Kɛ Zezi nin i sɔnnzɔnfuɛ’m be fin Zeriko mɔ be juli Betanin’n, be dili cɛn ba nsan lɛ. I sin’n, Nizan i le blu su m’ɔ ti Kisie cɛn’n, be fali Zerizalɛmun atin’n nglɛmun ndɛ kpa. Kɛ bé kɔ́’n, awe kunnin Zezi. Ɔ wunnin figie waka kun. Ɔ maan ɔ wunngeli i wun lɔ naan ɔ́ nían sɛ mma o su-o.

Kɛ ɔ́ yó sɔ’n, nn Marsi anglo’n su wa wie. Ɔ maan figie’m be nin-a suman mma, afin Zuɛn anglo’n nun yɛ be su-ɔ. Ɔ nin i sɔ’n ngba’n, figie waka nga Zezi wunnin i’n, i su nɲa’n timan aɔwi. I sɔ’n ti’n, Zezi buli i kɛ mma o su. Sanngɛ kɛ ɔ wunngeli figie waka’n i wun lɔ’n, ɔ wunnin kɛ ɔ nin-a suman. Nɲa ngunmin yɛ ɔ o su-ɔ. Zezi seli waka’n kɛ: “Nán sran fi di ɔ su mma kun le.” (Marki 11:14) Be ja nun lɛ’n, waka’n boli kee wulɛ bo. Kɛ i aliɛ cɛnnin’n yɛ i sɔnnzɔnfuɛ’m be wunnin sa sɔ’n i bo kpa-ɔ.

I sin’n, Zezi nin i sɔnnzɔnfuɛ’m be juli Zerizalɛmun. Kɛ be juli lɔ’n, Zezi wluli Ɲanmiɛn i sua’n nun lɔ ekun. I cɛn ba kun yɛ, ɔ ko nianniannin Ɲanmiɛn i sua’n nun lɔ, nnɔsua nun. Sanngɛ nán Ɲanmiɛn i sua’n i nun niannianlɛ ngbɛn ti yɛ ɔ ɔli lɔ ekun-ɔn. Ɔ ko yoli like uflɛ. Yɛle kɛ ɔ ko fuannin ‘be nga be su yo like atɛ lɔ’n, ɔ nin be nga be su to like’n.’ Asa ekun’n, ɔ suli “sika kacifuɛ’m be tabli mun nin auble atɛ yofuɛ’m be bia’m be bo guali.” (Marki 11:15) W’a kplinman su kɛ Ɲanmiɛn i sua’n i awlo’n kaci sran’m be atin naan be sin lɛ be wɔ klɔ’n i bue uflɛ su bɔbɔ. Like nga Zezi yoli i lɛ’n, ɔ yoli i kunngba’n i afuɛ nsan yɛ, afuɛ 30 nun Delɛ cɛn’n nun.​—Zan 2:14-16.

?Ngue ti yɛ Zezi fuannin sika kacifuɛ mun nin nnɛn atɛ yofuɛ mun Ɲanmiɛn i sua’n nun-ɔn? Ɔ seli kɛ: “?B’a klɛmɛn i kɛ, ‘Bé wá flɛ́ min sua’n kɛ nvlenvle’m be kwlaa be Ɲanmiɛn srɛlɛ sua’? Sanngɛ amun a fa yo awiefuɛ’m be lika.” (Marki 11:17) I waan sran sɔ’m be ti awiefuɛ afin kɛ sran’m be kɔ nnɛn nga bé fá yí tɛ’n i tolɛ’n, aata difuɛ sɔ’m be ukɛ i gua’n su dan kpa. Zezi waan i sɔ’n ti sran’m be wualɛ.

Like nga Zezi yoli’n i nganniɛn guali Ɲanmiɛn ɲrun jranfuɛ’m be su kpɛn mun nin mmla klɛfuɛ mun, ɔ nin nvle su kpɛn’m be su nun. Ɔ maan be fuali kpa kɛ bé kún i. Sanngɛ be wunman wafa nga bé yó naan b’a kun i’n. Afin sran kaka kpa su i su kɛ bé tíe i ndɛ’n.

