?Biblu’n kwla uka awlobo mun naan b’a di aklunjɔɛ?

Ndɛ nga Biblu’n kan’n

Ɛɛn. Biblu’n nun afɔtuɛ’m be ukali yasua nin bla miliɔn kpanngban naan b’a di aklunjɔɛ be awlobo’n nun. Afɔtuɛ sɔ’m be nun wie mun yɛ:

1. Amun ja awa’n i ɲrun. Kɛ yasua kun nin bla kun be ja awa’n i ɲrun’n, be ta be wiengu nda kɛ bé trán lele be wie cɛn. I sɔ’n kusu yo maan be di aklunjɔɛ be awlobo’n nun.—Matie 19:4-6.

2. An klo amun wiengu yɛ an bu amun wiengu sran. Yɛle kɛ wafa nga amun kunndɛ kɛ be nin amun tran’n, maan amun nin amun wiengu kun’n be tran sɔ wie.—Matie 7:12; Efɛzifuɛ Mun 5:25, 33.

3. Nán amun kan ndɛ tɛtɛ kle amun wiengu. Amun kan ndɛ wɛtɛɛ su. Kannzɛ bɔbɔ amun wiengu’n loli amun ngasi’n, amun yo sɔ titi. (Efɛzifuɛ Mun 4:31, 32) Ɲanndra Mun 15:1 nun’n, Biblu’n se kɛ: “Kɛ a tɛ sran su amanniɛn su’n, ɔ guɛ i ya’n i ase, sanngɛ be nuan nun ndɛ ng’ɔ yra fiaan’n, ɔ klɔklɔ ya.”

4. Nán amun kunndɛ bla annzɛ bian amun wiengu bo. Amun yi annzɛ amun wun kunngba cɛ yɛ ɔ fata kɛ amun nin i be tra ndalie annzɛ be si sua-ɔ. (Matie 5:28) Biblu’n se kɛ: “Maan sran’m be kwlaa be bu aja’n i like dan. Yɛ maan be nga b’a ja bla annzɛ bian’n be aja’n yo sanwun titi.”—Ebre Mun 13:4.

5. Amun ta amun mma mun klolɛ su. Nán amun di be ba ngboko, kusu nán amun yo be kpokokpoko.—Ɲanndra Mun 29:15; Kolɔsufuɛ Mun 3:21.