-
?Ngue yɛle Ɲanmiɛn Sielɛ’n?A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 31
?Ngue yɛle Ɲanmiɛn Sielɛ’n?
Ndɛ cinnjin kpa nga Biblu’n fa e ɲin sie su’n yɛle Ɲanmiɛn Sielɛ’n i su ndɛ’n. Sran nga Ɲanmiɛn wá síe i famiɛn’n, ɔ́ wá sín i lika naan w’a yo naan i klun sa’n w’a kpɛn su asiɛ’n su. ?Ngue yɛle Ɲanmiɛn Sielɛ’n? ?Ngue ti yɛ e kwla se kɛ ɔ o lɛ dɔ nga su-ɔ? ?Ngue yɛ sran nga Ɲanmiɛn sieli i famiɛn’n w’a dun mmua w’a yo-ɔ? ?Yɛ ngue yɛ ɔ́ wá yó i e ɲrun lɔ-ɔ? Like suanlɛ nga ɔ nin i sin liɛ nun’n é wá tɛ́ kosan sɔ’m be su.
1. ?Ngue yɛle Ɲanmiɛn Sielɛ’n? ?Wan yɛ ɔ ti i su famiɛn’n niɔn?
Ɲanmiɛn Sielɛ’n ɔ ti awa kun mɔ Ɲanmiɛn kpɛli i ba-ɔ. Zezi yɛ ɔ ti awa sɔ’n i su famiɛn’n niɔn, yɛ ɲanmiɛn su lɔ yɛ i famiɛn bia’n wo-ɔ. (Matie 4:17; Zan 18:36) Biblu’n kan Zezi i ndɛ’n se kɛ ‘ɔ́ síe titi yɛ i famiɛn dilɛ’n su wieman le.’ (Liki 1:32, 33) Zezi m’ɔ ti awa sɔ’n i su famiɛn’n ɔ́ wá síe asiɛ’n sufuɛ’m be kwlaa.
2. ?Wan mun yɛ be nin Zezi bé dí famiɛn-ɔn?
Nán Zezi kunngba yɛ ɔ́ wá dí famiɛn’n niɔn. Sran mɔ “be fin akpasuaakpasua kwlaa su’n, mɔ be kan aniɛn wafawafa kwlaa’n, mɔ be fin nvlenvle kwlaa nun’n,” bé dí famiɛn yɛ bé síe asiɛ’n wie. (Sa Nglo Yilɛ 5:9, 10) ?Sran nɲɛ yɛ be nin Zezi bé dí famiɛn-ɔn? Kɛ ɔ fɛ i blɛ mɔ Zezi bali asiɛ’n su lele m’ɔ́ fá jú andɛ’n, sran miliɔn kpanngban be yoli i sɔnnzɔnfuɛ. Sanngɛ be nun sran 144.000 cɛ yɛ bé kɔ́ ɲanmiɛn su naan be nin i b’a di famiɛn-ɔn. (Kanngan Sa Nglo Yilɛ 14:1-4 nun.) Zezi i sɔnnzɔnfuɛ onga’m be liɛ’n bé ká asiɛ’n su wa. Zezi nin be ng’ɔ nin be bé dí famiɛn’n, be yɛ bé síe be-ɔ.—Jue Mun 37:29.
3. ?Ngue ti yɛ e kwla se kɛ Ɲanmiɛn i sielɛ’n ti kpa tra klɔ sran’m be liɛ’n niɔn?
Ɔ ju wie’n klɔ sran’m be siefuɛ mun be kunndɛ kɛ bé yó be wiengu’m be ye. Sanngɛ nán like kwlaa nga be sunnzun’n yɛ be kwla yo-ɔ. Wie liɛ’n sran ng’ɔ sin be osu’n ɔ bu i ngunmin i wun akunndan, yɛ ɔ kunndɛman kɛ ɔ́ úka sran mun. Sanngɛ sran nga Ɲanmiɛn sieli i famiɛn’n mɔ yɛle Zezi’n, sran fi su kacimɛn i. Ɲanmiɛn “takali sielɛ kun mɔ be su nunnunmɛn i le-ɔ.” (Daniɛli 2:44) Zezi wá síe asiɛ’n wunmuan’n, yɛ ɔ su kpaman sran nun. Zezi klo sran, i klun ti ufue, ɔ yo sa i nuan su, yɛ ɔ́ wá klé sran’m be like naan be yo sɔ wie.—Kanngan Ezai 11:9 nun.
