?Wan yɛle Sran wa’n?

Zezi nin i sɔnnzɔnfuɛ’m be ɔli Bɛtsaida. Kɛ be juli lɔ’n, sran’m be fali bian kun be blɛli i. Bian sɔ’n ti aɲinsifuɛ. Kpɛkun be srɛli Zezi kpa kɛ ɔ kɛn i naan ɔ yo juejue.

Zezi trali aɲinsifuɛ’n i sa’n, kpɛkun ɔ fɛ i ɔli klɔ’n i sin lɔ. Ɔ tili i nuan nzue tɛli i ɲinma’m be su naan w’a usɛ i kɛ: “?A wun like?” Bian’n tɛli i su kɛ: “N wun sran mun. Sanngɛ be ti kɛ waka wie mun yɛ be su nanti sa.” (Marki 8:23, 24) Zezi fɛli i sa fuali bian’n i ɲinma’m be su. Kpɛkun ɔ wunnin ase weiin. I sin’n, ɔ mɛnnin i atin kɛ ɔ wɔ awlo. Sanngɛ ɔ seli i kɛ nán ɔ wlu klɔ’n nun.

Zezi nin i sɔnnzɔnfuɛ’m be jasoli lɛ, be ɔli Sezare Filipu mɛn’n i klɔ kun su. Klɔ sɔ’n nin lika nga be o lɛ’n be afiɛn ti nun kilo ablanan (40). Kpɛkun ɔ o lika nglonglo kun su. Ɛrmɔn oka’n wo oka sɔ’n i sin lɔ. Ɛrmɔn oka’n ti nglonglo trɛ i, kpɛkun laglasi gua su. Sɛ sran kun waan ɔ́ kɔ́ lɔ’n, sɛ w’a cɛman atin’n su mlɔnmlɔn’n yɛle cɛn ba nɲɔn.

Atin su’n, Zezi cuɛnnin i wun kan ɔ ko srɛli Ɲanmiɛn. Ɔ ka anglo ngwlan annzɛ blu cɛ bé kún i. Ɔ maan ɔ kokoli i sɔnnzɔnfuɛ mun. Afin be nun sunman be yacili i su sulɛ. Wie’m be kusu be akunndan’n ti nɲɔnnɲɔn annzɛ be sa sin w’a bubu be. Atrɛkpa’n, kɛ mɔ Zezi w’a kplinman su kɛ nvlefuɛ’m be sie i famiɛn’n ti’n, i sɔnnzɔnfuɛ sɔ’m be sa sin bubuli be. Annzɛ kɛ mɔ w’a kplinman su kɛ ɔ́ yó abonuan sa kun ɔ́ fá klé kɛ ɔ ti Ɲanmiɛn wa’n, i ti-ɔ.

Zezi i sɔnnzɔnfuɛ’m be toli i lika nga ɔ su srɛ Ɲanmiɛn’n i nun lɔ. Ɔ usali be kɛ: “?Sran’m be waan wan yɛle Sran wa’n?” Be tɛli i su kɛ: “Wie’m be waan Zan Batɛmun yofuɛ’n yɛle wɔ. Sanngɛ wie’m be kusu be waan Eli yɛle wɔ, yɛ wie mun ekun be waan Zeremin yɛle wɔ, annzɛ Ɲanmiɛn nuan ijɔfuɛ’m be nun kun yɛle wɔ.” Sran wie’m be bu i kɛ lalafuɛ sran nga be wuli’n be nun kun yɛ Ɲanmiɛn w’a cɛn i-ɔ, naan yɛle Zezi. Zezi kunndɛli kɛ ɔ́ sí sɔnnzɔnfuɛ’m be klun ndɛ. I sɔ’n ti’n, ɔ usali be kɛ: “?Sanngɛ amun liɛ’n, amun waan wan yɛle min?” Simɔn Piɛli tɛli su ndɛndɛ kpa seli kɛ: “Klisi’n yɛle wɔ, a ti Ɲanmiɛn m’ɔ lafiman’n i Wa.”​—Matie 16:13-16.

Zezi waan Piɛli liɛ su ti ye, afin Ɲanmiɛn yɛ ɔ yili ndɛ sɔ’n i nglo kleli i-ɔ. Ɔ kan guali su kɛ: “Ń kán klé wɔ kɛ: A ti Piɛli, yɔbuɛ tanda nga su yɛ ń kplán min asɔnun’n niɔn, yɛ Ndia’n i anuan’m be su kwlɛmɛn i.” Zezi i ndɛ sɔ’n kle kɛ i bɔbɔ Zezi wá kplán asɔnun kun naan be nga be su Ɲanmiɛn kpa lele guɛ i ti nin i bo’n, be su kaman Ndia’n nun. I sin’n, ɔ tali Piɛli i nda seli kɛ: “Ń fá ɲanmiɛn su lɔ Famiɛn diwlɛ’n i lakle mun ń mán wɔ.”​—Matie 16:18, 19.

