunman’n, ɔ́ bó ɔ nyrun atin’n.” (Nya. 3:5, 6) Maan e sie i nzɔliɛ kɛ i waan ‘sɛ é fín ase o sɛ é jáo o,’ kpɛkun ɔ kannin e “nyrun atin’n” i ndɛ wie. Nanwlɛ, nán like nga e Klistfuɛ mun e wla o su’n ngunmin yɛ ɔ fata kɛ ɔ kle kɛ e lafi Ɲanmiɛn su ɔ. Sanngɛ ɔ fata kɛ e yi i nglo kɛ e lafi i su like kwlaa nga é yó’n nun. ?Kɛ sa tɛ yolɛ’n ba e klun’n, wafa sɛ yɛ e kwla kle kɛ e lafi Ɲanmiɛn su ɔ?
6. ?Wafa sɛ yɛ e kwla jran kpa naan y’a kpalo akunndan tɛ’n niɔn?
6 Sa tɛ’n i kpalolɛ’n bo i bo e akunndan’n nun lɔ. (An kanngan Rɔmfuɛ Mun 8:5 ɔ nin Efɛzfuɛ Mun 2:3 nun.) ?Sɛ ɔ ti sɔ’n, wafa sɛ yɛ e kwla jran kpa naan y’a kpalo akunndan tɛ’n niɔn? Ajalɛ nnun yɛ be o yɛ: 1. Maan e srɛ Ɲanmiɛn kɛ ɔ uka e. (Mat. 6:9, 13) 2. Biblu’n nun sran nga be fali Zoova i ndɛ’n su ɔ nin be nga b’a faman su’n, maan e bu be su akunndan. Kpɛkun maan e nian wafa nga i bo’n guali mannin be’n.a (1 Kor. 10:8-11) 3. Sɛ e yo sa tɛ’n, wafa nga e bɔbɔ nin be nga be klo e’n e akunndan’n ɔ́ sánngan’n, maan e bu i akunndan. 4. Kɛ Ɲanmiɛn i sufuɛ kun yo sa tɛ kpa kun’n wafa nga Ɲanmiɛn wun fa yo i’n, maan e bu i akunndan. (An kanngan Jue Mun 78:40, 41 nun.) 5. Maan ɔ yo nzra nun o, annzɛ nvialiɛ nun o, kɛ Zoova i sufuɛ kun kpalo sa tɛ’n m’ɔ yo sa ng’ɔ ti kpa’n, wafa nga Zoova i klun jɔ’n, maan e bu i akunndan e nian. (Jue. 15:1, 2; Nya. 27:11) E kusu e kwla kle kɛ e fa e wla gua Zoova su.
Kɛ sran’m be sɔman e nun mɔ be tanndan e ɲrun’n
7. ?Sa benin mun yɛ be juli Zeremi su ɔ? ?Yɛ wafa sɛ yɛ i wun yoli i blɛ wie nun ɔn?
7 E niaan kpanngban be bo jasin fɛ’n lika nga jasin fɛ’n i bolɛ’n ti kekle lɔ’n. Ɲanmiɛn nuan ijɔfuɛ Zeremi dili Ɲanmiɛn junman i sɔ lika’n nun wie laa Zida akpasua’n su lɔ. Blɛ sɔ nun’n, nn lika’n ti sannganwa yɛ i nunnunlɛ’n nunman mmua. Kɛ mɔ Zeremi kan fɔ mɔ Ɲanmiɛn wá bú sran mun’n i ndɛ’n, cɛn kwlaa ɔ fata kɛ ɔ jran kpa naan w’a kwla lafi Ɲanmiɛn su titi. Blɛ wie nun’n, Zeremi i fluwa klɛfuɛ Bariki bɔbɔ’n seli kɛ w’a fɛ. (Zer. 45:2, 3) ?I kwlaa sɔ’n ti’n, Zeremi i sa sin bubuli i? Nanwlɛ, ɔ juli wie’n, i wla boli i wun. I ti ɔ seli kɛ: “Cɛn nga be wuli min nun’n, sɛ ɔ ti sran’n, wuun ń sé kɛ nán cɛn sɔ’n ɔ wun ye le! [...] Sɛ m’an fin-man min nin klun m’an fite-man’n, wuun i li flunman tra nyrɛnnɛn nga ń wún i yɛ nin fɛlɛ nga ń fɛ́ yɛ’n, ɔ nin nyannzuɛn nga ń wún i cɛn kwlaa sa’n.”—Zer. 20:14, 15, 18.