SI NDƐ’N NUN KPA EKUN
É wá kán sa nga ti yɛ e kwla se kɛ Ɲanmiɛn i sielɛ’n ti kpa tra klɔ sran’m be liɛ’n i ndɛ.
4. Ɲanmiɛn mannin Zezi i tinmin yɛ ɔ́ síe asiɛ’n wunman’n
Kwlalɛ nga Zezi le i’n ɔ leman wunsu. Ɔ tra klɔ sran’m be siefuɛ’m be liɛ’n lele. An kanngan Matie 28:18 nun, i sin’n an koko kosan yɛ’n i su yalɛ:
?Ngue ti yɛ e kwla se kɛ Zezi i kwlalɛ’n ɔ tra klɔ sran’m be siefuɛ’m be kwlaa be liɛ’n niɔn?
Klɔ sran’m be siefuɛ’m be kacikaci, yɛ be kwlalɛ’n le awɛ. ?Yɛ sran nga Ɲanmiɛn sieli i famiɛn’n i liɛ’n nin? An kanngan Daniɛli 7:14 nun, i sin’n an koko kosan yɛ’m be su yalɛ.
Ɲanmiɛn i sielɛ’n “su nunnunman le.” ?Ngue ti yɛ i sɔ’n ti kpa-ɔ?
Sran nga Ɲanmiɛn sieli i famiɛn’n ɔ́ wá síe asiɛ’n wunmuan’n. ?Ngue ti yɛ i sɔ’n ti kpa-ɔ?
5. Ɔ fata kɛ be nunnun klɔ sran’m be sielɛ liɛ’n
?Ngue ti yɛ ɔ fata kɛ Ɲanmiɛn i sielɛ’n ɔ kaci klɔ sran’m be liɛ’n niɔn? An bo VIDEO’N. I sin’n an koko kosan yɛ’n i su yalɛ.
?Klɔ sran’m be sielɛ’n i bo’n guali sɛ?
An kanngan Akunndanfuɛ’n 8:9 nun, i sin’n an koko kosan yɛ’m be su yalɛ.
?Kɛ a niɛn i sa’n, ɔ fata kɛ Ɲanmiɛn i sielɛ’n kaci klɔ sran’m be liɛ’n? ?Ngue ti-ɔ?
6. Zezi nin be nga be nin i bé dí famiɛn’n be wun e su sa’m be wlɛ
Kɛ mɔ Zezi kacili klɔ sran m’ɔ trannin asiɛ’n su wa’n ti’n, “ɔ si afɛ ng’ɔ o e su’n.” (Ebre Mun 4:15) Sran 144.000 mɔ Zezi nin be wá dí famiɛn’n “be fin akpasuaakpasua kwlaa su, be kan aniɛn wafawafa kwlaa, yɛ be fin nvlenvle kwlaa nun.”—Sa Nglo Yilɛ 5:9.
?Kɛ a si kɛ Zezi ɔ nin be nga be nin i bé wá dí famiɛn’n be si afɛ ng’ɔ o e su’n, i sɔ’n yo wɔ sɛ? ?Yɛ ngue ti-ɔ?
Zoova fali bla nin yasua wie mɔ be finwlɛ’n timan kun’n naan be nin Zezi be ko di famiɛn.
7. Ɲanmiɛn Sielɛ’n i mmla liɛ’m be kpa tra klɔ sran’m be liɛ’n
Klɔ sran’m be siefuɛ mun be kpɛ mmla naan be nga be sie be’n b’a kwla ɲan su ye. Ɲanmiɛn Sielɛ’n kusu le mmla m’ɔ fata kɛ be ng’ɔ́ síe be’n be di su-ɔ. An kanngan 1 Korɛntifuɛ Mun 6:9-11 nun, i sin’n, an koko kosan yɛ’m be su yalɛ:
?Kɛ a niɛn i sa’n, kɛ klɔ sran’m be kwlaa bé wá dí Ɲanmiɛn i mmla’m be su’n,a wafa sɛ yɛ mɛn’n nun tranlɛ’n yó-ɔ?
