Maan e lafi su kɛ Zoova yo sa kpa titi

1-2. (1) ?Ngue ti yɛ sran sunman be lafiman be nga be le kwlalɛ’n be su-ɔ? (2) ?Ngue yɛ é wá kɛ́n i ndɛ like suanlɛ nga nun-ɔn?

ANDƐ’N, sran sunman be lafiman be nga be le kwlalɛ’n be su. Afin be sieli i nzɔliɛ kɛ jɔlɛ difuɛ mun nin politikifuɛ’m be jran be nga be le sika’n nin be nga be le kwlalɛ’n be sin. Kpɛkun be buman yalɛfuɛ’m be wie. Biblu’n kɛnnin i sɔ liɛ’n i ndɛ seli kɛ: ‘Kɛ sran kun sie i wiengu kun’n ɔ kle i nyrɛnnɛn.’ (Aku. 8:9) Asa ekun’n, Ɲanmiɛn sulɛ wafa’m be su kpɛnngbɛn’m be yo sa tɛtɛ sunman. I sɔ’n ti’n, sran kpanngban be lafiman Ɲanmiɛn su kun. Ɔ maan kɛ é klé sran’m be Biblu’n nun like’n, kɛ ɔ ko yo naan y’a uka be naan b’a lafi Zoova nin i janunfuɛ nga be o asiɛ’n su wa’n be su’n, ɔ timan pɔpɔ.

² Sanngɛ nán be nga e kle be Biblu’n nun like’n be ngunmin yɛ ɔ fata kɛ be lafi Zoova nin i anuannzɛ’n be su-ɔ. E bɔbɔ nga e su Zoova’n ɔ fata kɛ e yo sɔ wie. Kannzɛ e su Zoova w’a cɛ sɛ’n, ɔ fata kɛ e lafi su titi kɛ like kwlaa nga Zoova yo’n ti kpa. Sanngɛ ɔ ju wie’n, i sɔ yolɛ’n kwla yo kekle e sa nun. Like suanlɛ nga nun’n, é wá kán sa nsan mɔ be kwla yo naan y’a lafiman Ɲanmiɛn su kpa kun’n be ndɛ. I klikli’n yɛle blɛ mɔ e kanngan Biblu’n nun ndɛ kun nun’n. I nɲɔn su’n yɛle blɛ mɔ Zoova i janunfuɛ’m be fa ajalɛ kun’n. Kpɛkun i nsan su’n yɛle blɛ nga sa kekle wie’m bé wá tɔ́ e su’n.

KƐ É KÁNNGAN BIBLU’N NUN’N MAAN E KLE KƐ E LAFI ZOOVA SU

3. ?Biblu’n nun ndɛ benin yɛ be kwla sanngan e akunndan kan-ɔn?

³ Kɛ é kánngan Ɲanmiɛn Ndɛ’n nun mɔ e wun wafa nga Zoova nin i sufuɛ wie’m be nantili’n annzɛ ajalɛ wie m’ɔ fali’n, ɔ ju wie’n e wunmɛn i wlɛ. Ɔ maan e usa e wun kosan wie mun. I wie yɛle kɛ Kalɛ fluwa’n nun’n, Zoova seli kɛ be kun sran kun m’ɔ ko isali yie Wunmiɛn-lolɛ-cɛn’n nun’n. Sanngɛ Samiɛli fluwa nɲɔn su’n nun’n, ɔ yacili Famiɛn Davidi i wun sa’n cɛli i. Kusu nn Davidi kunndɛli sran yi kpɛkun ɔ kunnin sran. (Kal. 15:32, 35; 2 Sam. 12:9, 13) I lɛ nun’n, e kwla usa e wun kɛ: ‘?Ngue ti yɛ Davidi m’ɔ kunnin sran yɛ ɔ kunndɛli sran yi’n, Zoova yaci i wun sa’n cɛ i kpɛkun i waan be kun bian ng’ɔ ko isali yie’n niɔn? Kusu nn i sa tɛ liɛ’n juman Davidi liɛ’n nun kaan sa.’ Kɛ ɔ ko yo naan y’a wun i wlɛ’n, maan e fa e ɲin e sie i ninnge cinnjin nsan su. Kɛ é kánngan Biblu’n nun’n, ɔ fataman kɛ e wla fi ninnge sɔ’m be su.