8, 9. ?Kɛ nga Zeremi 17:7, 8 ɔ nin Jue Mun 1:1-3 be fa kan sa’n, ngue yɛ ɔ fata kɛ e yo naan e junman’n w’a ba nvlɛ ɔ?
8 Ɔ nin i sɔ ngba’n, Zeremi w’a yaciman i junman’n i dilɛ le. Ɔ fɛli i wla’n guali Zoova su titi. I ti’n, ndɛ nga Zoova kannin m’ɔ o Zeremi 17:7, 8 nun’n, Ɲanmiɛn nuan ijɔfuɛ nanwlɛfuɛ sɔ’n, ɔ wunnin i nuan sa. Ndɛ sɔ’n se kɛ: “Sran nga i wla’n taka Anannganman’n su’n, bɔ Anannganman’n su yɛ ɔ lafi’n, i liɛ su ti ye! Ɔ ti kɛ waka wie b’ɔ jin nzue nuan’n sa, bɔ i olui’m be trɛ kɔ nzue ba’n nuan’n sa. Wia’n bó-ɔ, i ndɛ nun-man nun. I nnya’n blo-man le. Afuɛ nga nzue’n w’a tɔ-man-an, ɔ ti-mɛn i ndɛ mlɔnmlɔn. Ɔ yaci-man mma sulɛ le.”
9 Kɛ waka wie “b’ɔ jin nzue nuan’n” sa’n, sɛ é kwlá sé’n, Zeremi w’a “yaci-man mma sulɛ le.” W’a sroman klunwifuɛ nga be yo i finfin’n. Sanngɛ, ɔ nin Zoova mɔ i yɛ “nzue” m’ɔ man nguan’n i bo’n fin i’n, be nantili klanman titi. Kpɛkun ɔ fali ndɛ kwlaa ng’ɔ kan kleli i’n su. (An kanngan Jue Mun 1:1-3 nun; Zer. 20:9) Nanwlɛ, ajalɛ kpa yɛ Zeremi kleli e lɛ ɔ! I li be nga be bo jasin fɛ’n lika nga i bolɛ’n ti kekle lɔ’n, yɛ ɔ kle be ajalɛ kpa’n niɔn. Sɛ lika nga e bo jasin fɛ’n nun’n ti sɔ wie’n, maan e lafi Zoova su kpa. Afin ɔ́ úka e naan y’a kwla tra e awlɛn y’a ‘mɛnmɛn i.’—Ebr. 13:15.
10. ?Ninnge kpakpa benin yɛ e le be ɔ? ?Yɛ kosan benin yɛ ɔ fata kɛ e fa usa e wun ɔn?
10 Mɛn’n i awieliɛ blɛ nga nun’n, Zoova mannin e ninnge kpanngban kɛ ɔ́ fá úka e naan sa nga be tɔ e su’n, y’a kwla jran be ɲrun. Ninnge sɔ’m be nun kun yɛle Ɲanmiɛn Ndɛ’n i wunmuan’n mɔ le nɲɔn nga nun’n be nian nun be kaci i kɛ ɔ nin i fata’n sa aniɛn kpanngban nun’n. Ɲanmiɛn sin sran kpa nanwlɛfuɛ m’ɔ si ngwlɛlɛ’n i ja nun man e Ɲanmiɛn sulɛ nun ninnge kpanngban blɛ ng’ɔ ti i nuan su’n i su. Asa ekun’n ɔ fa e niaan kpanngban mun suan e bo e aɲia kanngan nin dandan’m be bo. ?Ninnge sɔ mɔ Ɲanmiɛn man e’n, e fa be e yo e wun sa ye kpa liɛ su? Be kwlaa nga be yo i sɔ’n “be klun jɔ́ lele trátrá su, i ti bé bó sro.” Sanngɛ, be kwlaa nga be faman ndɛ nga Ɲanmiɛn kan’n su’n, ‘nyrɛnnɛn b’ɔ́ wá tɔ́ be su’n ti bé kplín. Yɛ awlaboɛ b’ɔ́ kún be kpo’n ti, bé fɛ́fɛ́.’—Eza. 65:13, 14.
Kɛ ngokɔɛ’n o e su’n
11, 12. ?Kɛ e nian sa nga be o mɛn’n nun’n, ajalɛ benin yɛ ɔ ti kpa kɛ e fa ɔ?
