Zan kunndɛ kɛ ɔ́ tí Zezi i su ndɛ

Be wlali Zan Batɛmun yofuɛ’n i bisua ɔ su wa di afuɛ kun. Ɔ nin i sɔ ngba’n, ɔ tili abonuan sa nga Zezi yoli be’n. Ɔ maan kɛ i sɔnnzɔnfuɛ’m be seli i kɛ Zezi cɛnnin angbeti kun m’ɔ o Nainin lɔ’n i wa’n, ɔ yoli i fɛ dan. Sanngɛ sɛ Zezi yɛ ɔ ti Mesi’n sakpa-o annzɛ sɛ nɛ́n i-o, Zan kunndɛ kɛ Zezi bɔbɔ kɛn i trele kle i. I sɔ’n ti’n, ɔ sunmɛnnin i sɔnnzɔnfuɛ’m be nun nɲɔn naan be ko usa Zezi kɛ: “?Sran nga be seli kɛ ɔ́ bá’n yɛle wɔ annzɛ kusu ɔ fata kɛ e minndɛ sran uflɛ?”​​—Liki 7:19.

Kosan nga Zan usɛli i lɛ’n kwla bo ɔ nuan. Afin Zan ti Ɲanmiɛn sufuɛ kpa. Asa ekun’n, kɛ ɔ́ yó Zezi batɛmun i afuɛ nɲɔn yɛ’n, ɔ wunnin kɛ Ɲanmiɛn wawɛ’n jrali Zezi su. Cɛn sɔ’n nun’n, Zan tili Ɲanmiɛn bɔbɔ i nɛn’n. Ɲanmiɛn seli kɛ i klun jɔ Zezi wun. E kwlá seman kɛ Zan lafiman Ɲanmiɛn su kpa kun. Afin sɛ ɔ ti kɛ Zan lafiman Ɲanmiɛn su kpa’n, nn Zezi w’a bomɛn i dunman fɛ. ?Sɛ ɔ ti sɔ’n niɔn, ngue ti yɛ Zan usali kosan sɔ’n niɔn?

Zan kunndɛ kɛ Zezi bɔbɔ se i kɛ i yɛ ɔ ti Mesi’n niɔn. I sɔ’n wlɛ́ i fanngan naan w’a kwla trɛ i awlɛn bisua lɔ. Sanngɛ atrɛkpa’n, sa kun ekun ti yɛ ɔ usali kosan sɔ’n niɔn. Ɲanmiɛn ndɛ’n seli kɛ Sran nga Ɲanmiɛn kpɛli i’n, ɔ́ wá yó famiɛn kpɛkun ɔ́ dé sran mun. Zan si ndɛ sɔ’n. Sanngɛ kɛ be yoli Zezi i batɛmun’n, w’a di anglo kpanngban kpa. Yɛ i bɔbɔ kusu te o bisua. Ɔ maan sɛ sran uflɛ yɛ ɔ́ wá bá naan ɔ́ gúa junman ng’ɔ fata kɛ Mesi’n di’n i bo-o, i sɔ’n ti yɛ ɔ usali sɔ-ɔ.

Zezi w’a tɛman Zan i sɔnnzɔnfuɛ’m be su ngbɛn kɛ: ‘Min yɛ n ti Sran ng’ɔ fata kɛ ɔ bla’n niɔn.’ Sanngɛ ɔ kleli be ninnge wie mɔ be kle kɛ Ɲanmiɛn yɛ ɔ sunmɛnnin i-ɔ. I wie yɛle kɛ ɔ yoli sran mɔ tukpacɛ wafawafa kwlaa o be su’n, be juejue. Kpɛkun ɔ seli Zan i sɔnnzɔnfuɛ’m be kɛ: “Amun wɔ ko kan ndɛ nga amun ti i yɛ’n, ɔ nin like nga amun wun i yɛ’n be kle Zan: Aɲinsifuɛ’m be wun ase siɛn’n, be nga be ja timan kpa’n be nanti, kokowefuɛ’m be yo juejue, sutrefuɛ’m be ti sa, be nga be wuli’n be jaso, kpɛkun be bo jasin fɛ’n be kle yalɛfuɛ mun.”​​—Matie 11:4, 5.

Atrɛkpa’n, kosan nga Zan usɛli i lɛ’n kle kɛ ɔ kunndɛ kɛ Zezi yo abonuan sa kun naan ɔ fin bisua lɔ fite. Sanngɛ wafa nga Zezi tɛli i su’n kle kɛ ɔ su yoman sɔ.

Kɛ Zan i sɔnnzɔnfuɛ’m be ɔli’n, Zezi seli be nga be o lɛ’n be kɛ Zan i dan tra Ɲanmiɛn nuan ijɔfuɛ. Afin Zan yɛ ɔ ti Zoova i “ndolo bofuɛ’n,” mɔ be kɛnnin i ndɛ Malasi 3:1 nun’n niɔn. Asa ekun’n, i yɛ ɔ ti Ɲanmiɛn nuan ijɔfuɛ Eli mɔ Malasi 3:23 nin 24 kɛnnin i ndɛ’n niɔn. I sɔ’n ti’n, Zezi seli kɛ: “Nanwlɛ, ń kán klé amun kɛ be kwlaa nga bla wuli be’n, be nun wie fi w’a jasoman su mɔ i dan tra Zan Batɛmun yofuɛ’n niɔn. Sanngɛ sran ng’ɔ ti kaan ɲanmiɛn su lɔ Famiɛn diwlɛ’n nun’n, i dan trɛ i.”​​—Matie 11:11.

Zezi i ndɛ sɔ’n kle kɛ Zan su tranman be nga be nin i bé dí famiɛn ɲanmiɛn su lɔ’n, be nun wie. Zan siesieli atin’n mannin Zezi. Sanngɛ ɔ wuli ka naan Klisi w’a tike ɲanmiɛn su lɔ kɔlɛ’n i atin’n. (Ebre Mun 10:19, 20) Zan yoli Ɲanmiɛn nuan ijɔfuɛ kpa. Ɔ suli Ɲanmiɛn lele guɛli i ti nin i bo. Ɔ maan ɔ́ wá trán be nga asiɛ’n yó be liɛ’n, be nun wie.