4. ?Wafa sɛ yɛ Bo Bolɛ 18:20, 21 nin Mmla’n 10:17 be kwla uka e naan y’a lafi jɔlɛ nga Zoova di’n su-ɔ?

⁴ Kɛ Biblu’n kán sa kun i ndɛ’n, nán blɛ kwlaa nun yɛ ɔ kan ndɛ’n i ngbɛsungbɛsu kwlaa-ɔ. I wie yɛle kɛ e si kɛ Davidi liɛ’n i sa tɛ’n yoli i nsisɔ. (Jue. 51:4-6) Sanngɛ bian ng’ɔ fɔnnin Wunmiɛn-lolɛ-cɛn’n i su mmla’n liɛ’n, e siman sɛ i sa tɛ’n yoli i nsisɔ-o. Asa ekun’n, atrɛkpa’n kwlaa naan w’a yo sa tɛ sɔ’n, ɔ fɔnnin Zoova i mmla wie mun. Atrɛkpa kusu’n, be mɛnnin i afɔtuɛ laa w’a faman. Biblu’n w’a yiyiman sa sɔ’n nun kpa. Sanngɛ like nga e si i’n yɛle kɛ Zoova liɛ’n ɔ “diman ndɛ kwlɛ” le. (Mml. 32:4) Kwlaa naan w’a fa ajalɛ kun’n, ɔ fɛ i ɲin sie i ndɛ’n i ngbɛsungbɛsu kwlaa su. Asa ekun’n, ɔ jranman bewanbewan ndɛ annzɛ sran kun i wun ndɛ nga be kan’n su diman jɔlɛ. Sanngɛ e klɔ sran mun e liɛ’n ɔ ju wie’n i sɔ yɛ e yo-ɔ. (An kanngan Bo Bolɛ 18:20, 21; Mmla’n 10:17 be nun.) Sɛ e suan Zoova nin i mmla’m be su like naan e si Zoova kpa’n, é láfi jɔlɛ ng’ɔ di be’n be su. Ɔ maan sɛ e kanngan Biblu’n nun ndɛ kun nun naan e wunman ajalɛ wie m’ɔ fali’n i wlɛ bɔbɔ’n, sanngɛ é láfi i su. Afin e si kɛ e Ɲanmiɛn liɛ’n “ɔ yo sa’n i nuan su.”—Jue. 145:17.

5. ?Wafa sɛ yɛ fɔ ng’ɔ o e nun’n ɔ kle e yalɛ-ɔ? (An nian kuku ng’ɔ suan “Fɔ m’ɔ o e nun’n ti’n ɔ ju wie’n akunndan nga e bu’n timan su” i nun wie.)

⁵ Fɔ m’ɔ o e nun’n ti’n, ɔ ju wie’n akunndan nga e bu’n timan su. Kɛ mɔ Ɲanmiɛn yili e kɛ i bɔbɔ sa’n ti’n, e kloman sran lufle bulɛ’n. (Bob. 1:26) Sanngɛ fɔ m’ɔ o e nun ti’n, e kwla bu i kɛ be dili sran kun i lufle, kusu nn ɔ timan sɔ. Yɛ kannzɛ bɔbɔ e bu i kɛ e si ndɛ’n i ngbɛngbɛsu kwlaa’n, sanngɛ e kwla fɔn. I wie yɛle Zonasi liɛ’n. Kɛ Zoova fali ajalɛ kɛ ɔ́ sí Ninivufuɛ’m be aunnvɔɛ naan ɔ su nunnunman be kun’n, Zonasi waan Zoova w’a faman ajalɛ kpa. I kpa bɔbɔ’n, ɔ fali ya dan kpa. (Zon. 3:10–4:1) ?Sanngɛ kɛ Zoova fali ajalɛ sɔ’n i bo’n guali sɛ? Sran lele 120.000 be ɲannin be ti. Ɔ maan i agualiɛ su’n e kwlaa e wunnin i wlɛ kɛ akunndan nga Zonasi buli’n yɛ w’a yoman su-ɔ. Nán Zoova liɛ’n niɔn.