11 Klɔ sran’m be su wun be ɲrun kɛ nga Ɲanmiɛn Ndɛ’n fa kan’n sa. (Mat. 24:6-8; Ngl. 12:12) Kɛ ɲrɛnnɛn’m bé úka su bé kɔ́’n, sran kpanngban be fa be wla’n guɛ i banki nin politiki anuannzɛ ɔ nin Ɲanmiɛn sulɛ wafawafa’m be su. Be fa be wla guɛ i siansi nin ninnge nga sran’m be yi be’n be su wie. Sanngɛ ninnge sɔ’m be wie fi sasaman be nanwlɛ su sa. (Zer. 17:5, 6) Zoova i sufuɛ’m be liɛ’n, be le sran kpa kun mɔ be fa be wla guɛ i su ɔ. Sran sɔ’n “ɔ ti kɛ yɛbuɛ sa, [...] ɔ o lɛ anannganman anannganman.” (Eza. 26:4) Jue tofuɛ’n seli kɛ: “[Zoova] kunngba yɛ ɔ ti kɛ min yɔbuɛ sa yɛ n talo i-ɔ. I yɛ maan n nyan min ti-ɔ. Ɔ ti min fiawlɛ sua.” (An kanngan Jue Mun 62:7-10 nun.) ?Wafa sɛ yɛ e talo sran sɔ’n m’ɔ ti kɛ yɛbuɛ sa’n niɔn?
12 Zoova i Ndɛ’n su falɛ’n yɛ ɔ kle kɛ e fa e wun e mɛntɛn i ɔ. I Ndɛ’n kusu, nán titi yɛ ɔ nin klɔ sran’m be ngwlɛlɛ’n be kɔ likawlɛ ɔ. (Jue. 73:23, 24) I wie yɛle kɛ be nga klɔ sran ngwlɛlɛ yɛ be bu’n be kwla se e kɛ: ‘Kɛ a ko wu’n nn ɔ liɛ w’a wie. Ɔ maan di mɛn kpa maan ɔ ti wɔ.’ ‘Kunndɛ junman kpa di.’ ‘Kunndɛ sika kpanngban.’ ‘To nga, to nga.’ ‘Tu ajalɛ kɔ lika fanunfanun be nun. Di fɛ.’ Sanngɛ ngwlɛlɛ m’ɔ fin Ɲanmiɛn’n i liɛ’n, like ng’ɔ kle e’n yɛle kɛ: “Be nga be fa mɛn’n nun ninnge’n yo be wun sa ye’n, nán maan be nyin blo i kunndɛlɛ su ngboko, afin mɛn ng’ɔ o yɛ’n ɔ cɛ-man.” (1 Kor. 7:31) I kunngba’n, Zezi wla e fanngan kɛ maan e fa Zoova i sulɛ’n e sie i like kwlaa ɲrun. I liɛ’n é síe e “anwlɛn su ninnge mun nyanmiɛn su lɔ.” Lɔ liɛ’n, like fi kwlá saciman be.—Mat. 6:19, 20.
13. ?Kɛ e bu 1 Zan 2:15-17 i su akunndan’n, kosan benin yɛ ɔ fata kɛ e fa usa e wun ɔn?
13 ?“Mɛn dilɛ’n,” ɔ nin “ninnge nga be o mɛn’n nun’n” be su akunndan nga e bu’n, ɔ kle kɛ e fa e wla’n kwlaa e gua Ɲanmiɛn su? (1 Zan 2:15-17) ?Aɲanbeun ninnge nga e ɲan be Ɲanmiɛn sulɛ’n nun’n, ɔ nin kɛ e ko yo naan y’a uka junman nga e di e man Ɲanmiɛn’n su’n, be ti e cinnjin tra mɛn nun ninnge mun? (Fil. 3:8) ?E mian e ɲin naan e ‘nyinma’n [w’a] yo kpa’ titi? (Mat. 6:22) I yo, Ɲanmiɛn w’a seman kɛ nán e fa ngwlɛlɛ e nanti, annzɛ nán e yo like ng’ɔ fata kɛ e yo’n. I li sɛ e le awlobo’n ɔ fata kɛ e niɛn i lika. (1 Tim. 5:8) Sanngɛ ɔ kunndɛ kpa kɛ i sufuɛ’m be fa be wla’n kwlaa guɛ i su. Ɔ kunndɛman kɛ be fa be wla’n guɛ i Satan i mɛn nga w’a wie nunnun yɛ’n su.—Ebr. 13:5.
14-16. ?Kɛ sran wie’m be ‘nyinma’n yoli kpa’ titi mɔ be fali Ɲanmiɛn sulɛ’n sieli i like kwlaa ɲrun’n, ye benin yɛ be ɲɛnnin i ɔ?