?Kɛ a niɛn i sa’n, sɛ be nga Ɲanmiɛn Sielɛ’n wá síe be’n be di mmla sɔ’m be su’n ɔ ti su? ?Ngue ti yɛ a bu i sɔ-ɔ?
?Ngue yɛ ɔ kle kɛ be nga be diman mmla sɔ’m be su’n be kwla kaci-ɔ?—Nian ndɛ mma 11 nun.
Klɔ sran’m be siefuɛ mun be kpɛ mmla naan be nga be sie be’n b’a ɲan su ye. Ɲanmiɛn i sielɛ’n i mmla’m be liɛ’n be leman wunsu.
SRAN KUN KWLA USA Ɔ KƐ: “?Ngue yɛ be flɛ i Ɲanmiɛn Sielɛ’n niɔn?”
?Wafa sɛ yɛ á tɛ́ i su-ɔ?
NDƐ’N I KPƆLƐ BOLƐ
Ɲanmiɛn Sielɛ’n ɔ ti awa kun m’ɔ o ɲanmiɛn su lɔ-ɔ. Ɔ́ wá síe asiɛ’n wunmuan’n.
Ndɛ’n i nun flanlɛ
?Wan mun yɛ Ɲanmiɛn sieli be famiɛn mɔ bé wá síe asiɛ’n niɔn?
?Ngue ti yɛ e kwla se kɛ Ɲanmiɛn i sielɛ’n ti kpa tra klɔ sran’m be liɛ’n niɔn?
?Ngue yɛ Zoova kunndɛ kɛ be ng’ɔ́ wá síe be’n be yo-ɔ?
NDƐ WIE MUN EKUN
?Nin yɛ Zezi seli kɛ ɔ́ wá dí famiɛn-ɔn?
?Ngue ti yɛ Zoova i Lalofuɛ’m be jran Ɲanmiɛn i sielɛ liɛ’n i sin-ɔn?
Sran 144.000 be su ndɛ nga Biblu’n kan’n.
Sa nga ti yɛ bla kun mɔ be wlɛli i bisua’n ɔ wa lafili su kɛ Ɲanmiɛn kunngba cɛ yɛ ɔ kwla yo naan y’a ɲan e ti’n.
“N wunnin like ng’ɔ kwla yo naan sran lufle bulɛ’n w’a wie’n” (An Tinnge! nun ndɛ)
-
-
Ɲanmiɛn i sielɛ’n w’a bo i bo!A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 32
Ɲanmiɛn i sielɛ’n w’a bo i bo!
Afuɛ 1914 nun yɛ Ɲanmiɛn i famiɛn’n boli sielɛ bo ɲanmiɛn su lɔ-ɔ. Blɛ sɔ’n nun yɛ klɔ sran’m be sielɛ’n i blɛ kasiɛn’n boli i bo-ɔ. ?Wafa sɛ yɛ e si sɔ-ɔ? Maan e fa e ɲin e sie i ndɛ nga Biblu’n kan’n, ɔ nin sa nga kɛ ɔ fɛ i afuɛ 1914 nun lele andɛ’n be ju’n be su.
1. ?Ndɛ benin yɛ Biblu’n kan-ɔn?
Daniɛli fluwa’n se kɛ, kɛ “blɛ nso” ko sin’n yɛ Ɲanmiɛn i famiɛn’n ɔ́ bó famiɛn dilɛ bo-ɔ. (Daniɛli 4:16, 17) Kɛ afuɛ kpanngban sinnin’n, Zezi kannin blɛ sɔ’n i ndɛ seli kɛ ɔ ti “be nga be timan Zifu’n be blɛ,” yɛ ndɛ ng’ɔ kannin’n kle kɛ i blɛ su’n nn blɛ sɔ’n nin-a sinman. (Liki 21:24) É wá wún i kɛ blɛ nso sɔ’n wie afuɛ 1914 nun.
2. ?Kɛ ɔ fɛ i afuɛ 1914 nun’n wafa sɛ yɛ mɛn’n w’a yo-ɔ?