6. ?Ngue ti yɛ sɛ Zoova waan ɔ́ fá ajalɛ kun’n, ɔ nunman nun kɛ ɔ usa e ngwlɛlɛ afɛ-ɔ?

⁶ Ɔ nunman nun kɛ Zoova yiyi like nga ti yɛ ɔ fa ajalɛ wie mun’n be nun kle e. Lalafuɛ nun’n kɛ Zoova yo like kun’n annzɛ kɛ i waan ɔ́ yó like kun’n, ɔ ju wie’n ɔ se i sufuɛ’m be kɛ be kan akunndan nga be bu i like sɔ’n su’n i ndɛ be kle i. (Bob. 18:25; Zon. 4:2, 3) Ɔ ju wie bɔbɔ’n, ɔ yiyi like nga ti yɛ ɔ fali ajalɛ wie mun’n i nun kle be. (Zon. 4:10, 11) Sanngɛ nán e wla fi su kɛ ɔ nunman nun kɛ Zoova yiyi like nga ti yɛ ɔ yo ninnge wie mun’n i nun kle e. I yɛ ɔ yili e-ɔ. Ɔ maan sɛ i waan ɔ́ fá ajalɛ kun’n, ɔ nunman nun kɛ ɔ usa e ngwlɛlɛ afɛ annzɛ ɔ usa e akunndan nga e bu i like sɔ’n su’n kwlaa naan w’a yo.—Eza. 40:13, 14; 55:9.

KƐ ZOOVA I JANUNFUƐ’M BE FA AJALƐ’N MAAN E KLE KƐ E LAFI ZOOVA SU

7. (1) ?Ɔ ju wie’n, ngue yɛ ɔ kle e yalɛ-ɔ? (2) ?Ngue ti-ɔ?

⁷ E kwlaa e si kɛ ajalɛ nga Zoova fa be’n be kwlaa be ti kpa. Sanngɛ like ng’ɔ kle e yalɛ’n, yɛle kɛ wie liɛ’n e lafiman Zoova i janunfuɛ nga be o asiɛ’n su wa’n be su. I wie yɛle kɛ sɛ be fa ajalɛ kun’n, wie liɛ’n e usa e wun sɛ ajalɛ sɔ’n fin Zoova sakpa-o annzɛ be bɔbɔ yɛ be kpɛli be ti nun be fali-o. Atrɛkpa’n, laa’n sran wie’m be yoli sɔ wie. Maan e kan be nga e kannin be ndɛ, ndɛ kpɔlɛ 3 nun’n be ndɛ kan ekun. Atrɛkpa’n, bian ng’ɔ fɔnnin Wunmiɛn-lolɛ-cɛn’n i su mmla’n, i osufuɛ kun usɛli i wun kɛ: ‘?Moizi usali Zoova i sa ka naan w’a se kɛ be kun min niaan’n sakpa?’ Annzɛ kusu bla nga Davidi kunndɛli i’n i wun Iri i janvuɛ kun kwla se kɛ: ‘Kɛ mɔ Davidi ti famiɛn’n i ti yɛ b’a kunmɛn i-ɔ. Ɔ ti’ɛ ti’n, ɔ fata kɛ be kun i.’ I kwlaa yoli-o, nán e wla fi su kɛ sɛ e lafiman Zoova i janunfuɛ nga be o asiɛ’n su wa’n be su’n, é kwlá seman kɛ e lafi Zoova su. Afin Zoova liɛ’n ɔ lafi be su.

8. ?Ngue yɛ Sa Nga Be Yoli’n 16:4, 5 kɛn i ndɛ mɔ e wun i anuannzɛ’n nun andɛ-ɔ?

