LIKE SUANLƐ 10
?Wafa sɛ yɛ Zoova i Lalofuɛ’m be aɲia’m be kwla yo ɔ ye-ɔ?
?Zoova i Lalofuɛ’m b’a yia wɔ be aɲia kun i bo le? Sɛ a nin-a tranman be aɲia’m be bo le’n, kpɛ klikli nga be yia wɔ’n, ɔ klun kwla titi wɔ kan. A kwla usa ɔ wun kɛ: ‘?Ngue yɛ be yo i aɲia sɔ’m be bo lɔ-ɔ? ?Ngue ti yɛ be aɲia’m be bo tranlɛ’n ti cinnjin-ɔn? ?Ngue ti yɛ ɔ fata kɛ n tran be bo-ɔ?’ Like suanlɛ nga nun’n, á wá wún kɛ, kɛ a nin sran wie mun be yia be su Ɲanmiɛn’n, i sɔ’n yo maan a nin Ɲanmiɛn amun afiɛn mantan, yɛ i sɔ’n yo ɔ ye.
1. ?Ngue ti yɛ ɔ ti cinnjin kɛ e yia e su Ɲanmiɛn-ɔn?
Like cinnjin nga ti yɛ e yia e yo aɲia mun’n, Biblu’n i klɛfuɛ kun kɛnnin i ndɛ. Ɔ seli kɛ: “Ń mánmán Zoova nzra dan’n nun.” (Jue Mun 26:12) I wafa kunngba’n, kɛ Zoova i Lalofuɛ’m be yia mɔ be yo aɲia likawlɛ’n, be di aklunjɔɛ dan. Mɛn wunmuan’n nun’n, lemɔcuɛ kwlaa’n be yia be manman Ɲanmiɛn, be to jue, yɛ be srɛ Ɲanmiɛn. Afuɛ nuan kwlaa’n, be yo aɲia dandan wie mun.
2. ?Ngue yɛ a kwla suɛn i e aɲia’m be bo-ɔ?
Aɲia’m be bo’n, e fa e ɲin e sie i Ɲanmiɛn Ndɛ’n su. Be ‘tu i bo’ be kle e. (Kanngan Neemi 8:8 nun.) Sɛ a tran aɲia’m be bo’n, á súan Zoova i su like yɛ á sí i kpa. Kɛ á wá wún kɛ ɔ klo wɔ’n, á wá fá ɔ wun mɛ́ntɛn i kpa. Asa ekun’n, á wá wún kɛ ɔ kwla uka wɔ naan ɔ liɛ w’a yo ye.—Ezai 48:17, 18.
3. ?Sɛ a nin sran mun koko yalɛ aɲia’m be bo’n, wafa sɛ yɛ i sɔ’n kwla uka wɔ-ɔ?
Zoova se e kɛ: “Maan e wiengu ndɛ lo e, yɛ maan e wla e wiengu fanngan naan e ngba e klo Ɲanmiɛn nin sran, yɛ e yo sa kpa. Nán maan e yaci yialɛ kɛ be wie’m be yo’n sa.” (Ebre Mun 10:24, 25) E aɲia’m be bo’n, á wá wún kɛ e wiengu’m be ndɛ lo e, naan Ɲanmiɛn ndɛ’n ti e cinnjin kpa kɛ wɔ sa. Ndɛ nga be kan be lɔ’n, be taka Biblu’n su, yɛ be wla fanngan. (Kanngan Rɔmunfuɛ Mun 1:11, 12 nun.) Á wá sí sran wie mun aɲia sɔ’m be bo. Be nun wie’m b’a ja bla annzɛ bian, wie’m be kusu be nin-a jaman wie. Kannzɛ sa fanunfanun tɔ be su’n, sanngɛ be di aklunjɔɛ. Like nga ti yɛ Zoova kunndɛ kɛ e yo aɲia mun titi’n, be wie mun yɛ be o lɛ-ɔ.
SI NDƐ’N NUN KPA EKUN
Maan e nian wafa nga Zoova i Lalofuɛ’m be yo be aɲia mun’n, ɔ nin like nga ti yɛ ɔ ti cinnjin kɛ a mian ɔ ɲin naan a tran be bo’n.
4. Zoova i Lalofuɛ’m be aɲia mun
Klisifuɛ klikli’m be yiali be suli Zoova titi. (Rɔmunfuɛ Mun 16:3-5) An kanngan Kolɔsufuɛ Mun 3:16 nun, i sin’n an koko kosan yɛ’n i su yalɛ:
?Wafa sɛ yɛ Klisifuɛ klikli’m be suli Zoova-ɔ?
Andɛ kusu’n, Zoova i Lalofuɛ’m be yia titi Ɲanmiɛn sulɛ sua’m be nun. Sɛ a kunndɛ kɛ á sí wafa nga be yo be aɲia mun’n, an bo VIDEO’N. Kpɛkun an nian aɲia’n i su desɛn’n, i sin’n an koko kosan yɛ’m be su yalɛ:
?Ngue yɛ be kɛn i ndɛ Kolɔsufuɛ Mun 3:16 nun mɔ e yo i e aɲia’m be bo-ɔ?
?Video’n nun’n, annzɛ desɛn’n su’n, ngue yɛ be yo i e aɲia’m be bo m’ɔ yo ɔ klanman-ɔn?
