AKPASUA NNUN

‘Sa ɔ sin ɔ Tafuɛ m’ɔ ti ɔ Sunianfuɛ’n i sin’

?Sa nga e kannin be ndɛ fluwa nga nun’n, be nun kun w’a tɔ ɔ su le? Sɛ ɔ ti sɔ’n, nán ɔ ngunmin ɔn. Kɛ ɔ fɛ i lalafuɛ’n nun lele m’ɔ́ fá jú andɛ’n, sa sɔ’m be tɔli Zoova i sufuɛ kpa kpanngban be su. Sanngɛ, Zoova ukali be naan b’a fin nun b’a fite. Ɔ́ úka ɔ naan a kwla yo sɔ wie.

Sɛ a sa ɔ sin Zoova wun’n, ɔ́ sɔ́ ɔ nun klanman.

SƐ A sa ɔ sin Zoova wun’n, ɔ́ sɔ́ ɔ nun klanman. Ɔ́ úka ɔ naan w’a kwla jran ngokɔɛ’n i ɲrun kekle. Sɛ Klistfuɛ kun bɔbɔ yɛ ɔ loli ɔ ngasi’n, Zoova yó maan ɔ́ sɔ́n ɔ nun. Asa ekun’n, ɔ́ úka ɔ maan ɔ klun akunndan’n su buman ɔ fɔ kun. Yɛ ɔ wla gúa ase. I sɔ’n yó maan á ɲán wunmiɛn naan a nin ɔ wiengu Klistfuɛ’m b’a su Ɲanmiɛn likawlɛ ekun. Á yó kɛ Klistfuɛ klikli wie mɔ akoto Piɛli klɛli fluwa ko mannin be’n sa. Ɔ seli be kɛ: “Laa an ti kɛ bua bɔ b’a bo nzanndri’n sa, sanngɛ siɛn’n amu’an sa amun sin amun Tafuɛ b’ɔ ti amun Sunianfuɛ’n i sin.”—1 Piɛr 2:25.

Ɔ ti cinnjin kpa kɛ a sa ɔ sin Zoova wun. I sɔ’n yɛ ɔ ti ajalɛ kpafuɛ’n niɔn. ?Ngue ti ɔ? Yɛle kɛ sɛ a yo sɔ’n, Zoova i klun jɔ́. (Nyanndra Mun 27:11) A si kɛ ajalɛ nga e fa’n, ɔ kwla yo Zoova i fɛ annzɛ ɔ kwla yo i ya. Sanngɛ, Zoova mianman e kɛ e klo i annzɛ e su i. (Mmla’n 30:19, 20) Bian kun m’ɔ suan Biblu’n i su like’n seli kɛ: “Sran fi kwlá tikeman e awlɛn’n i anuan’n. Saan e bɔbɔ yɛ e kwla yo sɔ ɔ.” Kɛ klolɛ su e fa ajalɛ kɛ é sú Zoova’n, i lɛ’n nun yɛ e tike anuan sɔ’n niɔn. Kɛ e yo sɔ’n, ɔ ti kɛ y’a cɛ Zoova i like cinnjin kpa kun sa. Like sɔ’n yɛle i sulɛ nanwlɛ su’n. Zoova nin sulɛ fata. Nanwlɛ, kɛ e tu e klun e yo sɔ’n, aklunjuɛ nga e di’n, like fi tomɛn i.—Sa Nga Be Yoli’n 20:35; Sa Nglo Yilɛ 4:11.

Aniaan’m be su sɔ Klistfuɛ bla kun mɔ w’a sɛ i sin asɔnun’n nun’n i nun klanman

Asa ekun’n, sɛ a sa ɔ sin yo like kwlaa ng’ɔ fata kɛ Klistfuɛ’m be yo’n ekun’n, á ɲán ninnge ng’ɔ fata kɛ a ɲan be naan a nin Ɲanmiɛn amun afiɛn w’a mantan kpa’n. (Matie 5:3) ?Ngue ti yɛ e se sɔ ɔ? Yɛle kɛ asiɛ wunmuan’n su’n sran’m be usa be wun kɛ: ‘?Ngue ti yɛ e o asiɛ’n su wa ɔ?’ Be kunndɛ kɛ bé sí sa nga ti yɛ e o asiɛ’n su’n. Kɛ mɔ Ɲanmiɛn yili sran’m be sɔ’n i ti yɛ be kunndɛ titi kɛ bé wún sa wie’m be wlɛ’n niɔn. Ɲanmiɛn yili e kɛ e su i naan e di su aklunjuɛ. Kɛ e su Zoova klolɛ su’n, e di aklunjuɛ kpa sakpa. I sɔ aklunjuɛ’n, ɔ leman wunsu.—Jue Mun 63:2-6.

Maan ɔ tran ɔ klun titi kɛ Zoova kunndɛ kɛ a sa ɔ sin i wun. ?Ngue ti yɛ a kwla lafi su sɔ ɔ? Ɔ bɔbɔ nian. E srɛli Zoova kpa naan y’a yi fluwa nga. I sin’n, asɔnun kpɛnngbɛn kun, annzɛ aniaan Klistfuɛ kun fa mannin ɔ. Kpɛkun a kanngannin nun. Yɛ i nun ndɛ’n yoli ɔ fɛ. I kwlaa sɔ’n kle kɛ Zoova i wla w’a fiman ɔ su. Ɔ su uka ɔ blɛblɛblɛ naan a sa ɔ sin i wun.—Zan 6:44.

