LIKE SUANLƐ 06
?Sran kun yɛ ɔ yili mɛn’n niɔn?
Biblu’n se kɛ Ɲanmiɛn yɛ ɔ “yili like kwlaa-ɔ.” (Sa Nglo Yilɛ 4:11) ?A lafi ndɛ sɔ’n su? Sran wie’m be waan ninnge’m be boli nun sa ngbɛn. Sɛ be ndɛ sɔ’n ti nanwlɛ’n, é sé kɛ e bɔbɔ e boli nun sa ngbɛn wie. Sanngɛ sɛ Zoova yɛ ɔ yili ninnge mun’n, é sé kɛ like kun ti yɛ ɔ yili be-ɔ. ?Nɛ́n i-ɔ?a Nian ninnge’m be yilɛ’n i su ndɛ nga Biblu’n kan’n, ɔ nin like nga ti yɛ e kwla se kɛ ndɛ sɔ’n ti nanwlɛ’n.
1. ?Asiɛ’n nin nglo lɔ ninnge’m be boli nun sa ngbɛn?
Biblu’n se kɛ: “I bo bolɛ’n nun’n, Ɲanmiɛn yili nglo nin asiɛ’n.” (Bo Bolɛ 1:1) Siansifuɛ’m be nun kpanngban be waan mɛn’n boli i bo cɛn kun. ?Wafa sɛ yɛ Ɲanmiɛn yili mɛn’n niɔn? Ɲanmiɛn fɛli i wawɛ’n mɔ yɛle i wunmiɛn m’ɔ fa yo ninnge mun’n yɛ ɔ fa yili ninnge kwlaa nga be o nglo lɔ’n, ɔ nin asiɛ’n su wa’n niɔn. I wie yɛle nzraama mun, ɔ nin nglo lɔ ninnge onga mun.—Bo Bolɛ 1:2.
2. ?Ngue ti yɛ Ɲanmiɛn yili asiɛ’n niɔn?
Nán ngbɛn ti yɛ Zoova ‘yili asiɛ’n niɔn, ɔ yili i kɛ be tran su.’ (Ezai 45:18) Ɔ yili asiɛ’n i klanman kpa, klɔ sran’m be kwla tran su tititi. (Kanngan Ezai 40:28; 42:5 nun.) Siansifuɛ’m be waan asiɛ’n ti i liɛ ngunmin naan i ngunmin su yɛ klɔ sran’m be kwla tran-ɔn.
3. ?Ngue ti yɛ e kwla se kɛ klɔ sran’m be nin nnɛn’m be timan kun-ɔn?
Kɛ Zoova yili asiɛ’n, ɔ yili i su ninnge mun. Ɔ dun mmua yili ijre mun, ɔ nin nnɛn mun. I sin’n, “Ɲanmiɛn yili klɔ sran’n kɛ i bɔbɔ sa.” (Kanngan Bo Bolɛ 1:27 nun.) ?Ngue ti yɛ klɔ sran’m be ti be liɛ ngunmin-ɔn? Kɛ mɔ Ɲanmiɛn yili e kɛ i bɔbɔ sa’n ti’n, e kwla yi i nzuɛn’n i nglo. I wie yɛle kɛ e kwla klo sran yɛ e kwla yo sa i nuan su sɛsɛ. Asa ekun’n, wafa ng’ɔ yili e’n ti’n, e klo ninnge nglanman mun, e klo miziki tielɛ, yɛ e kwla suan aniɛn uflɛ. Asa kusu’n, e kwla su e Yifuɛ’n.
SI NDƐ’N NUN KPA EKUN
Maan e nian sa nga ti yɛ e kwla se kɛ ninnge’m b’a boman nun sa ngbɛn naan be yilɛ’n i su ndɛ nga Biblu’n kan’n ɔ ti nanwlɛ’n. Asa ekun’n, é wá wún kɛ nzuɛn nga klɔ sran’m be yi i nglo’n ɔ kle e ninnge wie mun Ɲanmiɛn su.
4. Ninnge mun b’a boman nun sa ngbɛn
Kɛ klɔ sran’m be nian asiɛ’n su ninnge nga be o lɛ laa’n be su be yi be liɛ’n, sran’m be yi be ayɛ. ?Sanngɛ wan yɛ ɔ dun mmua yili ninnge sɔ mun-ɔn? An bo VIDEO’N, i sin’n an koko kosan yɛ’n i su yalɛ:
?Asiɛ’n su ninnge benin yɛ be nga be yi ninnge mun’n be niannin su be yili be liɛ-ɔ?
Sua kwlaa ng’ɔ o sa’n, sran kun yɛ ɔ jajali yɛ ɔ kplannin-ɔn. ?Sanngɛ wan yɛ ɔ jajali ninnge nga be o asiɛ’n su’n m’ɔ yili be-ɔ? An kanngan Ebre Mun 3:4 nun, i sin’n an koko kosan yɛ’m be su yalɛ:
?Asiɛ’n su ninnge benin yɛ be yo wɔ klanman kpa-ɔ?