Zezi i sɔnnzɔnfuɛ’m be usɛli i kɛ: “?Blɛ onin nun yɛ sa sɔ’m bé jú-ɔ? ?Nzɔliɛ onin yɛ ɔ́ klé kɛ a o lɛ naan mɛn’n i awieliɛ blɛ’n w’a ju-ɔ?” (Kanngan Matie 24:3 nun.) Ɔ maan Zezi boli sa nga kɛ ɔ́ wá bó famiɛn dilɛ bo’n bé wá jú’n be su kleli be. Sa sɔ’m be nun wie mun yɛle alɛ’n nin awe’n nin asiɛ m’ɔ keje’n. (An kanngan Matie 24:7 nun.) Asa ekun’n Biblu’n se kɛ “mɛn’n i awieliɛ blɛ nun’n” sran’m be ayeliɛ’n ti’n mɛn “wá yó kekle kpa.” (2 Timote 3:1-5) Kɛ ɔ fɛ i afuɛ 1914 nun’n yɛ sa kwlaa sɔ’m be kpɛn su kpa-ɔ.
3. ?Ngue ti yɛ kɛ Ɲanmiɛn i famiɛn’n boli sielɛ bo’n, mɛn’n wa yoli kekle kpa-ɔ?
Kɛ Zezi boli sielɛ’n bo’n w’a cɛman, ɔ nin Satan nin mmusu mun be kunnin alɛ. Alɛ sɔ’n nun’n be kwlali Satan. Biblu’n se kɛ “be kɛnnin i nin i anzi’m be bo guali be asiɛ’n su” wa. (Sa Nglo Yilɛ 12:9, 10, 12) Satan w’a fa ya dan kpa, afin ɔ si kɛ bé wá núnnún i. I sɔ’n ti’n, ɔ yo maan ɲrɛnnɛn nin afɛ’n be tuman asiɛ’n su. Ɔ maan sɛ mɛn’n ti tɛ kɛ nga sa’n, i sɔ’n boman e nuan. Sanngɛ ɔ cɛ kan’n sran nga Ɲanmiɛn sieli i famiɛn’n, ɔ́ wá núnnún afɛ kwlaa sɔ mun.
SI NDƐ’N NUN KPA EKUN
É wá wún sa nga ti yɛ e si kɛ Ɲanmiɛn i sielɛ’n boli i bo 1914 nun’n, kpɛkun é wá wún like ng’ɔ fata kɛ e yo’n.
4. Biblu’n kle kɛ Ɲanmiɛn i sielɛ’n boli i bo afuɛ 1914 nun.
Zoova yoli maan Babilɔnin famiɛn Nebikadnezaa cɛnnin laliɛ. Wafa nga be yiyili laliɛ sɔ’n nun’n, ɔ kle kɛ nán Nebikadnezaa ngunmin yɛ ɔ́ kpɛ́n su i lika-ɔ. Sanngɛ ɔ́ kpɛ́n su Ɲanmiɛn Sielɛ’n i lika wie.—An kanngan Daniɛli 4:17 nun.a
An kanngan Daniɛli 4:20-26 nun, i sin’n nian foto nga be o lɛ mun naan tɛ kosan nga’m be su:
(A) ?Ngue yɛ Nebikadnezaa wunnin i laliɛ nun-ɔn?—Nian ndɛ mma 20 nin 21 nun.
(B) ?Ngue yɛ bé fá yó waka’n niɔn?—Nian ndɛ mma 23 nun.
(C) ?Kɛ ‘blɛ nso’n’ ko sin’n sa benin yɛ ɔ́ wá jú-ɔ?—Nian ndɛ mma 26 nun.
Waka dan’n i su ndɛ’n kpɛn su Ɲanmiɛn Sielɛ’n i lika wie
NDƐ NGA BIBLU’N KAN’N (Daniɛli 4:20-36)
Sielɛ’n
(A) Waka dan kun.
Sielɛ’n w’a saci
(B) “An bu waka’n” yɛ “maan blɛ nso sin.”
Sielɛ’n w’a taka ekun
(C) “Bé fá ɔ famiɛn diwlɛ’n bé wlá ɔ sa nun ekun.”
Ndɛ sɔ’n i su kpɛnlɛ klikli nun’n...
(D) ?Wan yɛle waka’n?—Nian ndɛ mma 22 nun.
(E) ?Blɛ benin nun yɛ ɔ yacili famiɛn dilɛ-ɔ?—An kanngan Daniɛli 4:29-33 nun.
(F) ?Kɛ “blɛ nso” sinnin’n, sa benin yɛ ɔ juli-ɔ?—An kanngan Daniɛli 4:34-36 nun.