Nán Zuifu’m be ngunmin yɛ be bali Delɛ cɛn’n i dilɛ-ɔ. Sran wie mun mɔ be timan Zuifu’n, mɔ be su Ɲanmiɛn kɛ Zuifu mun sa’n, be bali wie. Sran sɔ’m be nun wie’m be ti Glɛki. Kɛ mɔ Filipu i dunman’n ti Glɛki dunman’n ti’n, sran sɔ’m be ko wunnin i wun. Be seli i kɛ be kunndɛ kɛ bé wún Zezi wun. Filipu kusu siman sɛ blɛ ngalɛ’n nun’n, ɔ fata kɛ ɔ ko kan kle Zezi-o. Ɔ maan ɔ ko usali Andre. Kpɛkun be nɲɔn’n be ko boli su kleli Zezi. Kɛ ɔ́ yó sɔ’n, nn atrɛkpa ɔ te o Ɲanmiɛn i sua’n nun lɔ.

Zezi si kɛ ɔ cɛ kan’n bé wá kún i. Ɔ maan nán blɛ ngalɛ’n nun yɛ ɔ fata kɛ ɔ yi i wun nglo kle sran mun-ɔn annzɛ ɔ yo naan sran’m be si i-ɔ. I sɔ’n ti’n, ɔ kannin ndɛ kun ɲanndra nun fa tɛli i akoto nɲɔn’n be su. Ɔ seli be kɛ: “Blɛ nga Sran wa’n wá ɲán ɲrun’n w’a ju. Nanwlɛ, ń kán klé amun kpa kɛ sɛ ble mma kun w’a tɔman asiɛ’n wun’n naan w’a saciman’n, ɔ ka ble mma kunngba. Sanngɛ sɛ ɔ saci’n, ɔ su mma kpanngban.”​—Zan 12:23, 24.

Ble mma kunngba cɛ’n timan like fi. Sanngɛ sɛ be lua naan “ɔ saci’n,” ɔ kwla fifi. I sin’n, ɔ ɲin, kpɛkun ɔ kaci ble ja m’ɔ su mma kpanngban. I kunngba’n yɛle Zezi i liɛ’n. Sɛ ɔ yo Ɲanmiɛn i klun sa lele ɔ fa wu’n, Ɲanmiɛn sín i lika mán be kwlaa nga be su Ɲanmiɛn kɛ i sa’n be nguan m’ɔ leman awieliɛ’n. I sɔ’n ti’n, ɔ seli kɛ: “Sran kwlaa ng’ɔ klo i nguan’n, ɔ saci i. Sanngɛ sran ng’ɔ kpɔ i nguan’n mɛn nga nun’n, ɔ́ sɛ́sɛ́ i naan w’a kwla ɲan nguan m’ɔ leman awieliɛ’n.”​—Zan 12:25.

Zezi kɛnnin ekun kɛ: “Sɛ sran kun waan ɔ́ sú min’n, maan ɔ su min su. Afin lika nga n wo’n, lɛ yɛ min sufuɛ’n trán-ɔn. Sran kwlaa nga i waan ɔ́ sú min’n, min Si’n wá mɛ́n i kɔmin su.” (Zan 12:26) Nanwlɛ, be nga Zezi i Si’n mán be kɔmin su sɔ’n, be liɛ su ti ye! Afin be nin Zezi bé dí famiɛn.

Zezi si kɛ ɔ ka kaan sa’n, sran’m bé wá klé i ɲrɛnnɛn lele ɔ́ fá wú. I sɔ’n ti’n, ɔ seli kɛ: “Kɛ é sé yɛ’n, min akunndan’n w’a sanngan. ?Yɛ ń sé sɛ ekun? Min Si, de min blɛ sɔ’n nun.” Sanngɛ Zezi kunndɛ kpa kɛ ɔ́ yó Ɲanmiɛn i klun sa’n lele guɛ i ti nin i bo. I sɔ’n ti’n, ɔ kan guali su kɛ: “Kusu blɛ sɔ’n ti yɛ n bali-ɔ.” (Zan 12:27) Ajalɛ kwlaa nga Zoova fali naan i klun sa’n w’a kpɛn su’n, mɔ i kun yɛle kɛ Zezi fɛ i wun yi tɛ’n, Zezi suannin be bo.

E o Kisie cɛn, Nizan i le blu su. Zezi o Ɲanmiɛn i sua’n nun lɔ. Ɔ su kan kunlɛ m’ɔ ka kaan bé kún i’n i ndɛ. Ɔ kunndɛman kɛ i wie’n ti’n, sran’m be saci Ɲanmiɛn i dunman’n. I sɔ’n ti’n, ɔ seli kɛ: “Min Si, yo maan ɔ dunman’n fu.” Kpɛkun be tili sran kun nɛn ɲanmiɛn su lɔ. Ɔ seli kɛ: “N yoli maan ɔ fuli, yɛ ń wá yó maan ɔ́ fú ekun.”​—Zan 12:27, 28.