?Kɛ be se kɛ sran kun yɛ ɔ yili mɛn’n i sɔ’n ti su? ?Ngue ti-ɔ?
Nian nga wie
A kwla wun ndɛ wie mun nin video wie mun jw.org su. Nian ndɛ akpasua “Sran kun yɛ ɔ yili-ɔ?” nin “Nguan’n i finwlɛ’n i su akunndan nga sran’m be bu’n” be nun.
“Sran yɛ ɔ kplan sua kwlaa-ɔ. I wafa kunngba’n, Ɲanmiɛn yɛ ɔ yili ninnge’n kwlaa-ɔ.”
5. Ninnge’m be yilɛ’n i su ndɛ nga Biblu’n kan’n, ɔ ti nanwlɛ
Bo Bolɛ ndɛ tre 1 nun’n, Biblu’n kan asiɛ’n nin ninnge nga be o su’n be yilɛ’n i ndɛ. ?Ndɛ sɔ’n ti nanwlɛ? An bo VIDEO’N, i sin’n an koko kosan yɛ’m be su yalɛ:
?Biblu’n se kɛ cɛn ba nsiɛn mɔ i kun di dɔ 24 yɛ Ɲanmiɛn fa yili asiɛ’n nin i su ninnge mun-ɔn?
?A bu i kɛ ninnge’m be yilɛ’n i su ndɛ nga Biblu’n kan’n, ɔ ti nanwlɛ? ?Ngue ti-ɔ?
An kanngan Bo Bolɛ 1:1 nun, i sin’n an koko kosan yɛ’n i su yalɛ:
Siansifuɛ’m be waan mɛn’n boli i bo cɛn kun. ?Wafa sɛ yɛ be ndɛ sɔ’n, ɔ nin ndɛ nga e kɛnngɛnnin i Biblu’n nun’n be kɔ likawlɛ-ɔ?
Sran wie’m be waan i bo bolɛ nun’n, Ɲanmiɛn yili ninnge kanngan wie mun yɛ kɛ ɔ́ kɔ́ i ɲrun’n be yoli dandan yɛ be kacili ninnge uflɛ wie mun. An kanngan Bo Bolɛ 1:21, 25, 27 nun, i sin’n an koko kosan yɛ’m be su yalɛ:
?Biblu’n kle kɛ i bo bolɛ nun’n, Ɲanmiɛn yili ninnge kanngan wie mun yɛ kɛ ɔ́ kɔ́ i ɲrun’n be yoli dandan yɛ be kacili jue, nin nnɛn, ɔ nin sran-ɔn? ?Annzɛ ɔ yili ninnge “wafawafa kwlaa”?
6. Wafa nga Ɲanmiɛn yili klɔ sran mun’n ti’n be ti be liɛ ngunmin
Klɔ sran’m be timan kɛ nnɛn mun sa. An kanngan Bo Bolɛ 1:26 nun, i sin’n an koko kosan yɛ’n i su yalɛ:
Ɲanmiɛn yili e kɛ i bɔbɔ sa. ?Ɔ maan kɛ e klo sran mɔ e si aunnvɔɛ’n, i sɔ kle kɛ Ɲanmiɛn ti sɛ?
SRAN WIE’M BE WAAN: “Ninnge’m be yilɛ’n i su ndɛ nga Biblu’n kan’n, ɔ ti ngua.”
?A bu ndɛ sɔ’n i sɛ? ?Ngue ti-ɔ?
NDƐ’N I KPƆLƐ BOLƐ
Zoova yɛ ɔ yili nglo nin asiɛ’n ɔ nin i su ninnge’n kwlaa-ɔ.
Ndɛ’n i nun flanlɛ
?Mɛn’n i bo bolɛ’n i su ndɛ benin yɛ Biblu’n kan-ɔn?
Sran wie’m be waan Ɲanmiɛn yili ninnge kanngan wie mun yɛ kɛ ɔ́ kɔ́ i ɲrun’n be yoli dandan yɛ be kacili ninnge uflɛ-ɔ. ?A bu i sɛ?
?Ngue ti yɛ klɔ sran’m be ti be liɛ ngunmin-ɔn?
NDƐ WIE MUN EKUN
Like nga ti yɛ e kwla se kɛ sran kun yɛ ɔ yili ninnge mun’n.
“?Ngue yɛ ninnge nga Ɲanmiɛn yili be’n, be kle e-ɔ?” (An Tinnge! nun ndɛ)
Wafa nga siɛ kun kwla yiyi ninnge’m be yilɛ’n i su ndɛ nga Biblu’n kan’n i nun kle i wa kan’n.
?Ndɛ nga be nga be se kɛ ninnge’m be boli nun sa ngbɛn’n be kan’n, ɔ nin ndɛ nga Biblu’n kan’n be kɔ likawlɛ?
“?Ɲanmiɛn yili like kun kpɛkun i sin yɛ like sɔ’n kacili ninnge uflɛ mun-ɔn?” (jw.org su ndɛ)
a Like suanlɛ 25 wá kán like nga ti yɛ Ɲanmiɛn yili klɔ sran’n i ndɛ.