BO MUN

Sa ng’ɔ ju bo’m be su’n

Afuɛ nuan kwlakwla’n, fie dilɛ nin ninnge uflɛ wie’m be yolɛ’n ti’n, be kpɛ waka miliaa kaka be bo. Sɛ be bu mɛn wunmuan’n nun bo’m be nun nɲɔn’n, kɛ ɔ fɛ i afuɛ 1940 nun m’ɔ́ fá ju andɛ’n i bue kun w’a nunnun.

Kɛ be nunnun bo kun’n, ninnge kwlaa nga bo sɔ’n ti’n e kwla ɲan be’n be kwlaa be kusu be nunnun.

Wafa nga Ɲanmiɛn yili asiɛ’n ti’n ɔ kwla sin i osu laa’n nun ekun

Sɛ be nunnun bo kun mlɔnmlɔn’n, kɛ ɔ́ cɛ́ kɔ́’n lika sɔ’n kwla sɛ i sin kaci bo ekun kpɛkun ɔ trɛ bɔbɔ. Koko nun wa’n, siansifuɛ wie’m be sieli i nzɔliɛ kɛ lika nga waka nunman lɛ kun’n, waka’m be kwla fifi lɛ kpɛkun ɔ kaci bo ekun. Maan e fa e ɲin e sie i sa nga’m be su.

• Fluwa sifuɛ wie’m be fali be ɲin sieli i lika nga be dili fie lɛ laa mɔ b’a diman fie lɛ kun’n be su kpa. Be niannin lika ko ju 2.200 mɔ be o Amlɛnkɛn nin Sran Ble mɛn’n i wia afiliɛ lika’n nun lɔ’n be su. Be wunnin i kɛ sɛ be yaci be lɛ lele afuɛ blu’n, waka’m be kwla fifi lɛ kpa ekun.

• Siansifuɛ’m be fluwa kun seli kɛ sɛ be yaci lika kun lɛ naan ɔ di afuɛ 100 kun, ɔ kwla sɛ i sin kaci bo mɔnnɛn ekun.

• Koko nun wa’n, siansifuɛ wie mɔ be o Brezili lɔ’n be fali lika nga sran yoman like fi lɛ’n be sunnzunnin lika nga sran’m be ta waka mun lɛ’n be niannin. Be waan bé nían lika nga waka’m bé wá sɔ́n lɛ ndɛndɛ’n.

• Fluwa kun kannin like nga siansifuɛ sɔ’m be yoli’n i ndɛ seli kɛ: “Be wa wunnin i wlɛ kɛ ɔ nunman nun kɛ sran’m be kle be wun yalɛ be ta waka mun lika nga waka nunman lɛ’n.” Afin kɛ ɔ dili afuɛ nnun’n, ‘waka’m be fifili lɛ ndɛndɛ trali lika nga sran’m be tali waka mun lɛ’n.’

Like nga sran’m be yo’n

Mɛn wunmuan’n nun’n, sran’m be mian be ɲin be sasa bo nga be te ka lɛ’n. Asa’n be ta waka mun lika nga bo nunman lɛ kun’n. Nvle’m be anuannzɛ nga be flɛ i kɛ ONU seli kɛ i sɔ mɔ be yoli ti’n afuɛ 25 nga be sinnin lɛ’n be nun’n, “sran’m b’a saciman bo mun kun kɛ laa’n sa.”

Sanngɛ i kwlaa sɔ’n su kwlá sasaman bo mun. Anuannzɛ kun m’ɔ nian mɛn’n wunmuan’n nun bo’m be su’n seli kɛ: “Afuɛ nga be sinnin lɛ’n be nun’n, mɛn wunmuan nun bo’m be su w’a kpɛ kpa.”

Susute nga be fia be kpɛ waka mun be yo i atɛ’n be ɲan nun sika miliaa kpanngban kpa. I sɔ mɔ be yo’n ti yɛ bo’n wie ndɛndɛ’n niɔn.

Ndɛ nga Biblu’n kan m’ɔ gua e awlɛn su nzue’n

“Ɲanmiɛn Zoovaa yoli maan waka fanunfanun kwlaa nga be wun be-ɔ be klo be’n, mɔ kusu be mma’m be yo fɛ’n, be fifili fie klanman kpa sɔ’n nun.”—Bo Bolɛ 2:9.

Wafa nga Ɲanmiɛn yili bo mun’n ti’n, sɛ be nunnun bo kun lika kun’n, lika sɔ’n kwla sɛ i sin kaci bo ekun. Ɔ yoli sɔ naan ɔ́ sásá bo mun nin be nun ninnge mun naan nán be wie mlɔnmlɔn.

Biblu’n kle kɛ Ɲanmiɛn su yaciman klunwifuɛ’m be lɛ naan be saci asiɛ’n nin i su ninnge mun mlɔnmlɔn. An nian ndɛ akpasua nga be flɛ i kɛ “Ɲanmiɛn tali nda kɛ asiɛ’n yó kpa ekun” nun. Ɔ o fluwa nga i bue 15 su.