Kɛ e si kɛ Zoova i wla fimɛn i sufuɛ nga be mlinnin’n be su’n, i sɔ’n wla e fanngan kpa. I wie yɛle aniaan bla kun mɔ be flɛ i Dona’n i liɛ’n. Ɔ seli kɛ: “N yacili nanwlɛ atin’n su falɛ blɛblɛblɛ. Blɛ sɔ’n nun’n, cɛn kunngun’n, min wla kpɛn Jue Mun 139:23, 24 su. Ɔ se kɛ: ‘Ee Nyanmiɛn, nian min anwlɛn nun! Sa min mian! Nian min klun lɔ akunndan’n! Sɛ a nian naan atin nga n wo su’n ti tɛ’n, fa min sie ɔ bɔbɔ wɔ atin liɛ’n su.’ I nun mɔ e nin be nga be suman Zoova’n é sán nun’n, n diman aklunjuɛ kaan sa. N si kɛ Zoova i sufuɛ’m be afiɛn yɛ ɔ fata kɛ n tran ɔn. M m’a wunnin i wlɛ kɛ Zoova i wla w’a fiman min su le. Naan min bɔbɔ yɛ ɔ fata naan n sa min sin i wun ɔn. I sɔ kusu yɛ n yoli ɔ. Ɔ maan siɛn’n, min klun jɔ kpa!”

“M m’a wunnin i wlɛ kɛ Zoova i wla w’a fiman min su le.

É yrá e nuan kɛ a di “aklunjuɛ ng’ɔ fin” Zoova’n ekun. (Neemi 8:10) Sɛ a sa ɔ sin Zoova wun’n, i sɔ’n su yoman ɔ nsisɔ le.

Kosan wie mɔ be nga be kunndɛ kɛ bé sá be sin Zoova wun’n be fa usa be wun’n

?NGUE YƐ Ɔ FATA KƐ N DUN MMUA N YO Ɔ?

Kɛ tukpacifuɛ kun yo juejue’n, ɔ kwlá kaman lɛ yoman ninnge ng’ɔ yo be laa’n kpɛ kunngba. I kunngba’n yɛle sran ng’ɔ kunndɛ kɛ ɔ́ sɛ́ i sin Zoova wun’n i liɛ’n. Blɛblɛblɛ yɛ i wun kwla kpɛjɛ i kpa Zoova i sulɛ’n nun ɔn. I sɔ’n ti’n, nán se kɛ á ká lɛ yó like kwlaa ng’ɔ fata kɛ Klistfuɛ kun yo’n. Bo i bo blɛblɛblɛ. I wie yɛle kɛ, fa blɛ kan cɛn kwlakwla naan kanngan Biblu’n nun annzɛ tie nga be kanngannin’n, annzɛ suan Biblu’n i akua kun nun like. A kwla kɔ e ɛntɛnɛti adrɛsi jw.org su lɔ wie. Asa ekun’n, mian ɔ ɲin kɔ aɲia’m be bo. Like cinnjin kpafuɛ ng’ɔ fata kɛ a yo’n, yɛle Zoova i srɛlɛ’n. Srɛ i kɛ ɔ uka ɔ. “Koko sa ng’ɔ o ɔ su’n i kwlaa kle i, afin i yɛ ɔ nian ɔ lika-a.’—1 Piɛr 5:7.

Eva seli kɛ: “Kɛ n kpɔcili Zoova’n, i srɛlɛ’n bɔbɔ yoli min ɲannzuɛn. Kɛ m miannin min ɲin kpa n srɛli i’n, asɔnun kpɛnngbɛn kun wa kannin ndɛ kleli min. Ɔ ukali min maan n wunnin i wlɛ kɛ Zoova w’a yiman min blo. Ɔ wlali min fanngan kɛ m bo i bo Biblu’n i nun kannganlɛ’n su. Kɛ n yoli sɔ’n n ɲannin wunmiɛn n ɔli aɲia’m be bo. Kɛ ɔ́ kɔ́ i ɲrun’n, n wa boli jasin fɛ’n ekun. Nanwlɛ, kɛ Zoova w’a yiman min ase’n, ɔ yo min fɛ dan.”

?WAFA SƐ YƐ ANIAAN’M BÉ WÁ SƆ́ MIN NUN ƆN?

Aniaan’m bé sɔ́ ɔ nun klanman. Be su kanman ɔ wun ndɛ tɛ, yɛ be su buman ɔ fɔ. Sanngɛ bé klé ɔ kɛ be klo ɔ, yɛ bé yó like kwlaa nga be kwla yo naan b’a wla ɔ fanngan’n.—Ebre Mun 10:24, 25.

