LIKE SUANLƐ 11

Ndɛ’n i kanlɛ juejue su

Rɔmunfuɛ Mun 12:11

LIKE NG’Ɔ FATA KƐ A YO’N: Kan ndɛ’n i juejue su naan ɔ wla ɔ ndɛ tiefuɛ’m be fanngan, naan be fa ajalɛ.

Maan ndɛ’n wluwlu ɔ bɔbɔ ɔ wun kpa. Like nga ti yɛ ndɛ nga á wá yíyí nun’n ɔ ti cinnjin’n, kɛ á síesíe ɔ wun’n, bu i akunndan. Ndɛ nga a su kan’n, ɔ fata kɛ a wun i wlɛ kpa. I liɛ’n, a kwla yiyi nun weinwein.
Bu ɔ ndɛ tiefuɛ’m be akunndan. Ndɛ nga á wá kánngan nun’n, annzɛ á wá yíyí nun’n, wafa nga ɔ kwla yo ɔ ndɛ tiefuɛ’m be ye’n, bu i akunndan. Wafa nga a kwla kan ndɛ’n naan w’a yo be fɛ’n, bu i akunndan wie.
Kan ndɛ’n i juejue su. Ijɔ juejue su. Maan wafa nga á yó ɔ ɲrun’n, ɔ nin wafa nga á síesíe ɔ sa’n, be uka ɔ ndɛ tiefuɛ mun naan be wun wafa nga ndɛ’n fa yo wɔ’n.

Wafa nga a siesie ɔ sa’n, maan ɔ nin ndɛ nga a su kan’n, be wɔ likawlɛ. Sɛ a kunndɛ kɛ á fá ɔ ndɛ tiefuɛ’m be ɲin síe i ndɛ cinnjin wie su, annzɛ á wlá be fanngan naan be fa ajalɛ wie’n, kan ndɛ’n juejue su. Sanngɛ, nán yo sɔ tratra su naan ɔ wun flan ɔ ndɛ tiefuɛ mun.