I SU KPƐNLƐ KLIKLI’N
Sielɛ’n
(D) Babilɔnin famiɛn Nebikadnezaa.
Sielɛ’n w’a saci
(E) Kɛ afuɛ 606 K.N.K sinnin’n, Nebikadnezaa boli fia, yɛ w’a kwlá diman famiɛn lele afuɛ nso.
Sielɛ’n w’a taka ekun
(F) Nebikadnezaa i ngwlɛlɛ’n sɛli i sin i osu’n nun yɛ ɔ wa dili famiɛn ekun.
Ndɛ sɔ’n i su kpɛnlɛ nɲɔn su’n nun’n...
(G) ?Wan yɛle waka’n?—An kanngan 1 Be Ɲoliɛ 29:23 nun.
(H) ?Blɛ benin nun yɛ be yacili famiɛn dilɛ-ɔ? ?Wafa sɛ yɛ e si kɛ i nun mɔ Zezi o asiɛ’n su wa’n, nn be nin-a saman be sin famiɛn bia’n su-ɔ?—An kanngan Liki 21:24 nun.
(I) ?Blɛ benin nun yɛ sielɛ sɔ’n wa takali ekun-ɔn? ?Yɛ ninfan yɛ ɔ takali-ɔ?
I SU KPƐNLƐ NƝƆN SU’N
Sielɛ’n
(G) Izraɛli famiɛn mɔ be ti Ɲanmiɛn i sielɛ’n i nzɔliɛ’n.
Sielɛ’n w’a saci
(H) Kɛ be sacili Zerizalɛmun klɔ’n, Izraɛli famiɛn mun b’a sieman lele afuɛ 2.520.
Sielɛ’n w’a taka ekun
(I) Zezi kacili Famiɛn ɲanmiɛn su lɔ.
?Blɛ nso’n ɔ ti blɛ nɲɛ?
Ɔ ju wie’n, Biblu’n nun ndɛ mma wie’m be uka e naan y’a wun Biblu’n nun ndɛ mma uflɛ wie’m be wlɛ. I wie yɛle kɛ Sa Nglo Yilɛ fluwa’n se kɛ blɛ nsan nin sin be ti cɛn ba 1.260. (Sa Nglo Yilɛ 12:6, 14) Ɔ maan blɛ nso’n ɔ ti blɛ sɔ’n i kpɛ nɲɔn, yɛle kɛ cɛn ba 2.520. Ɔ ju wie’n Biblu’n se kɛ cɛn ba kun ti afuɛ kun. (Ezekiɛli 4:6) Ɔ maan e kwla se kɛ blɛ nso nga Daniɛli fluwa’n kɛn i ndɛ’n be ti afuɛ 2.520.
5. Kɛ ɔ fɛ i afuɛ 1914 nun’n mɛn’n kacili
Zezi boli sa nga kɛ ɔ́ wá káci famiɛn’n bé wá jú’n be su. An kanngan Liki 21:9-11 nun, i sin’n an koko kosan yɛ’n i su yalɛ:
?Sa nga be boboli be su lɛ’n, beninfuɛ’n yɛ ɔ bɔbɔ a sieli i nzɔliɛ-ɔ?
Klɔ sran’m be sielɛ’n i blɛ kasiɛn’n nun’n, wafa nga sran’m be ayeliɛ’n wá yó’n, akoto Pɔlu kɛnnin i ndɛ. An kanngan 2 Timote 3:1-5 nun, i sin’n an koko kosan yɛ’n i su yalɛ:
?Ninnge nga sran’m be yo mɔ be boboli be su lɛ’n, beninfuɛ’n yɛ ɔ bɔbɔ a sieli i nzɔliɛ-ɔ?
6. Like ng’ɔ fata kɛ e yo’n
An kanngan Matie 24:3, 14 nun, i sin’n an koko kosan yɛ’m be su yalɛ:
?Junman cinnjin benin yɛ ɔ kle kɛ Ɲanmiɛn i sielɛ’n, ɔ su sie dɔ nga su-ɔ?
?Ngue yɛ a kwla yo naan w’a di junman sɔ’n wie-ɔ?