⁸ Andɛ’n, Zoova sin “junman difuɛ nanwlɛfuɛ m’ɔ si ngwlɛlɛ’n” i lika fa kle i anuannzɛ’n i bue ng’ɔ o asiɛ’n su wa’n i nunfuɛ’m be atin. (Mat. 24:45) Kɛ aniaan nga be dunnin Klisifuɛ klikli’m be ɲrun mmua’n sa’n, aniaan sɔ’m be uka Ɲanmiɛn i sufuɛ nga be o mɛn wunmuan’n nun’n naan b’a su Ɲanmiɛn kpa. Asa’n, be kle asɔnun kpɛnngbɛn’m be ajalɛ wie mun. (An kanngan Sa Nga Be Yoli’n 16:4, 5 nun.) Asɔnun kpɛnngbɛn’m be kusu be nanti ajalɛ sɔ’m be su asɔnun’m be nun. Sɛ e waan é klé kɛ e lafi Zoova su’n, maan e nanti ajalɛ nga asɔnun kpɛnngbɛn mun nin anuannzɛ’n i ɲrun dinfuɛ’m be kle e’n be su.

9. (1) ?Blɛ benin nun yɛ ajalɛ nga asɔnun kpɛnngbɛn’m be fa’n i su nantilɛ’n kwla yo kekle-ɔ? (2) ?Ngue ti-ɔ?

⁹ Ɔ ju wie’n, kɛ ɔ ko yo naan y’a nanti ajalɛ nga asɔnun kpɛnngbɛn’m be fa’n su’n, ɔ ti kekle man e. I wie yɛle kɛ koko nun wa’n, anuannzɛ’n fali ajalɛ kɛ ɔ́ kán asɔnun bo wie mun bó nun naan Ɲanmiɛn Sielɛ Sua’m be bia wie’m b’a kaman lɛ ngbɛn. I sɔ’n ti’n, lika wie’m be nun’n asɔnun kpɛnngbɛn’m be seli aniaan’m be kɛ be wɔ asɔnun bo uflɛ nun. Sɛ asɔnun kpɛnngbɛn’m be se e kɛ e wɔ asɔnun bo uflɛ nun’n, i sɔ yolɛ’n kwla yo kekle e sa nun. Afin atrɛkpa’n é kpɔ́ci e janvuɛ nin e osufuɛ wie mun. Asa ekun’n, e si kɛ nán Zoova yɛ ɔ kle asɔnun kpɛnngbɛn mun asɔnun ng’ɔ fata kɛ aniaan kun wɔ nun’n niɔn. Ɔ maan e kwla se kɛ be bɔbɔ yɛ be kpɛli be ti nun-ɔn. Sanngɛ nán e wla fi su kɛ Zoova lafi asɔnun kpɛnngbɛn’m be su. I sɔ’n ti’n, ɔ fata kɛ e kusu e lafi be su wie.b

10. ?Kɛ nga Ebre Mun 13:17 fa kan’n sa’n, ngue ti yɛ ɔ fata kɛ e nanti ajalɛ nga asɔnun kpɛnngbɛn’m be fa’n su-ɔ?

¹⁰ ?Kannzɛ bɔbɔ ajalɛ nga asɔnun kpɛnngbɛn’m be fa’n timan e liɛ su’n, sanngɛ ngue ti yɛ ɔ ti cinnjin kɛ e nanti su-ɔ? Afin sɛ e yo sɔ’n, bo kun yolɛ’n trán asɔnun’n nun titi. (Efɛ. 4:2, 3) Kɛ asɔnun kpɛnngbɛn’m be fa ajalɛ mɔ asɔnun’n nunfuɛ’m be nanti su’n, asɔnun’n kɔ i ɲrun. (An kanngan Ebre Mun 13:17 nun.) Asa ekun’n, kɛ e nanti ajalɛ nga be fa’n su’n, e kle Zoova kɛ e lafi i su. Afin Zoova bɔbɔ lafi be su wie.—Yol. 20:28.

11. ?Ngue yɛ ɔ kwla uka e naan y’a lafi ajalɛ nga asɔnun kpɛnngbɛn’m be fa’n su-ɔ?