Nán kɛ Zezi su se kɛ i akoto’m be nun sran dan kpafuɛ’n yɛle Piɛli, naan Piɛli su yɛ ɔ́ kplán i asɔnun’n niɔn. Afin i bɔbɔ Zezi yɛ ɔ ti Yɔbuɛ nga asɔnun’n táká su’n niɔn. (1 Korɛntifuɛ Mun 3:11; Efɛzifuɛ Mun 2:20) Sanngɛ Zezi wá fá lakle nsan ɔ́ mán Piɛli naan ɔ tike sran wie’m be anuan. Yɛle kɛ ɔ́ mán sran wie’m be atin naan be wlu ɲanmiɛn su lɔ Famiɛn diwlɛ’n nun.

Afuɛ 33 nun’n, Pantekɔtu nun’n, Piɛli fá lakle klikli’n tíke Zuifu mun nin be nga be timan Zuifu’n mɔ be su Ɲanmiɛn kɛ Zuifu mun sa wie’n, be anuan. Yɛle kɛ ɔ́ klé like ng’ɔ fata kɛ sran sɔ’m be yo naan b’a ɲan be ti’n. I sin’n, ɔ́ fá lakle nɲɔn su’n tíke Samarifuɛ nga be lafi Ɲanmiɛn su’n be anuan naan be wlu Ɲanmiɛn Famiɛn diwlɛ’n nun wie. Kasiɛn su’n, ɔ́ fá lakle nsan su’n tíke be nga be timan Zuifu’n, mɔ b’a wlaman be klɛn’n be anuan. Yɛle kɛ afuɛ 36 nun’n, ɔ́ yó naan Kɔɔnɛyi nin i awlobofuɛ mun, ɔ nin i janvuɛ kpa’m be kusu be wlu Ɲanmiɛn Famiɛn diwlɛ’n nun wie.​—Sa Nga Be Yoli’n 2:37, 38; 8:14-17; 10:44-48.

Zezi seli i akoto’m be kɛ bé klé i ɲrɛnnɛn, kpɛkun bé kún i Zerizalɛmun lɔ. Kɛ be tili i sɔ’n, be akunndan sanngannin. Piɛli kusu w’a wunmɛn i wlɛ kɛ, kɛ Zezi wá wú’n, bé cɛ́n i naan ɔ́ kɔ́ ɲanmiɛn su. I sɔ’n ti’n, ɔ fɛ i ɔli aamiɛn naan w’a ko ijɔ i. Ɔ seli i kɛ: “E Min, si ɔ wun aunnvuɛ! Sa sɔ’n su juman ɔ su mlɔnmlɔn.” Sanngɛ Zezi kacili i sin sili Piɛli, yɛ ɔ seli i kɛ: “Sin min sin lɔ, Satan! A su tanndan min ɲrun, afin akunndan nga a bu’n, ɔ timan Ɲanmiɛn liɛ’n su. Sanngɛ klɔ sran akunndan yɛ a bu-ɔ.”​—Matie 16:22, 23.

Kɛ ɔ yoli sɔ’n, Zezi flɛli sran kpanngban nga be o lɛ’n nin i akoto mun. Kpɛkun ɔ seli be kɛ sɛ sran kun waan ɔ́ sú i su’n, ɔ su yoman pɔpɔ mɛnmɛn i. I waan: “Sɛ sran kun waan ɔ́ sú min su’n, maan ɔ klɛn i wun yɛ maan ɔ fɛ i ɲrɛnnɛn waka’n naan ɔ su min su titi. Afin sran ng’ɔ kunndɛ kɛ ɔ́ sɛ́sɛ́ i nguan’n, i nguan’n fí i sa. Sanngɛ sɛ min nin jasin fɛ’n ti’n, sran kun i nguan’n fi i sa’n, ɔ́ ɲɛ́n i ekun.”​—Marki 8:34, 35.

Ndɛ nga Zezi kɛnnin i lɛ’n kle kɛ ɔ fata kɛ i sɔnnzɔnfuɛ’m be yo yakpafuɛ naan be klɛn be wun be mɛn i. I liɛ’n, Zezi i klun jɔ́ be wun. Zezi seli ekun kɛ: “Mɛn nga mɔ i nunfuɛ’m be kpɔci Ɲanmiɛn mɔ be yo sa tɛ nun yɛ’n i nun’n, sran nga ɲannzuɛn kun i min nin min ndɛ’n ti’n, blɛ mɔ Sran wa’n kusu nin i Si i aɲrunɲan’n bá mɔ Ɲanmiɛn i anzi’m bé sú i su’n, ɲannzuɛn wá kún i sran sɔ’n i wun wie.” (Marki 8:38) Blɛ sɔ’n nun’n, kɛ Zezi wá bá’n, “ɔ́ wá nían sran’m be tinuntinun be nzuɛn’n su, kpɛkun ɔ́ yí i nuan like mán be.”​—Matie 16:27.