LIKE SUANLƐ 37
?Junman’n nin sika’n be su ndɛ benin yɛ Biblu’n kan-ɔn?
?W’a koko sika nin junman be ti le? Kɛ ɔ ko yo naan y’a su Zoova kɛ ng’ɔ nin i fata’n sa, naan blɛ kunngba’n nun y’a kunndɛ e nuan nun aliɛ’n, ɔ ju wie’n ɔ timan pɔpɔ. Biblu’n man e afɔtuɛ kpakpa wie mɔ be kwla uka e-ɔ.
1. ?Junman dilɛ’n i su ndɛ benin yɛ Biblu’n kan-ɔn?
Zoova kunndɛ kɛ e di junman nga e di’n i su aklunjɔɛ. Biblu’n se kɛ ‘kɛ sran kun di i junman’n su aklunjɔɛ’n like fi i kpa traman ngalɛ’n.’ (Akunndanfuɛ’n 2:24) Zoova di junman kekle. Kɛ e niɛn i liɛ’n su’n i klun jɔ, yɛ e kusu e di aklunjɔɛ wie.
Junman dilɛ’n ti cinnjin. Sanngɛ ɔ fataman kɛ junman dilɛ’n ɔ yo e cinnjin tra Zoova i sulɛ’n. (Zan 6:27) Zoova tali e nda kɛ sɛ e fɛ i sulɛ’n e sie i like kwlaa ɲrun’n, ɔ́ nían e lika.
2. ?Wafa sɛ yɛ ɔ fata kɛ e bu sika’n niɔn?
Biblu’n se kɛ ‘sika’n sasa sran.’ Sanngɛ ɔ kan gua su kɛ sika ngunmin kwlá yoman naan sran kun w’a di aklunjɔɛ. (Akunndanfuɛ’n 7:12) I sɔ’n ti’n, Biblu’n wla e fanngan kɛ nán maan e klo sika dan. Sanngɛ ‘maan like nga e le i dɔ nga su’n ɔ ju e.’ (Kanngan Ebre Mun 13:5 nun.) Kɛ like nga e le i’n ɔ ju e’n, e kokoman dan. Asa’n e faman kalɛ ngbɛnngbɛn. (Ɲanndra Mun 22:7) Asa ekun’n, e toman mma sika su naan y’a kpɛ ndɛ y’a man e wun ngbɛn. Yɛ e faman e wun e wlaman ninnge nga sran’m be se kɛ sɛ e yo’n, é ɲán sika ndɛndɛ’n be nun.
3. ?Wafa sɛ yɛ e kwla fa e sika’n e yo e wiengu’m be ye-ɔ?
Zoova i klun ti ufue. Kɛ e kusu e klun ti ufue mɔ ‘e sa timan tankaan’n’ e kle kɛ e niɛn i ajalɛ’n su. (1 Timote 6:18) I sɔ yolɛ nun’n, e kwla man sika e suan e wiengu’m be bo. I li e niaan nga e nin be e su Zoova likawlɛ’n yɛ ɔ fata kɛ e yo sɔ be lika kpa-ɔ. Like nga e man’n sɛ ɔ ti kaan-o annzɛ ɔ ti dan-o, nɛ́n i lifuɛ’n yɛ Zoova fɛ i ɲin sie su-ɔ. Sanngɛ like nga ti yɛ e man like’n yɛ ɔ ti Zoova i cinnjin-ɔn. Kɛ e tu e klun e man e wiengu’m be like’n e di aklunjɔɛ, kpɛkun Zoova i klun jɔ.—Kanngan Sa Nga Be Yoli’n 20:35 nun.
SI NDƐ’N NUN KPA EKUN
Kɛ e diman junman e tratraman su’n, mɔ like nga e le i’n ɔ ju e’n, i su ye nga e ɲɛn i’n é wá kɛ́n i ndɛ.
4. Maan wafa nga e di junman’n ɔ manman Zoova
Maan e di junman kɛ nga Zoova fa klo’n sa. An bo VIDEO’N, i sin’n an koko kosan yɛ’m be su yalɛ.
?Ngue yɛ a klo i wafa nga Jezɔnun di junman’n nun-ɔn?
?Ajalɛ benin yɛ ɔ fali naan w’a diman junman w’a tratraman su-ɔ?
An kanngan Kolɔsufuɛ Mun 3:23, 24 nun, i sin’n an koko kosan yɛ’m be su yalɛ:
?Wafa nga e di junman’n ɔ ti cinnjin? ?Ngue ti-ɔ?
Junman’n ti cinnjin sɔ. Sanngɛ ɔ fataman kɛ ɔ yo e cinnjin tra Zoova i sulɛ’n.