¹¹ Like ng’ɔ kwla uka e naan y’a lafi ajalɛ nga asɔnun kpɛnngbɛn’m be fa’n su’n, i kun yɛle kɛ nán e wla fi su kɛ kwlaa naan b’a fa ajalɛ kun’n, be dun mmua be srɛ Ɲanmiɛn kɛ ɔ fɛ i wawɛ’n man be. Asa ekun’n, be bo be ɲin ase be nian Biblu’n nin fluwa nga anuannzɛ’n yili be’n be nun kpa. Be kunndɛ kpa kɛ Zoova i klun jɔ be wun, yɛ be kunndɛ kɛ bé nían Zoova i sufuɛ’m be lika kpa. Asa ekun’n, be si kɛ bé wá kán be junman’n i su ndɛ klé Ɲanmiɛn. (1 Piɛ. 5:2, 3) Mɛn nga nun’n, sran’m be wunnɛn kplo’n nin be asɔnun’n nin politiki ti’n, be bubu be wun nun. Sanngɛ Zoova i sufuɛ’m be liɛ’n, be bo ti kun yɛ be su Ɲanmiɛn likawlɛ. I sɔ’n kle weiin kɛ Zoova i sa o i sufuɛ’m be su.

12. ?Sɛ aniaan kun yo sa tɛ’n, ngue yɛ asɔnun kpɛnngbɛn’m be yo-ɔ?

¹² Zoova fali junman cinnjin kpa kun fa mannin asɔnun kpɛnngbɛn mun. Yɛle kɛ be yo naan asɔnun’n nun yo sanwun titi. Sɛ aniaan kun yo sa tɛ’n, Zoova kunndɛ kɛ asɔnun kpɛnngbɛn’m be nian sɛ ɔ kwla ka asɔnun’n nun titi-o. I sɔ yolɛ nun’n, ɔ fata kɛ be nian sɛ i sa tɛ’n yo i nsisɔ sakpa-o. Sran ng’ɔ yoli sa tɛ’n kwla se kɛ ɔ yo i nsisɔ. ?Sanngɛ i ayeliɛ’n kle kɛ ɔ yo i nsisɔ sakpa? ?W’a fua kpa kɛ ɔ su yoman sɔ kun? ?Sɛ i janvuɛ wie ti yɛ ɔ yoli sa tɛ’n, ɔ nin i janvuɛ sɔ’n b’a titi nun? Ndɛ sɔ’n i siesielɛ nun’n, asɔnun kpɛnngbɛn’m be srɛ Zoova tankaan kpa. Asa’n, be fa be ɲin be sie i sa sɔ’n i su ndɛ nga Biblu’n kan’n i su kpa. Kpɛkun be fa be ɲin be sie i sran ng’ɔ yoli sa tɛ’n i ayeliɛ’n su wie. I sin’n, be nian sɛ ɔ kwla ka asɔnun’n nun titi-o. Sɛ bé nían naan ɔ fata kɛ be tu i asɔnun’n nun’n, be tu i.—1 Kor. 5:11-13.

13. ?Kɛ be tu e janvuɛ annzɛ e osufuɛ wie asɔnun’n nun’n, ɔ ju wie’n ngue ndɛ yɛ e kan-ɔn?

¹³ ?Blɛ benin nun yɛ ajalɛ nga asɔnun kpɛnngbɛn’m be fa’n i su nantilɛ’n kwla yo kekle e sa nun-ɔn? Sɛ be tuli aniaan kun asɔnun’n nun naan aniaan sɔ’n timan e janvuɛ annzɛ e osufuɛ’n, ajalɛ sɔ’n i su falɛ’n timan kekle. Sanngɛ sɛ bé sé bé sé naan aniaan sɔ’n ti e janvuɛ annzɛ e osufuɛ’n, ajalɛ sɔ’n i su nantilɛ’n kwla yo kekle. E kwla se e wun kɛ asɔnun kpɛnngbɛn’m b’a faman be ɲin b’a siemɛn i ndɛ’n i ngbɛsungbɛsu kwlaa su naan b’a fa ajalɛ. Annzɛ kusu e kwla se kɛ b’a diman ndɛ’n kɛ nga Zoova fa klo’n sa. ?I lɛ nun’n, ngue yɛ ɔ kwla uka e naan y’a nanti ajalɛ sɔ’n su-ɔ?

14. ?Sɛ be tu e janvuɛ annzɛ e osufuɛ wie asɔnun’n nun’n, ngue yɛ ɔ kwla uka e naan y’a nanti ajalɛ sɔ’n su-ɔ?

