LIKE SUANLƐ 34
?Wafa sɛ yɛ e kwla kle Zoova kɛ e klo i-ɔ?
?Kɛ ɔ fɛ i blɛ mɔ a boli Biblu’n nun like suanlɛ bo lele andɛ’n, a sieli i nzɔliɛ kɛ a nin Ɲanmiɛn amun afiɛn w’a mantan? ?A kunndɛ kɛ amun afiɛn mantan kpa ekun tra laa’n? Sɛ ɔ ti sɔ’n nán ɔ wla fi su kɛ, sɛ Zoova wun kɛ a klo i’n, i sɔ’n yó maan ɔ́ kló wɔ wie, yɛ ɔ́ nían ɔ lika. ?Ngue yɛ a kwla yo fa kle Zoova kɛ a klo i-ɔ?
1. ?Wafa sɛ yɛ e kwla kle Zoova kɛ e klo i-ɔ?
Sɛ e nanti Zoova i mmla’m be su’n, i lɛ nun yɛ é klé kɛ e klo i-ɔ. (Kanngan 1 Zan 5:3 nun.) Zoova mianman sran fi kɛ ɔ nanti i mmla’m be su, sanngɛ ɔ man e tinuntinun e atin naan e kle ajalɛ nga é fá’n. ?Ngue ti-ɔ? Afin Zoova kunndɛ kɛ ‘e fa ndɛ ng’ɔ kan kle e’n su e klunklo su.’ (Rɔmunfuɛ Mun 6:17) I sɔ’n kle kɛ Zoova kunndɛ kɛ klolɛ mɔ a klo i’n i ti yɛ a nanti i mmla’m be su-ɔ. Fluwa nga i akpasua 3 nin 4 bé wá úka wɔ naan w’a kpɔci ninnge nga Zoova kloman be’n naan w’a yo ninnge ng’ɔ klo be’n. I liɛ’n á klé kɛ a klo Zoova.
2. ?Ngue ti yɛ ɔ ju wie’n kɛ ɔ ko yo naan y’a kle kɛ e klo Zoova’n ɔ ti kekle-ɔ?
Biblu’n se kɛ “sa kekle sunman be tɔ sran kpa’n i su.” (Jue Mun 34:19) Fɔ m’ɔ o e nun’n kle e kwlaa e yalɛ. Asa’n, ninnge kɛ sika ndɛ’n ɔ nin sran lufle bulɛ sa’n be kle e yalɛ wie. Ɔ ju wie’n kɛ sa kekle wie’m be tɔ e su’n, kɛ ɔ ko yo naan y’a yo Zoova i klun sa’n ɔ timan pɔpɔ. Wie liɛ’n sa tɛ’n yɛ i yolɛ’n ti pɔpɔ-ɔ. Sanngɛ kɛ e mian e ɲin e yo Zoova i klun sa’n, e kle kɛ e klo i tra like kwlaa. Kpɛkun e kle kɛ e nin i e nanti klanman. Ɔ maan i kusu su kpɔciman e le.—Kanngan Jue Mun 4:3 nun.
SI NDƐ’N NUN KPA EKUN
É wá kán like nga ti yɛ ɔ ti cinnjin kɛ e yo Zoova i klun sa’n, ɔ nin like ng’ɔ kwla uka e i sɔ yolɛ nun’n be ndɛ.
3. Ndɛ kun m’ɔ ti ɔ liɛ wie’n
Zɔbu fluwa’n nun’n, nán Zɔbu ngunmin yɛ Satan tɔnnin i suɛn-ɔn. Sanngɛ ndɛ ng’ɔ kannin’n ɔ ti Zoova i sufuɛ’m be kwlaa be liɛ. An kanngan Zɔbu 1:1, 6–2:10 nun, i sin’n an koko kosan yɛ’m be su yalɛ:
?Satan waan ngue ti yɛ Zɔbu su Zoova-ɔ? —Nian Zɔbu 1:9-11 nun.
?Satan waan ngue yɛ ɔ ti sran’m be cinnjin-ɔn? —Nian Zɔbu 2:4 nun.
An kanngan Zɔbu 27:5b nun, i sin’n an koko kosan yɛ’n i su yalɛ:
?Wafa sɛ yɛ Zɔbu kleli kɛ ɔ klo Zoova sakpa-ɔ?
Zɔbu kleli kɛ ɔ klo Ɲanmiɛn. Yɛle kɛ w’a kpɔcimɛn i.
