Kɛ Adan nin Ɛvu be jasoli Edɛnin fie’n nun lɔ’n, be wa wuli ba kaka. Kaɛn yɛ ɔ ti be wa klikli’n niɔn. Ɔ ti fie difuɛ. I sin’n be wa wuli Abɛli. Ɔ ti bua tafuɛ.

Cɛn kun’n, Kaɛn nin Abɛli be mannin Zoova i like. Zoova i klun jɔli like nga Abɛli mannin’n su, sanngɛ i klun w’a jɔman Kaɛn liɛ’n su. I sɔ’n ti’n, Kaɛn fali ya dan kpa. Zoova seli Kaɛn kɛ sɛ ɔ fa ya kɛ ngalɛ’n sa’n ɔ́ yó sa tɛ. Sanngɛ Kaɛn w’a tieman.

Kaɛn seli Abɛli kɛ: ‘Bla maan e wɔ fie su.’ Kɛ be juli lɔ’n, Kaɛn tɔli i niaan’n su kunnin i. ?Ngue yɛ Zoova yoli-ɔ? Ɔ tuli Kaɛn i fɔ. Ɔ yoli maan Kaɛn jasoli i awlofuɛ’m be wun lɛ ɔli mmua kpa. Zoova w’a mɛnmɛn i atin kɛ ɔ sɛ i sin kun.

?Ngue yɛ ndɛ sɔ’n kle e-ɔ? Sɛ sa wie w’a yoman kɛ nga e fa klo’n sa’n, wie liɛ’n e fa ya. Sɛ ɔ yo sɔ’n, maan e gua e ya’n i ase naan y’a yoman sa tɛ. Sɛ kusu sran uflɛ sie i nzɔliɛ kɛ y’a fa ya naan ɔ man e afɔtuɛ’n, maan e sɔ nun klanman.

Abɛli kloli Zoova yɛ ɔ yoli sa kpa. I sɔ’n ti’n, Zoova i wla su fimɛn i su le. Kɛ asiɛ’n wá káci lika klanman’n, Ɲanmiɛn wá tínnge Abɛli.

Kɛ ɔ́ kɔ́ i ɲrun’n, sran’m be wa sɔnnin asiɛ’n su kpa. Be dan lika be yoli sa tɛ. Anzi mun bɔbɔ mɔ be o ɲanmiɛn su lɔ’n, be nun wie mun be yoli sa tɛ wie. Be jasoli ɲanmiɛn su lɔ be bali asiɛ’n su wa. ?A si sa nga ti yɛ be yoli sɔ’n? Be kunndɛli kɛ bé fá klɔ sran wunnɛn naan bé já bla.

Anzi sɔ mun be nin bla mun be wuli ba. Ba nga be wuli be’n, be le wunmiɛn kpa, be kle sran’m be ɲrɛnnɛn, yɛ be yo be like yaya. Zoova kwlá tranman lɛ sa nianman be. Ɔ seli kɛ ɔ́ wá yó naan nzue dan kpa kun tɔ naan ɔ nunnun klunwifuɛ mun.

Sanngɛ blɛ sɔ’n nun’n, sran kun o lɛ’n, ɔ ti sran kpa. Ɔ klo Zoova. Be flɛ i kɛ Nowe. Ɔ le bla kun nin ba yasua nsan. Be flɛ i wa’n kun kɛ Sɛmun, be flɛ kun ekun kɛ Kamun, yɛ be flɛ kun kɛ Zafɛti. Be kwlaa be le bla. Zoova seli Nowe kɛ ɔ bobo mmeli dan kpa kun. I liɛ’n, kɛ nzue dan’n wá tɔ́’n, ɔ nin i awlofuɛ mun be su wuman. Mmeli’n ti kɛ alaka dan kpa kun sa. Ɔ mlɔnman nzue nun. Zoova seli Nowe kɛ ɔ fa nnɛn kpanngban wlu mmeli’n nun wie naan b’a wuman.

Nowe w’a sisimɛn i bo. Ɔ boli mmeli’n i bobolɛ bo. Nowe nin i awlofuɛ mun be dili afuɛ kɔe ablenun (50) naan b’a wie mmeli’n i bobo. Wafa nga Zoova seli be kɛ be yo’n, i su yɛ be niannin be yoli-ɔ. Blɛ sɔ’n nun’n, Nowe kannin nzue dan ng’ɔ́ wá tɔ́’n i ndɛ kleli sran mun. Sanngɛ b’a faman su.

Siɛn’n, ɔ fata kɛ be wlu mmeli’n nun. Maan e nian sa ng’ɔ́ wá jú’n.