¹⁴ Sɛ be tu e janvuɛ annzɛ e osufuɛ wie asɔnun’n nun’n, nán e wla fi su kɛ Zoova yɛ ɔ seli kɛ be tu sa tɛ yofuɛ mun asɔnun’n nun-ɔn. Asa ekun’n, asɔnun nunfuɛ’m be ɲan su ye yɛ sran ng’ɔ yoli sa tɛ’n bɔbɔ ɔ ɲan su ye wie. Sɛ aniaan kun yo sa tɛ dan wie naan be tumɛn i asɔnun’n nun’n, i nzuɛn tɛ’n kwla sa aniaan onga mun. (Gal. 5:9) Asa ekun’n, ɔ su wunmɛn i wlɛ kɛ like ng’ɔ yoli’n ti tɛ. Ɔ maan ɔ su miɛnmɛn i ɲin kacimɛn i akunndan’n nin i ayeliɛ’n naan Zoova i klun w’a jɔ i wun. (Aku. 8:11) Nán e wla fi su kɛ kwlaa naan asɔnun kpɛnngbɛn’m b’a fa ajalɛ kɛ be tu aniaan kun asɔnun’n nun’n, be bu i sin kpa. Afin nán ajalɛ kaan-ɔn. Asa’n, kɛ laa Izraɛli lɔ jɔlɛ difuɛ’m be sa’n, be wun i wlɛ kɛ ‘nán sran dunman nun yɛ be di jɔlɛ’n niɔn. Sanngɛ be di i Zoova dunman nun.’—2 Nyo. 19:6, 7.

SƐ E LAFI ZOOVA SU DƆ NGA SU’N É LÁFI I SU E ƝRUN LƆ WIE

15. ?Ngue ti yɛ ɔ ti cinnjin kɛ e lafi Zoova su kpa tra laa’n niɔn?

¹⁵ Mɛn’n i awieliɛ’n w’a mantan koko kpa. I sɔ’n ti’n, ɔ fata kɛ e lafi Zoova su kpa tra laa’n. Kɛ ɲrɛnnɛn dan’n wá bó i bo’n, anuannzɛ’n wá fá ajalɛ wie mun. Atrɛkpa’n, e su wunman ajalɛ sɔ’m be wlɛ kpa annzɛ é bú i kɛ be su falɛ yo ya. Blɛ sɔ’n nun’n, Zoova su sinman e tinuntinun e su naan w’a kle e like ng’ɔ fata kɛ e yo’n. Sanngɛ i janunfuɛ nga be o asiɛ’n su wa’n be lika yɛ ɔ́ sín-ɔn. Ɔ maan blɛ sɔ nun’n, ɔ fataman kɛ e usa e wun kɛ ‘?Ajalɛ nga be fali’n fin Zoova sakpa? ?Annzɛ be bɔbɔ yɛ be kpɛli be ti nun-ɔn?’ Sɛ e kunndɛ kɛ é wún i wlɛ sɛ blɛ sɔ’n nun’n é láfi Zoova nin i janunfuɛ’m be su’n, ɔ fata kɛ e bu wafa nga e nanti ajalɛ nga anuannzɛ’n fa be dɔ nga su’n i akunndan. Kɛ anuannzɛ’n fa ajalɛ’n, sɛ e sisiman e bo naan y’a nanti su’n, e kwla lafi su kɛ ɲrɛnnɛn dan’n nun’n é yó like kunngba’n.—Lik. 16:10.

16. ?E ɲrun lɔ sa benin yɛ ɔ kwla yo maan e su lafiman Zoova su kun-ɔn?