Kɛ e nin Ɲanmiɛn e nanti klanman’n e kle kɛ e klo i.
4. Yo maan Zoova i klun jɔ
An kanngan Ɲanndra Mun 27:11 nun, i sin’n an koko kosan yɛ’m be su yalɛ:
?Kɛ e nanti Zoova i mmla’m be su’n i sɔ’n yo i sɛ? ?Ngue ti-ɔ?
5. A nin Zoova be kwla nanti klanman
Klolɛ mɔ e klo Zoova’n ti’n e kɛn i ndɛ e kle e wiengu mun. Kannzɛ i sɔ yolɛ’n kwla yo kekle blɛ wie nun’n, e yacimɛn i yolɛ. An bo VIDEO’N, i sin’n an koko kosan yɛ’m be su yalɛ.
?Kɛ ɔ ko yo naan w’a kan Zoova i ndɛ w’a kle ɔ wiengu mun’n, ɔ ti kekle man wɔ?
?Video’n nun’n, ngue yɛ ɔ ukali Jezɔnun naan w’a kwla kan Ɲanmiɛn ndɛ’n niɔn?
Kɛ e klo ninnge nga Zoova klo be’n, mɔ e kpɔ ninnge nga Zoova kpɔ be’n, i sɔ’n uka e naan e nin Ɲanmiɛn y’a kwla nanti klanman titi. An kanngan Jue Mun 97:10 nun, i sin’n an koko kosan yɛ’m be su yalɛ:
?Kɛ a suannin Biblu’n nun like’n ninnge benin wie mun yɛ a wunnin kɛ Zoova klo be-ɔ? ?Yɛ ninnge benin mun yɛ ɔ kpɔ be-ɔ?
?Ngue yɛ ɔ kwla uka ɔ naan w’a klo ninnge nga be ti kpa’n naan w’a kpɔ ninnge nga be ti tɛ’n niɔn?
6. Kɛ e fa Zoova i ndɛ’n su’n e ɲan su ye
Like kpafuɛ nga e kwla yo’n yɛle Zoova i mmla’m be su nantilɛ. An kanngan Ezai 48:17, 18 nun, i sin’n an koko kosan yɛ’m be su yalɛ:
?A lafi su kɛ Zoova si like ng’ɔ ti kpa man e’n blɛ kwlaa nun? ?Ngue ti yɛ a bu i sɔ-ɔ?
?Wafa sɛ yɛ like nga a suɛnnin i Zoova su’n ɔ ukali wɔ-ɔ?
SRAN WIE’M BE WAAN: “Ɲanmiɛn fɛmɛn i ɲin siemɛn i ninnge nga e yo’n be su.”
?Biblu’n nun ndɛ mma benin yɛ a kwla fa kle kɛ ninnge nga e yo be’n be kwla yo maan Zoova i klun jɔ, annzɛ be kwla yo i ya-ɔ?
NDƐ’N I KPƆLƐ BOLƐ
Sɛ e nanti Zoova i mmla’m be su naan e kpɔcimɛn i’n, i lɛ nun yɛ é klé kɛ e klo i-ɔ.
Ndɛ’n i nun flanlɛ
?Ngue yɛ Zɔbu i su ndɛ’n kle e-ɔ?
?Wafa sɛ yɛ a kwla kle kɛ a klo Zoova-ɔ?
?Ngue yɛ ɔ́ úka ɔ naan a nin Zoova b’a nanti klanman titi-ɔ?
NDƐ WIE MUN EKUN
Wafa nga a nin Zoova be kwla nanti klanman titi’n, ɔ nin wafa nga a kwla suan asɔnun’n i bo’n.
“Sran ng’ɔ nin wɔ be nanti klanman’n a nin i be nanti klanman” (16:49)
Suɛn nga Satan tɔnnin klɔ sran mun’n i su ndɛ wie mun ekun.
“Zɔbu nin Ɲanmiɛn be nantili klanman” (Fluwa ?Ndɛ benin yɛ Biblu’n kan-ɔn? i nun ndɛ)
Wafa nga ba kanngan’m be kwla kle kɛ be klo Zoova’n.
?Wafa sɛ yɛ gbanflɛn kun annzɛ talua kun mɔ i wiengu’m be kle i yalɛ’n ɔ nin Zoova be kwla nanti klanman titi-ɔ?