Ɲanmiɛn i famiɛn’n w’a bo famiɛn dilɛ bo. Ɔ cɛ kan’n ɔ́ wá síe asiɛ wunmuan’n. An kanngan Ebre Mun 10:24, 25 nun, i sin’n an koko kosan yɛ’n i su yalɛ:
?Kɛ e wun kɛ “cɛn sɔ’n su mantan koko’n,” ngue yɛ ɔ fata kɛ e yo-ɔ?
?Sɛ a si like kun m’ɔ kwla uka ɔ wiengu mun’n, ngue yɛ ɔ fata kɛ a yo-ɔ?
SRAN KUN KWLA USA Ɔ KƐ: “?Ngue ti yɛ afuɛ 1914 ti Zoova i Lalofuɛ’m be cinnjin sɔ-ɔ?”
?Wafa sɛ yɛ á tɛ́ su-ɔ?
NDƐ’N I KPƆLƐ BOLƐ
Ndɛ nga Biblu’n kan’n, nin sa nga be ju’n, ɔ nin wafa nga mɛn’n w’a yo’n ɔ kle kɛ Ɲanmiɛn i famiɛn’n w’a bo i famiɛn dilɛ bo. Wafa nga e kle kɛ e lafi ndɛ sɔ’n su’n yɛle kɛ e bo sielɛ sɔ’n i su jasin fɛ’n, kpɛkun e tran e aɲia’m be bo.
Ndɛ’n i nun flanlɛ
?Daniɛli fluwa’n nun’n, kɛ blɛ nso’n ko sin’n, sa benin yɛ ɔ́ wá jú-ɔ?
?Ngue ti yɛ a lafi su kɛ Ɲanmiɛn i famiɛn’n boli sielɛ bo afuɛ 1914 nun-ɔn?
?Wafa sɛ yɛ a kwla kle kɛ a lafi su kɛ Ɲanmiɛn i famiɛn’n w’a bo famiɛn dilɛ bo-ɔ?
NDƐ WIE MUN EKUN
Nian ndɛ nga fluwa sifuɛ dandan’m be kɛn i afuɛ 1914 su’n.
“Sran’m be ayeliɛ’n w’a yo tɛ kpa w’a tra laa’n” (An Tinnge! nun ndɛ)
Ndɛ nga Matie 24:14 kan’n ɔ ukali bian kun kpa.
“N kloli bezibolu tolɛ’n n trali like kwlaa” (Sasafuɛ Tranwlɛ’n, afuɛ 2017, No. 3)
?Ngue ti yɛ e se kɛ ndɛ nga Daniɛli ndɛ tre 4 kan’n, ɔ ti Ɲanmiɛn i sielɛ’n i liɛ wie-ɔ?
“?Blɛ benin nun yɛ Ɲanmiɛn i famiɛn’n boli sielɛ bo-ɔ? (Bue 1)”(Sasafuɛ Tranwlɛ’n nun ndɛ)
?Ngue yɛ ɔ kle kɛ “blɛ nso” nga Daniɛli fluwa’n ndɛ tre 4 kɛnnin i ndɛ’n, ɔ wieli afuɛ 1914 nun-ɔn?
“Blɛ benin nun yɛ Ɲanmiɛn i famiɛn’n boli sielɛ bo-ɔ? (Bue 2)” (Sasafuɛ Tranwlɛ’n nun ndɛ)
a Nian ndɛ kasiɛn nɲɔn nga be o ndɛ akpasua nga be flɛ i kɛ Ndɛ Wie Mun Ekun i nun.
-
-
?Ngue yɛ Ɲanmiɛn Sielɛ’n wá yó-ɔ?A kwla di aklunjɔɛ tititi!—Biblu’n nun like suanlɛ
-
-
LIKE SUANLƐ 33
?Ngue yɛ Ɲanmiɛn Sielɛ’n wá yó-ɔ?
Kɛ é sé yɛ’n Ɲanmiɛn i famiɛn’n w’a bo sielɛ bo. Ɔ cɛ kan’n ɔ́ wá yó maan ninnge’m bé káci. Maan e fa e ɲin e sie i ninnge wie mɔ Ɲanmiɛn i famiɛn’n wá yó mɔ e ɲin o be sin kpa’n be su.
1. ?Ngue yɛ Ɲanmiɛn Sielɛ’n wá yó naan alaje’n nin sa nuan su sɛsɛ yolɛ’n w’a tran asiɛ’n su ekun-ɔn?