Be nga be o lɛ’n, b’a wunman sran ng’ɔ ijɔli’n i wlɛ mlɔnmlɔn. Wie mun bɔbɔ be waan ɲanmiɛn’n yɛ ɔ kplali-ɔ. Wie mun ekun be seli kɛ: “Anzi kun kannin ndɛ kleli i.” (Zan 12:29) Sanngɛ sran ng’ɔ ijɔli’n yɛle Zoova bɔbɔ. Kɛ ɔ fin cɛn nga Zezi boli Ɲanmiɛn junman’n i dilɛ bo’n, nán kpɛ klikli nga Zoova íjɔ’n yɛ ɔ o lɛ-ɔ.

Afin i afuɛ nsan nin sin yɛ, kɛ Zan Batɛmun yofuɛ’n yó Zezi i batɛmun’n, Ɲanmiɛn ijɔli. Zan tili ndɛ nga Ɲanmiɛn kɛnnin i Zezi su’n. Ɔ seli kɛ: “Min Wa’n yɛ, min awlɛn su ba mɔ min klun jɔ i wun’n niɔn.” I sin’n, kɛ afuɛ 32 nun Delɛ cɛn’n sinnin’n, Zezi kacili Zaki nin Zan nin Piɛli be ɲrun. Cɛn sɔ’n nun’n, Ɲanmiɛn ijɔli ekun. Yɛ sran nsan sɔ’m be tili i nɛn’n. Ɔ seli kɛ: “Min Wa’n yɛ, min awlɛn su ba mɔ min klun jɔ i wun’n niɔn. Amun tie ndɛ ng’ɔ kan’n.” (Matie 3:17; 17:5) Sanngɛ Nizan i le blu su liɛ nun’n, wafa nga Ɲanmiɛn ijɔli’n ɔ ti i liɛ ngunmin. Afin kɛ ɔ́ íjɔ’n, sran kpanngban tili. I kpɛ nsan su nga Ɲanmiɛn íjɔ’n yɛ ɔ o lɛ-ɔ.

Zezi seli kɛ: “Nán min ti yɛ nɛn sɔ’n tɛli-ɔ, sanngɛ amun ti-ɔ.” (Zan 12:30) Ndɛ nga Ɲanmiɛn kannin’n kle weiin kɛ Zezi ti Ɲanmiɛn Wa sakpa, naan i yɛ ɔ ti Mesi mɔ Ɲanmiɛn nuan ijɔfuɛ’m be kɛnnin i ndɛ’n niɔn.

Wafa nga Zezi suli Ɲanmiɛn kpa lele guɛli i ti nin i bo’n, ɔ kle e like nɲɔn. I klikli’n yɛle kɛ ɔ fata kɛ sran’m be niɛn i ajalɛ’n su naan be su Ɲanmiɛn kpa lele guɛ i ti nin i bo wie. I nɲɔn su’n yɛle kɛ Suɛn tɔnfuɛ Satan m’ɔ ti mɛn’n i siefuɛ’n, ɔ nin nunnunlɛ fata. Zezi seli kɛ: “Blɛ nga bé wá dí mɛn nga i jɔlɛ’n w’a ju siɛn’n. Ɔ maan bé wá kán sran ng’ɔ sie mɛn nga’n i bo.” I sin’n, ɔ kan guali su kɛ: “Sanngɛ min liɛ’n, sɛ be man min su’n, ń yó maan sran wafawafa kwlaa bé bá min sin.” (Zan 12:31, 32) Wulɛ mɔ Zezi wuli waka’n su’n ti’n, sran kpanngban bé wá bɛ́ i sin, kpɛkun bé kwlá ɲán nguan m’ɔ leman awieliɛ’n.

Kɛ Zezi seli kɛ ‘bé wá mɛ́n i su’n,’ sran’m be seli kɛ: “E tili i kɛ Mmla’n se kɛ Klisi’n ká lɛ tititi. ?Yɛ ɔ yo sɛ yɛ a se kɛ bé wá sénde Sran wa’n waka’n su-ɔ? ?Wan yɛle Sran wa’n?” (Zan 12:34) Ninnge kpanngban be kle kɛ Zezi yɛ ɔ ti Sran wa’n niɔn naan i yɛ ɔ ti Mesi nga Ɲanmiɛn nuan ijɔfuɛ’m be seli kɛ ɔ́ bá’n niɔn. I wie yɛle kɛ Ɲanmiɛn bɔbɔ ijɔli. Ɔ nin i sɔ’n ngba’n, sran sunman lika b’a lafiman su kɛ i yɛ ɔ ti Sran wa’n sakpa-ɔ.