Zavie seli kɛ: “Ɲanmiɛn sielɛ sua’n nun lɔ kɔlɛ’n kunnin min srɛ. N usali min wun sɛ min janvuɛ’m bé sɔ́ min nun klanman o. Sanngɛ kɛ n ɔli’n, aniaan bla kpɛnngbɛn kun m’ɔ o asɔnun’n nun w’a di afuɛ 30, ɔ seli min kɛ: ‘Min wa kan, w’a sa ɔ sin awlo. Mo nin balɛ!” Nanwlɛ ndɛ sɔ’n wluwluli min wun dan. N wunnin kɛ i ndɛ yo fɛ.”

Marki seli kɛ: “N ɔli Ɲanmiɛn Sielɛ sua’n nun lɔ. Kɛ ɔ ko yo naan sran fi w’a wunman min’n ti’n, n ko trannin siɛn lɔ. Sanngɛ kɛ aɲia’n wieli’n, be nga mɔ min bakan nun yɛ be sili min’n bɔbɔ’n be wunnin min wlɛ. Be wa tɔli min nun gbuduu. Kɛ ɔ yoli sɔ’n, min awlɛn tɔli nun sa fɔuun. N wunnin kɛ m’an sa min sin awlo.”

?WAFA SƐ YƐ ASƆNUN KPƐNNGBƐN’M BÉ ÚKA MIN ƆN?

Asɔnun kpɛnngbɛn’m bé úka ɔ klolɛ su. Bé yó ɔ mo. Afin ‘klolɛ nga a fa kloli Ɲanmiɛn laa’n’ a kunndɛ kɛ á kló i sɔ ekun. (Sa Nglo Yilɛ 2:4) Bé úka ɔ “amanniɛn su” naan a kaci ɔ sa. (Galasifuɛ Mun 6:1; Nyanndra Mun 28:13) Atrɛkpa’n, bé sé aniaan kun kɛ ɔ kle ɔ Biblu’n nun like. Fluwa ng’ɔ́ fá klé ɔ like’n i wie yɛle fluwa An fa amun wun mantan Zoova annzɛ fluwa ‘Maan e yo sa nga e yo ɔ e si kɛ Ɲanmiɛn klo e’n.’ Maan ɔ tran ɔ klun kɛ asɔnun kpɛnngbɛn’m bé úka ɔ blɛblɛblɛ lele naan ɔ wun kpaja ɔ kpa Ɲanmiɛn i sulɛ’n nun.—Ezai 32:1, 2.

Viktɔr seli kɛ: “E nin Zoova e afiɛn tili nun lele afuɛ mɔcuɛ. Blɛ kwlaa sɔ’n nun’n, asɔnun kpɛnngbɛn’m be ukali min. Cɛn kun’n be nun kun fali foto wie mɔ e sran nɲɔn e o su’n kleli min. Ɔ maan min wla kpɛnnin aklunjuɛ nga blɛ mɔ n su Zoova’n n dili’n i su. N kunndɛli kpa kɛ ń dí aklunjuɛ sɔ’n ekun. Asɔnun kpɛnngbɛn’m be ukali min naan e nin Zoova e afiɛn w’a mantan ekun.”

“Ɔ́ wlá e fanngan”

Jue nga be o e jue tolɛ fluwa Maan e to jue e man Zoova nun’n, be kwla fɔnvɔ ɔ yɛ be kwla wla ɔ fanngan naan w’a su Ɲanmiɛn ekun kɛ laa’n sa. I wie yɛle jue 60. Jue sɔ’n taka 1 Piɛr 5:10 su. I flɛlɛ’n yɛle “Ɔ́ wlá e fanngan.”

Ɔ le sa nga ti yɛ Ɲanmiɛn kle e nanwlɛ’n

M’ɔ cuɛn e aosin nun fiteli’n.

Ɔ wun e awlɛn’n nun kɛ e waan é sú i

Naan é nánti i atin seiin’m be su.

E srɛli i kɛ é yó i klun sa’n.

Ɔ ukali e, ɔ́ yó sɔ ekun.
E dunman nun’n Ɲanmiɛn fɛ i Wa’n ɔ mannin.

I ti’n Ɲanmiɛn kunndɛ kɛ e yo kpa.

I Wa’n bɔbɔ’n, m’ɔ klo i kpa’n ɔ fa mannin.

Ɔ maan saan ɔ́ wlá e fanngan lele.

I wla fi’a klolɛ nga e fa klo i’n.

Ɔ́ nían i sufuɛ’m be lika titi.

(I SU SƆLƐ)

E ti Ɲanmiɛn liɛ afin Klist yili e ti tɛ.

Ɔ́ yó maan é jrán kpa, yɛ é yó wunmiɛnfuɛ.

Ɔ́ klé e atin, sásá e kɛ titi liɛ’n sa.

Ɔ́ yó maan é jrán kpa, yɛ é yó wunmiɛnfuɛ.

Sin nzɔliɛ nga lika naan tie Jue nga annzɛ Ɲanmiɛn Sielɛ jue uflɛ Sin nzɔliɛ nga lika naan tie Jue nga annzɛ Ɲanmiɛn Sielɛ jue uflɛ mun. Annzɛ kusu kɔ jw.org su trele. su.