Aamagedɔn alɛ’n nun’n, Ɲanmiɛn i famiɛn mɔ yɛle Zezi’n ɔ́ wá núnnún klunwifuɛ mun ɔ nin awa mɔ be kle sran’m be ɲrɛnnɛn’n. (Sa Nglo Yilɛ 16:14, 16) Blɛ sɔ’n nun’n ndɛ nga Biblu’n kɛnnin i yɛ’n ɔ́ wá kpɛ́n su. Ɔ se kɛ: “Ɔ ka kaan sa’n, be su wunman klunwifuɛ’m be kun.” (Jue Mun 37:10) Zezi wá yó maan alaje’n nin sa nuan su sɛsɛ yolɛ’n bé trán asiɛ’n su.—Kanngan Ezai 11:4 nun.
2. ?Kɛ Ɲanmiɛn i klun sa’n wá kpɛ́n su’n, wafa sɛ yɛ asiɛ’n su tranlɛ’n wá yó-ɔ?
Kɛ Ɲanmiɛn i famiɛn’n ɔ́ wá síe asiɛ’n, “asiɛ’n yó sran kpa’m be liɛ, yɛ bé trán su tititi.” (Jue Mun 37:29) Bu i akunndan kan nian. Asiɛ’n sufuɛ mun be kwlaa bé yó sran kpa. Bé kló Zoova kpɛkun bé kló be wiengu. Sran fi su tɔman tukpacɛ yɛ é trán nguan nun tititi.
3. ?Kɛ be ko nunnun klunwifuɛ mun’n ngue yɛ Ɲanmiɛn Sielɛ’n wá yó-ɔ?
Kɛ be ko nunnun klunwifuɛ mun’n Zezi wá dí famiɛn afuɛ akpi. Blɛ sɔ’n nun’n, Zezi nin sran 144.000 mɔ be nin i bé wá dí famiɛn’n bé wá yó maan fɔ su tranman sran’m be nun kun. Ɔ maan kɛ blɛ sɔ’n ko sin’n asiɛ’n káci mɛn klanman kpa kun. Sran’m be kwlaa bé nánti Zoova i mmla’m be su yɛ bé dí aklunjɔɛ. I sin’n Zezi wá fá famiɛn dilɛ’n mɛ́n i si Zoova. I lɛ nun’n Zoova “i dunman’n yó sanwun.” (Matie 6:9, 10) Blɛ sɔ’n nun’n sran’m be kwlaa bé wún kɛ Zoova ti siefuɛ kpa naan i sufuɛ’m be ndɛ lo i. Kpɛkun Zoova wá núnnún Satan ɔ nin mmusu mun. (Sa Nglo Yilɛ 20:7-10) Ninnge kpakpa nga Ɲanmiɛn Sielɛ’n ti’n é ɲán be’n bé ká lɛ tititi.
SI NDƐ’N NUN KPA EKUN
Sa nga ti yɛ e kwla lafi su kɛ Ɲanmiɛn Sielɛ’n wá yó maan Ɲanmiɛn i klun sa’n kpɛ́n su’n.
4. Ɲanmiɛn i famiɛn’n wá núnnún klɔ sran’m be sielɛ liɛ’n
Biblu’n se kɛ ‘kɛ sran sie i wiengu’n ɔ kle i yalɛ’n.’ (Akunndanfuɛ’n 8:9) Sran mɔ Ɲanmiɛn sieli i famiɛn’n ɔ́ wá yó maan be su kleman sran fi yalɛ kun.
An kanngan Daniɛli 2:44 nin 2 Tesalonikifuɛ Mun 1:6-8 nun. I sin’n an koko kosan yɛ’m be su yalɛ:
?Ngue yɛ Zoova nin Zezi bé wá fá yó awa mun, ɔ nin be nga be jran be sin mun-ɔn?
?Like sɔ mɔ Zoova nin Zezi bé wá yó’n, ɔ ti su? ?Ngue ti yɛ a bu i sɔ-ɔ?
5. Zezi yɛ ɔ ti Siefuɛ kpafuɛ’n niɔn
Zezi mɔ Ɲanmiɛn sieli i famiɛn’n ɔ́ wá yó ninnge kpanngban mán be ng’ɔ́ síe be’n. An bo VIDEO’N. Á wá wún kɛ Zezi kunndɛ kpa kɛ ɔ́ úka sran mun yɛ Ɲanmiɛn mɛnnin i tinmin naan w’a kwla yo sɔ.