14 Maan e fa e ɲin sie i Risaa nin Riti mɔ be le ba nsan’n, be su. Risaa seli kɛ: “Ɔ yoli min kɛ n kwla uka junman nga n di m man Zoova’n su. N ɲan like kwlaa nga n sa miɛn i wun’n, sanngɛ ɔ yoli min kɛ nán like fi yɛ n fa man Ɲanmiɛn ɔn. Min nin Riti e fali ndɛ’n e wlɛli i Ɲanmiɛn sa nun srɛlɛ’n nun, yɛ e trannin ase e buli su akunndan. E nuan seli su kɛ n ko se min junman su min’n i kɛ ɔ kpɛ min junman dɔ’n su. Naan le mɔcuɛ kun nun’n, n di junman cɛn ba nnan. Sanngɛ nn sika ndɛ’n w’a jran e nvle’n nun lɔ kpa. Min min’n kplinnin su, yɛ anglo ng’ɔ́ bɛ́ i sin’n i nun’n, le mɔcuɛ kwlaa nun’n n wa dili junman cɛn ba nnan cɛ.” ?Dɔ nga su’n, wafa sɛ yɛ Risaa i wun yo i ɔ?
15 Ɔ seli kɛ: “Min akatua’n w’a kpɛli su kpa. Sanngɛ siɛn’n afuɛ nuan kun nun’n, n le cɛn ba lele 50 e nin min awlobofuɛ mun e tran. Kpɛkun n fa cɛn sɔ mun n kle min mma’m be like. N ukali dɔ nga n fa bo jasin fɛ’n su kpɛ nɲɔn. Yɛ be nga n kle be Biblu’n nun like’n be wa ukali su kpɛ nsan. Kpɛkun n wa dili junman kpanngban asɔnun’n nun. Yɛ kɛ mɔ siɛn’n n ɲan min ti n nian ba’m be su’n ti’n, ɔ ju blɛ wie’n, Riti kwla kacili cɛn kunngun atin bofuɛ. N sunnzun kɛ ń dí junman’n i kɛ ngalɛ’n sa ń cɛ́ kpa.”
16 Rɔi nin Petina be wa bla’n te o be sa nun. Sanngɛ be kpɛli be junman dilɛ dɔ’n su naan b’a kwla bo jasin fɛ’n blɛ kwlaa nun. Rɔi waan: “Le mɔcuɛ kun nun’n, n di junman cɛn ba nsan cɛ, yɛ Petina di junman cɛn ba nɲɔn. Asa ekun’n, e tuli e sua dan’n nun e ko trannin sua kaan kun nun. Afin i liɛ’n i nun junman’n w’a sɔnman. Ka naan y’a wu e wa yasua nin e wa bla’n, e ti atin bofuɛ. Ɔ maan e ɲin kali junman sɔ’n i sin titi. I ti’n, kɛ e mma’m be ɲinnin’n e wa dili Ɲanmiɛn junman’n i blɛ kwlaa nun ekun. I sɔ’n i su mmlusuɛ nga e ɲɛnnin i’n, sika fi juman nun.”
Maan ‘Nyanmiɛn maan amun wun jɔ amun fɔuun’
17. E siman like ng’ɔ́ yó e ainman’n. Wafa nga Ɲanmiɛn Ndɛ’n fɔnvɔli amun i sɔ liɛ’n su’n, amun kɛn i ndɛ.
17 Sran fi siman sa ng’ɔ́ jú i su ainman ɔn. Afin “kɛ blɛ’n fa ti bɔ sa’m be fa ju’n, i su like yɛ be wun i-ɔ.” (Aku. 9:11) Sanngɛ, nɛ́n i sɔ liɛ’n ti yɛ kɛ é sé yɛ’n é trán akluntitiɛ nun kɛ be nga be siman Ɲanmiɛn’n sa ɔ. Afin be liɛ’n, be leman like mɔ be fa cici be wla ɔ. (Mat. 6:34) Akoto Pɔlu klɛli i kɛ: “Nán amun koko sa fi su, sanngɛ sa’n kwlaa nun nin like kwlaa ng’ɔ mian amun’n, an kan kle Nyanmiɛn, an srɛ i, an jran su kpa, yɛ an lɛ i ase. Yɛ ɔ maan amun wun jɔ́ amun fɔuun, amun su wun-man sa ti bɔ amun wun jɔ amun fɔuun sɔ’n i bo mlɔnmlɔn. Aunjuɛ sɔ’n maan amun wla su bo-man, yɛ amun akunndan su sanngan-man.”—Fil. 4:6, 7.