An kanngan 2 Korɛntifuɛ Mun 9:7 nun, i sin’n an koko kosan yɛ’n i su yalɛ:
?Ngue ti yɛ Zoova i Lalofuɛ’m be aɲia’m be bo’n be seman sran’m be kɛ be yi sika-ɔ?
Ninnge nga é wá wún be lemɔcuɛ nga nun aɲia’n i bo’n, maan a nin ɔ like klefuɛ’n be koko su yalɛ.
?Kɛ a niɛn i sa’n, aɲia’n i bue benin yɛ ɔ́ wá yó ɔ fɛ kpa annzɛ ɔ́ yó ɔ ye-ɔ?
Nian nga wie
A kwla wun lika nin blɛ nga i nun yɛ e yo e aɲia mun mɛn wunmuan’n nun’n su.
E aɲia’m be bo’n, be yiyi ndɛ’m be nun, be kle e ajalɛ wie mun, kpɛkun e nian video. Kɛ é bó aɲia’m be bo’n, e to jue yɛ e srɛ Ɲanmiɛn. Kɛ é gúa be bo’n, i kunngba’n yɛ e yo-ɔ.
Aɲia’n i bue wie’m be nun’n, nzrafuɛ’m be tɛ kosan wie’m be su.
Sran kwlaa kwla trɛn i bo, awlobo mun-o, be nga be nin-a jaman bla annzɛ bian-o, kpɛnngbɛn mun-o, ba kanngan mun-o.
Zoova i Lalofuɛ’m be aɲia’m be bo’n, e seman sran’m be kɛ be yi sika. Be yiman sika naan b’a wlu, yɛ aɲia’n i bo’n be faman like sinsinman naan be gua nun sika.
5. Ɔ fata kɛ e mian e ɲin naan y’a kwla tran aɲia’m be bo
Maan e fa e ɲin e sie i Zezi nin i awlofuɛ’m be su. Afuɛ kwlaa nun’n, be fɛ i Nazarɛti be kɔ Zerizalɛmun Ɲanmiɛn i sua’n nun lɔ. I sɔ yolɛ nun’n be nanti kilo kɔe 100 okaoka lika’m be nun. An kanngan Liki 2:39-42 nun, i sin’n an koko kosan yɛ’m be su yalɛ:
?Kɛ a niɛn i sa’n Zerizalɛmun lɔ kɔlɛ’n yoli pɔpɔ?
?Ngue yɛ ɔ kwla tanndan ɔ ɲrun aɲia’m be bo tranlɛ nun-ɔn?
?Kannzɛ ɔ ti sɔ’n, a bu i kɛ ɔ fata kɛ a mian ɔ ɲin naan w’a kwla tran aɲia’m be bo? ?Ngue ti-ɔ?
Biblu’n se kɛ ɔ ti cinnjin kpa kɛ e yia naan e su Ɲanmiɛn likawlɛ. An kanngan Ebre Mun 10:24, 25 nun, i sin’n an koko kosan yɛ’n i su yalɛ:
?Ngue ti yɛ ɔ fata kɛ e tran aɲia’m be bo titi-ɔ?
SRAN WIE’M BE WAAN: “Ɔ timan cinnjin kɛ e nin sran uflɛ e yia e su Ɲanmiɛn. Sran kun kwla kɛ i bɔbɔ i awlo lɔ suan Biblu’n nun like.”
?Biblu’n nun ndɛ benin yɛ ɔ kle e like nga Zoova kunndɛ kɛ e yo’n niɔn?
NDƐ’N I KPƆLƐ BOLƐ
Sɛ a tran aɲia’m be bo’n, i sɔ’n úka ɔ maan á sí Zoova kpa, a nin i be afiɛn mántan kpa, yɛ a nin sran uflɛ bé sú i likawlɛ.
Ndɛ’n i nun flanlɛ
?Ngue ti yɛ Zoova wla e fanngan kɛ e yia e su i likawlɛ-ɔ?
?Ngue yɛ a kwla suɛn i Zoova i Lalofuɛ’m be aɲia’m be bo lɔ-ɔ?
?Ngue ekun nun yɛ aɲia’m be kwla uka wɔ-ɔ?
NDƐ WIE MUN EKUN
?Yɛ sɛ aɲia’m be bo kɔlɛ ti’n, ɔ klun titi wɔ’n nin? Kɛ bian kun i wun yoli i sɔ laa-ɔ. Sanngɛ kɛ ɔ́ kɔ́ i ɲrun’n ɔ wa kloli aɲia mun.
Gbanflɛn kun wa kloli aɲia mun, yɛ ɔ miɛnnin i ɲin kpa naan w’a kwla tran be bo titi.
Kɛ sran wie’m be trannin e aɲia kun bo’n, wafa nga be wun yoli be’n, be kɛnnin i ndɛ.
“?Ngue ti yɛ ɔ fata kɛ e yia Ɲanmiɛn Sielɛ Sua’m be nun-ɔn?” (jw.org su ndɛ)
Nian wafa nga Zoova i Lalofuɛ’m be aɲia kun i bo tranlɛ’n, ɔ ukali bian kun m’ɔ ti nzaje sa yofuɛ’n naan w’a kaci’n.
“Kan kwlaa nga ń kɔ́ lɛ’n n tui’n wo n bo” (Sasafuɛ Tranwlɛ’n nun ndɛ)