5. Kɛ like nga e le i’n ɔ ju e’n e ɲan su ye
Sran sunman be kunndɛ kɛ bé ɲán sika kpanngban. Sanngɛ nɛ́n i sɔ’n yɛ Biblu’n wla e fanngan kɛ e yo-ɔ. An kanngan 1 Timote 6:6-8 nun, i sin’n an koko kosan yɛ’n i su yalɛ:
?Ngue yɛ Biblu’n wla e fanngan kɛ e yo-ɔ?
Kannzɛ bɔbɔ e sa nun yoman fɛ’n sanngɛ e kwla di aklunjɔɛ. An bo VIDEO’N, i sin’n an koko kosan yɛ’n i su yalɛ.
?Kannzɛ bɔbɔ awlobo nga be kleli be video’n nun’n, be sa nun yoman fɛ’n, sanngɛ ngue yɛ ɔ yo maan be di aklunjɔɛ ɔ?
Sran wie’m be liɛ’n sika nga be le i’n ɔ juman be le. Zezi kleli kɛ i sɔ’n timan kpa. An kanngan Liki 12:15-21 nun, i sin’n an koko kosan yɛ’n i su yalɛ:
?Ngue yɛ sunnzun ase nga Zezi fali’n ɔ kle e-ɔ? —Nian ndɛ mma 15 nun.
An kanngan Ɲanndra Mun 10:22 nun yɛ amun fa sunnzun 1 Timote 6:10. I sin’n an koko kosan yɛ’m be su yalɛ:
?Zoova i janvuɛ tralɛ’n annzɛ sika kpanngban ɲanlɛ’n, beninfuɛ’n yɛ ɔ ti cinnjin-ɔn? ?Ngue ti-ɔ?
?Sɛ sika nga e le i’n ɔ juman e le’n, sa benin yɛ ɔ kwla ɲan e-ɔ?
6. Zoova wá nían e lika
Kɛ junman ndɛ’n ti kekle e su’n, annzɛ e leman sika’n, Zoova su lafilɛ’n kwla yo kekle man e. An bo VIDEO’N. Ɔ kan like nga e kwla yo i blɛ sɔ’n nun’n i ndɛ. I sin’n an koko kosan yɛ’m be su yalɛ.
?Video’n nun’n, sa benin yɛ ɔ tɔli aniaan’n su?
?Ngue yɛ ɔ yoli naan w’a kwla jran sa sɔ’n i ɲrun kekle-ɔ?
An kanngan Matie 6:25-34 nun, i sin’n an koko kosan yɛ’n i su yalɛ:
?Be nga be dun mmua yo Zoova i klun sa’n, ngue yɛ Zoova wá yó mán be-ɔ?
SRAN WIE’M BE WAAN: “Ɔ fata kɛ n di junman kekle naan n nian min awlofuɛ’m be lika. N kwlá tranman aɲia’m be bo lemɔcuɛ kwlaa.”
?Biblu’n nun ndɛ benin yɛ ɔ kle wɔ kɛ sɛ e fa Zoova i sulɛ’n e sie i like kwlaa ɲrun’n, ɔ ti kpa-ɔ?
NDƐ’N I KPƆLƐ BOLƐ
Sika kunndɛlɛ’n nin junman dilɛ’n be ti cinnjin, sanngɛ ɔ fataman kɛ be tanndan e ɲrun Zoova i sulɛ’n nun.
Ndɛ’n i nun flanlɛ
?Ngue yɛ ɔ kwla uka wɔ naan w’a bu junman dilɛ’n kɛ ng’ɔ nin i fata’n sa-ɔ?
?Kɛ like nga e le i’n ɔ ju e’n i su ye benin yɛ e ɲɛn i-ɔ?
Zoova seli kɛ ɔ́ níɛn i sufuɛ’m be lika. ?Wafa sɛ yɛ a kwla kle kɛ a lafi ndɛ sɔ’n su-ɔ?
NDƐ WIE MUN EKUN
Nian sika’n i su ndɛ nga Biblu’n kan’n.
“?Sika’n yɛ ɔ ti sa tɛ’n be kwlaa be bo’n niɔn?” (jw.org su ndɛ)
Sa nga ti yɛ e man like’n ɔ ti Ɲanmiɛn i cinnjin.
“?Ngue ndɛ yɛ Biblu’n kɛn i sran like manlɛ’n su-ɔ?” (jw.org su ndɛ)
?Mma tolɛ sika su’n ɔ ti like tɛ?
“Ndɛ nga Biblu’n kɛn i sika tolɛ mma su’n i su’n” (An tinnge! Afuɛ 2015, Marsi)
Like ng’ɔ ukali bian kun m’ɔ to mma sika su, m’ɔ ti nzaje sa yofuɛ’n naan w’a kaci i ayeliɛ’n.
“Laa’n n klo nnɛn kpanngɔ nga be si wanndilɛ’n nun akplowa’n be kpa” (Sasafuɛ Tranwlɛ’n nun ndɛ)