Zezi flannin ndɛ kun mɔ kɛnnin i laa’n i nun. I waan i yɛ ɔ ti “kannin’n” niɔn. (Zan 8:12; 9:5) I sɔ’n ti’n, ɔ wlali sran’m be fanngan. Ɔ seli be kɛ: “Kannin’n nin amun trán le nɲɔn kun. Blɛ mɔ kannin’n wo lɛ’n, maan amun nanti kannin’n i kpajalɛ’n nun. [...] Blɛ mɔ kannin’n wo lɛ’n, maan amun kle kɛ amun lafi kannin’n su. I liɛ’n, amún yó kannin’n i mma mun.” (Zan 12:35, 36) Kɛ Zezi seli sɔ’n, i sin’n, ɔ cuɛnnin i wun. Afin nán cɛn sɔ’n m’ɔ ti Nizan i le blu su’n, yɛ ɔ fata kɛ be kun i-ɔ. Nizan i le blu nin nnan su (14) yɛ ‘bé mɛ́n i su-ɔ.’ Yɛle kɛ cɛn sɔ’n nun’n, bé bóbó i waka kun su.​—Galasifuɛ Mun 3:13.

Kɛ e fa e ɲin e sie i Zezi i junman ng’ɔ dili’n su’n, e wun i wlɛ weiin kɛ Zuifu’m be su ndɛ nga Ɲanmiɛn nuan ijɔfuɛ Ezai kannin’n, ɔ kpɛnnin su. Yɛle kɛ b’a lafiman Zezi su. Ezai seli kɛ nvlefuɛ’m be su wunman ase, kpɛkun be awlɛn’n kéte. Ɔ maan be su saman be sin naan b’a yo juejue. (Ezai 6:10; Zan 12:40) I sɔ’n kle kɛ Zuifu kpanngban b’a lafiman su kɛ Zezi yɛ ɔ ti be Defuɛ nin sran ng’ɔ kwla uka be naan b’a ɲan nguan-ɔn.

Nikodɛmun nin Zozɛfu m’ɔ fin Arimate’n nin Zuifu’m be kpɛnngbɛn wie mun ekun be liɛ’n, be “ lafili” Zezi su. ?Sanngɛ bé yí i nglo kɛ be lafi i su? Afin “be klo aɲrunɲan ng’ɔ fin klɔ sran mun’n,” kpɛkun be kunndɛman kɛ be kan be bo Ɲanmiɛn i sua’n nun.​—Zan 12:42, 43.

?Kɛ be se kɛ sran kun lafi Zezi su’n, i sɔ’n kle sɛ? Zezi bɔbɔ seli kɛ: “Sran ng’ɔ lafi min su’n, nán min ngunmin min su yɛ ɔ lafi-ɔ, sanngɛ ɔ lafi sran ng’ɔ sunmannin min’n i su wie. Yɛ sran ng’ɔ wun min’n, nn w’a wun Sran ng’ɔ sunmannin min’n wie.” Ndɛ nanwlɛ nga Ɲanmiɛn seli Zezi kɛ ɔ kan kle sran mun’n, Zezi kan kleli be titi. Afin be ti cinnjin kpa. Zezi seli kɛ: “Sran ng’ɔ sɔman min nun’n, m’ɔ faman ndɛ nga n kan be’n be su’n, sran kun o lɛ’n, ɔ́ wá dí i jɔlɛ. Ndɛ nga n kannin’n i su yɛ bé jrán bé dí i jɔlɛ blɛ kasiɛn’n nun-ɔn.”​—Zan 12:44, 45, 48.

Zezi guɛli i ndɛ’n i bo kɛ: “Ndɛ nga n kan’n, n kpɛman min ti nun yɛ n kan-ɔn. Sanngɛ Siɛ m’ɔ sunmannin min’n, i bɔbɔ yɛ ɔ kleli min ndɛ ng’ɔ fata kɛ n kan nin like ng’ɔ fata kɛ n kle’n niɔn. Yɛ n si kɛ ndɛ ng’ɔ kan’n i su falɛ’n man nguan m’ɔ leman awieliɛ’n.” (Zan 12:49, 50) Zezi si kɛ ɔ cɛ kan’n, ɔ́ gúɛ i mmoja’n i ase. Ɔ́ yó sɔ fá yí be nga be yi i nglo kɛ be lafi i su’n, be ti tɛ.​—Rɔmunfuɛ Mun 5:8, 9.