¹⁶ Aamagedɔn alɛ’n nun’n, Zoova wá dí sran’m be jɔlɛ. Blɛ sɔ’n nun’n like nga é wá yó’n, maan e bu i akunndan e sie. Dɔ nga su’n, e lafi su kɛ e osufuɛ nga be suman Zoova’n nin sran uflɛ ekun bé sú i ka naan mɛn’n w’a wie. Sanngɛ kɛ Aamagedɔn alɛ’n wá jú’n, Zoova wá sé Zezi kɛ ɔ di be kwlaa nga be sumɛn i’n be jɔlɛ. (Mat. 25:31-33; 2 Tes. 1:7-9) Blɛ sɔ’n nun’n, nán e yɛ é klé Zoova i sran ng’ɔ fata kɛ ɔ si i aunnvɔɛ annzɛ ɔ fataman kɛ ɔ si i aunnvɔɛ’n niɔn. (Mat. 25:34, 41, 46) ?Sɛ Zoova di sran kun i jɔlɛ naan ɔ timan e liɛ su’n, é láfi i su titi? ?Annzɛ é sé kɛ e sumɛn i kun? Maan dɔ nga su e yo like kwlaa nga e kwla yo naan y’a lafi Zoova su tankaan kpa’n. I liɛ’n e ɲrun lɔ’n, é láfi i su kpa wie.

17. ?Kɛ Zoova wá dí sran’m be jɔlɛ’n, i su ye benin yɛ é wá ɲɛ́n i-ɔ?

¹⁷ Kɛ Zoova wá dí sran’m be jɔlɛ’n, i su ye nga é wá ɲɛ́n i’n maan e bu i akunndan. Blɛ sɔ’n nun’n, Ɲanmiɛn sulɛ wafa nga be timan su’n be su tranman lɛ kun. Asa’n, mɛn’n nun aata difuɛ dandan mɔ be bu sran’m be lufle’n ɔ nin mɛn siefuɛ mɔ be mianmian sran mun’n be su tranman lɛ kun. Tukpacɛ’n nin kpɛnngbɛn yolɛ’n nin wie’n be su tranman lɛ kun. Asa’n, Zoova wá wlá Satan nin i mmusu’m be bisua afuɛ akpi. Kpɛkun ɔ́ wá núnnún be ɲin kekle’n i sin sa’m be kwlaa. (Ngl. 20:2, 3) Blɛ sɔ’n nun’n, é wá dí aklunjɔɛ dan afin e lafili Zoova su.

18. ?Ngue yɛ Izraɛlifuɛ’m be su ndɛ ng’ɔ o Kalɛ 11:4-6 nin 21:5 nun’n ɔ kle e-ɔ?

¹⁸ Kɛ é wá jú mɛn klanman’n nun lɔ’n, atrɛkpa’n sa wie’m be ti’n e nun wie’m be su lafiman Zoova su kun. Sa ng’ɔ juli Izraɛlifuɛ’m be su’n kle kɛ sɛ y’a nianman e wun su’n e kwla yaci Zoova i su lafilɛ. Kɛ Zoova fali be Ezipti lɔ fiteli’n, be wa ijɔli be konviabo. Be waan ngue ti yɛ be ɲanman aliɛ nga be di be Ezipti lɔ’n be kun-ɔn. Kpɛkun b’a buman manin mɔ Zoova fa mannin be’n i like fi kun. (An kanngan Kalɛ 11:4-6; 21:5 nun.) Atrɛkpa’n, kɛ ɲrɛnnɛn dan’n wá wíe’n sran wie’m bé wá yo sɔ wie. Afin blɛ sɔ’n nun’n lika’n wá yó sukusuku. Ɔ maan é wá dí junman kekle naan asiɛ’n w’a yo sanwun. Junman’n wá sɔ́n, yɛ atrɛkpa’n i klikli’n nun’n lika’n wá yó kekle e su. ?Blɛ sɔ’n nun’n, é íjɔ e konviabo? ?É plán Zoova su? Sɛ dɔ nga su e klun jɔ like nga Zoova man e’n su’n, e ɲrun lɔ’n e klun jɔ́ like nga ɔ́ fá mán e’n su wie.

19. ?Ngue yɛ e wunnin i like suanlɛ nga nun-ɔn?

¹⁹ Maan e lafi su kpa kɛ Zoova yo sa kpa titi. Kpɛkun maan e lafi be nga Zoova sin be lika kle e atin’n be su titi. Asa’n, nán e wla fi ndɛ yɛ mɔ Zoova sinnin i nuan ijɔfuɛ Ezai i lika kannin’n i su. Ɔ seli kɛ: “Sɛ amun gua amun wla ase, yɛ sɛ amun lafi min su’n, yɛ amún ɲán wunmiɛn-ɔn.”—Eza. 30:15.