B’A UKA NINNGE’M BE GUA’N SU ?É YÓ I SƐ?
Nán maan ɔ bo ɔ nuan
Kɛ be uka ninnge’m be gua’n su kannganngan’n, wie liɛ’n e siemɛn i nzɔliɛ. I li sɛ e junman su lɔ’n, be uka e akatua’n su wie’n, yɛ e siemɛn i nzɔliɛ kpa-ɔ. Sanngɛ sɛ be uka ninnge’m be gua’n su naan be ukaman e akatua’n su wie’n, e kwla koko dan. I li sɛ e le awlobo’n, yɛ e wla guaman ase bɔbɔ’n niɔn.
E kwlá yoman like fi naan sran’m b’a ukaman ninnge’m be gua’n su. Sanngɛ sɛ e wun i wlɛ kɛ sran’m bé úka ninnge’m be gua’n su’n, é ɲán su ye kpa.
LIKE NGA TI YƐ I SƆ’N TI CINNJIN’N
Be nga be wun i wlɛ kɛ bé úka ninnge’m be gua’n su’n, . . .
be wla gua ase. Kɛ sran kun i wla gua ase’n, ɔ kwla bu akunndan kpa, yɛ ɔ fa ajalɛ kpa.
be yo ninnge mun ngwlɛlɛ su. I wie yɛle kɛ be mian be ɲin be tannin be su kalɛ mun, kpɛkun be saciman be sika’n.
be nin be awlofuɛ’m be kanman sika ti ndɛ.
be fa ajalɛ wie mun naan b’a yo be sika’n i cɛcɛ. I wie yɛle kɛ be to ninnge nga be sa miɛn i wun sakpa’n.
LIKE NGA A KWLA YO’N
Fa akunndan nanti. Blɛ mɔ be uka ninnge’m be gua’n su dan’n, sran ng’ɔ ti akunndanfuɛ’n ɔ yo i sika’n i cɛcɛ. Sran wie’m be tɔtɔ ninnge’m be su sa yɛ be to be-ɔ. Kpɛkun kasiɛn su’n ɔ mian be sa. Sɛ be uka ninnge’m be gua’n su’n, a kwla koko ɔ awlobofuɛ’m be ti. I sɔ liɛ’n ti su. Sanngɛ nán ɔ wla fi ndɛ nga su. Like ng’ɔ ti cinnjin kpa man ɔ awlofuɛ mun’n, yɛle kɛ a kle be kɛ a klo be yɛ a fa blɛ naan a nin be yo ninnge mun likawlɛ.
Sɛ a tɔtɔ ninnge’m be su sa to be’n, kasiɛn su’n ɔ́ mían ɔ sa.