Kɛ Zezi bali asiɛ’n su wa’n ninnge ng’ɔ yoli be’n be kle e like nga Ɲanmiɛn Sielɛ’n wá yó’n. ?Ninnge kpakpa nga be boboli be su wa’n, beninfuɛ’n yɛ ɔ ɲin o i sin kpa-ɔ? An kanngan Biblu’n nun ndɛ mma nga’m be nun.
I NUN MƆ ZEZI O ASIƐ’N SU WA’N
NINNGE NGA ZEZI WÁ YÓ BE’N
Ɔ ijɔli aunmuan’n ɔ nin jenvie’n.—Marki 4:36-41.
Ɔ́ wá yó maan ninnge kɛ aunmuan’n ɔ nin jenvie sa’n be su saciman like kun.—Ezai 35:1, 2.
Ɔ mannin sran kpanngban be aliɛ.—Matie 14:17-21.
Ɔ́ wá yó maan awe’n su tranman lɛ kun. —Jue Mun 72:16.
Ɔ yoli sran kpanngban be juejue.—Liki 18:35-43.
Ɔ́ wá yó maan sran fi su tɔman tukpacɛ kun. —Ezai 33:24.
Ɔ cɛnnin sran wie’m be nguan. —Liki 8:49-55.
Ɔ́ wá yó maan wie’n su kleman klɔ sran’m be yalɛ kun.—Sa Nglo Yilɛ 21:3, 4
6. Ɲanmiɛn Sielɛ’n wá yó maan e ɲrun lɔ’n yó kpa
Ɲanmiɛn Sielɛ’n wá yó maan like nga Ɲanmiɛn sunnzunnin i klɔ sran’m be lika i bobolɛ nun’n ɔ́ kpɛ́n su. Bé trán nguan nun tititi asiɛ’n su wa, mɛn klanman kun nun. An bo VIDEO’N. A wá wún wafa nga Zoova sin Zezi i lika di junman naan i klun sa’n w’a kpɛn su’n.
An kanngan Jue Mun 145:16 nun, i sin’n an koko kosan yɛ’n i su yalɛ:
?Kɛ a si kɛ Zoova wá mán “ninnge nga be o nguan nun’n be like ng’ɔ ju be’n” i sɔ’n yo wɔ sɛ?
SRAN WIE’M BE WAAN: “Sɛ e kwlaa e bo yo kun e fa ajalɛ’n, e su sa’m be kwlaa bé wíe.”
?Sa benin mun yɛ Ɲanmiɛn i famiɛn’n wá síesíe mɔ klɔ sran’m be awa mun be kwlá siesieman-ɔn?
NDƐ’N I KPƆLƐ BOLƐ
Ɲanmiɛn Sielɛ’n wá yó maan Ɲanmiɛn i klun sa’n kpɛ́n sa. Ɔ́ wá yó maan asiɛ’n káci mɛn klanman. Be nga be klo Zoova mɔ be su i’n bé trán nun tititi.
Ndɛ’n i nun flanlɛ
?Wafa sɛ yɛ Ɲanmiɛn Sielɛ’n wá yó naan Ɲanmiɛn i dunman’n w’a yo sanwun-ɔn?
?Ngue ti yɛ e kwla lafi su kɛ Ɲanmiɛn Sielɛ’n wá yó maan nda nga Ɲanmiɛn tali be’n bé kpɛ́n su-ɔ?
?Ngue yɛ Ɲanmiɛn Sielɛ’n wá yó mɔ ɔ ɲin o i sin kpa-ɔ?
NDƐ WIE MUN EKUN
Like nga be flɛ i Aamagedɔn’n
Zezi kannin sa nga bé wá jú ’ɲrɛnnɛn dan’n’ nun’n be ndɛ.—Matie 24:21.
Wafa nga awlobo mun be kwla fa be ɲin be sie i blɛ mɔ bé wá trán mɛn klanman’n nun lɔ’n i su’n.
Bian kun wa wunnin like nga mɔ maan klɔ sran’m be su sa’m bé wíe’n i wlɛ.
-