18, 19. ?Wafa sɛ yɛ Ɲanmiɛn fɔnvɔ e ɔ? An fa sunnzun ase be yiyi nun.
18 Aniaan wie mɔ afɛ’n tɔli be su’n be wunnin kɛ Zoova fɔnvɔli be. Aniaan bla kun seli kɛ: “Dɔɔtrɔ bian’n miannin min kɛ n kplin su naan be wla min wun mmoja. Kɛ ɔ ko wun min’n ndɛ klikli ng’ɔ kan’n yɛle kɛ: ‘?Sinnzin dilɛ benin yɛle kɛ nán be wlɔ ɔ wun mmoja’n?’ Kɛ ɔ ko yo sɔ’n, n srɛ Zoova min klun lɔ, kpɛkun min wun w’a jɔ min fɔuun. N ɲan wunmiɛn kpa. Kannzɛ mmoja m’ɔ nunman min nun’n ti’n, n ti fokofoko’n, sanngɛ n kwla jrannin Ɲanmiɛn Ndɛ’n su n yiyili sa nga ti yɛ n kunndɛman kɛ be wla min wun mmoja’n i nun.”
19 Ɔ ju blɛ wie’n, Ɲanmiɛn kwla fa e niaan’m be nun kun suan e bo, annzɛ ɔ man e aliɛ i ninnge’m be nun blɛ ng’ɔ ti i nuan su’n i su. Atrɛkpa’n amun a ti e niaan kun i nuan le kɛ: “Fluwa nga liɛ’n, min yɛ be klɛli be fa blɛli min ɔn! Like nga n miɛn i wun’n yɛle ndɛ kɛ nga sa bɔɔ sɛsɛsɛ.” Nanwlɛ, kannzɛ maan sa ng’ɔ o e su’n yo sɛ yo sɛ’n, sɛ e fa e wla’n gua Zoova su’n, ɔ́ klé e kɛ ɔ klo e. I kwlaa yoli o, “e ti kɛ i kuku nun nnɛn mun sa,” yɛ i dunman’n o e su.—Jue. 100:3; Zan 10:16; Yol. 15:14, 17.
20. ?Kɛ Satan i mɛn’n wá núnnún’n, ngue ti yɛ Zoova i sufuɛ’m bé trán fɔundi tranlɛ ɔ?
20 Zoova i “ya cɛn dan” mɔ w’a mantan koko yɛ’n i nun’n, like kwlaa nga Satan i mɛn nunfuɛ’m be fa be wla gua su’n ɔ́ núnnún. Be sika nin be sika ɔkwlɛ’n nin be aɲanbeun ninnge wie fi su kwlá deman be. (Sof. 1:18; Nya. 11:4) Saan Ɲanmiɛn m’ɔ ‘ti kɛ yɛbuɛ sa m’ɔ o lɛ anannganman anannganman’n,’ i kunngba cɛ yɛ e kwla talo i ɔ. (Eza. 26:4) I sɔ’n ti’n, maan e fa e wla’n kwlaa e gua Zoova su bikisa. Yɛle kɛ maan e fɛ i mmla’m be su. Yɛ kannzɛ be sɔman e nun naan be tanndan e ɲrun’n, sanngɛ maan e bo i Sielɛ’n i jasin fɛ’n. Yɛ maan e fa sa nga be o e su’n kwlaa e wlɛ i sa nun. Sran ng’ɔ yo sɔ’n, “ɔ́ trán fɔundi tranlɛ, sa tɛ kaan sa su nyɛn-mɛn i.”—Nya. 1:33.
[Ja ngua lɛ ndɛ’n]
a An nian fluwa ‘Maan e yo sa nga e yo ɔ e si kɛ Ɲanmiɛn klo e’n’ i bue 102-106 nun.
?Amun kwla yiyi nun?
• ?Kɛ sa tɛ yolɛ ba e klun’n, wafa sɛ yɛ e kwla fa e wla gua Ɲanmiɛn su ɔ?
• ?Kɛ sran’m be sɔman e nun mɔ be tanndan e ɲrun’n, wafa sɛ yɛ e kwla fa e wla gua Ɲanmiɛn su ɔ?
• ?Kɛ ngokɔɛ o e su’n, wafa sɛ yɛ e kwla fa e wla gua Ɲanmiɛn su ɔ?
[Foto, bue 15]
Sɛ e fa Ɲanmiɛn i mmla’m be su’n é dí aklunjuɛ.
[Foto, bue 17]
Zoova ti kɛ “yɛbuɛ sa, [...] ɔ o lɛ anannganman anannganman.”