Nán maan e like yolɛ yo ya. A kwla usa ɔ wun kɛ: ‘?Sran’m be bu i kɛ min like yolɛ yoman ya? ?Annzɛ be bu i kɛ n ti sran kun mɔ be bli-ɔ ɔ bliman-ɔn??N sie min su min wiengu’m be nuan bo? ?Yɛ sɛ ɔ nin i fata’n n yo be liɛ nga be se min kɛ n yo’n?’ Sɛ e like yolɛ yoman ya’n, é klé kɛ e nian Zoova nin Zezi be ajalɛ’n su. Kɛ e su sa’m be kaci’n ɔ fata kɛ e kle kɛ e like yolɛ yoman ya. Sa wie mɔ y’a sunnzunman’n be kwla tɔ e su. I wie yɛle kɛ tukpacɛ kekle wie w’a tɔ e su, annzɛ kan e tran lɛ’n sika ndɛ’n kwla yo kekle, annzɛ politiki ndɛ’n ti’n lika’n kwla yo sukusuku. (Aku. 9:11) Asa’n sɛ e di junman wie anuannzɛ’n nun naan be se e kɛ e yaci junman sɔ’n i dilɛ, annzɛ e kaci wafa nga e di junman sɔ’n ɔ kwla yo kekle man e. Maan e kan ninnge nnan mɔ kɛ e su sa’m be kaci’n e kwla yo naan y’a jran kekle’n be ndɛ. (1) Maan e wun i wlɛ kɛ e su sa’n w’a kaci, (2) maan e fa e ɲin e sie i ninnge nga e kwla yo be’n be su, (3) maan e fa e ɲin e sie i ninnge nga be man e aklunjɔɛ’n su, (4) maan e yo e wiengu’m be ye. w23.07 21-22 § 7-8

I nun mɔ Babilɔnifuɛ’m bé fá Daniɛli Zerizalɛmun lɛ bé kɔ́ Babilɔnin’n, nn ɔ te yo gbanflɛn kan. Sanngɛ Babilɔnifuɛ’m be sieli i nzɔliɛ kɛ Daniɛli ti i liɛ ngunmin. Be fali be ɲin be sieli i “like nga [be] ɲinma tɛ i’n” su. Yɛ be wunnin kɛ lɛ fi kaan sa nunmɛn i wun naan ɔ ti klanman naan kusu’n be osu’n nun be ti wlengbi. (1 Sam. 16:7) I kwlaa sɔ’n ti’n, Babilɔninfuɛ’m be kleli i like naan ɔ di junman be famiɛn’n i awlo’n nun. (Dan. 1:​3, 4, 6) Zoova kloli Daniɛli. Daniɛli i nzuɛn kpa’n i ti yɛ ɔ kloli i-ɔ. I kpa bɔbɔ’n Zoova seli kɛ Daniɛli ti kɛ Nowe nin Zɔbu be sa. Zoova i sufuɛ sɔ mun’n, be miannin be ɲin kpa naan be nin i be afiɛn w’a mantan. Kɛ Zoova kán ndɛ sɔ’n nn atrɛkpa’n Daniɛli le afuɛ 20 annzɛ 20 tra su kan. (Bob. 5:32; 6:​9, 10; Zɔb. 42:​16, 17) Zoova kloli Daniɛli lele Daniɛli fa wuli.—Dan. 10:​11, 19. w23.08 2 § 1-2

Sɛ amun kunndɛ kɛ amún tó sua kun’n, saan amún nían sua’n i wafa ng’ɔ ti’n i kpa. Kɛ é kánngan Biblu’n nun annzɛ é súan nun like’n, i sɔ wie yɛ ɔ fata kɛ e yo-ɔ. Sɛ e kanngan nun ndɛndɛ’n, “Ɲanmiɛn i ndɛ’n i bo bolɛ ninnge mun” be ngunmin yɛ é sí be-ɔ. (Ebr. 5:12) I sɔ’n ti’n, maan e bo e ɲin ase e niannian Biblu’n nun kpa, kɛ y’a wlu sua kun mɔ e waan é tó’n i nun sa. Kɛ é súan nun like’n, maan e wun wafa nga ndɛ’m be sasa be wiengu su’n. Sɛ e mian e ɲin naan e wun like nga e lafi su’n i wlɛ’n, ɔ ti kpa. Sanngɛ maan e si sa nga ti yɛ e lafi ndɛ sɔ’m be su’n. Sɛ e waan é wún Ɲanmiɛn Ndɛ’n i ngbɛsungbɛsu’n kwlaa’n i wlɛ’n, maan e bo e ɲin ase e suan Biblu’n nun ndɛ nga be bo ti kploun’n be su like kpa. I sɔ yɛ akoto Pɔlu wlɛli i niaan Klisifuɛ’m be fanngan kɛ be yo-ɔ. I liɛ’n ‘bé wún i wlɛ kpa kɛ ndɛ nanwlɛ’n ti tɛtrɛ, ɔ ti tɛnndɛn, ɔ ti nglonglo, yɛ i bo ti kploun.’ Kpɛkun ‘bé yó kɛ waka mɔ i bo olui’n w’a tra ase kpa’n sa, yɛ bé jrán kekle kpa.’ (Efɛ. 3:​14-19) Ɔ ti cinnjin kɛ e fa Pɔlu i afɔtuɛ sɔ’n su. w23.10 18 § 1-3