LIKE SUANLƐ 38
Maan e kle kɛ nguan’n ti e cinnjin
Kɛ e o nguan nun’n e kwla yo ninnge kpanngban naan y’a di aklunjɔɛ. Kannzɛ bɔbɔ sa wie’m be o e su’n sanngɛ e kwla di aklunjɔɛ. ?Wafa sɛ yɛ e kwla kle kɛ nguan’n ti e cinnjin-ɔn? ?Ngue ti yɛ i sɔ yolɛ’n ti cinnjin-ɔn?
1. ?Ngue ti yɛ ɔ fata kɛ e kle kɛ nguan’n ti e cinnjin-ɔn?
Ɔ fata kɛ e kle kɛ nguan’n ti e cinnjin afin e Si Zoova m’ɔ klo e’n yɛ ɔ fa cɛli e-ɔ. Biblu’n se kɛ ‘nguan’n i bo’n ɔ o Ɲanmiɛn wun lɔ.’ I ti yɛ e kwlaa e o nguan nun-ɔn. (Jue Mun 36:9) ‘Ɲanmiɛn yɛ ɔ man sran’m be kwlaa be nguan-ɔn. Asa ekun’n, i ti yɛ be lo wunmiɛn-ɔn.’ (Sa Nga Be Yoli’n 17:25, 28) Zoova man e like kwlaa nga e sa miɛn i wun naan y’a ka nguan nun’n. Yɛ ɔ man e ninnge nga e sa miɛn i wun naan y’a kwla di aklunjɔɛ titi’n.—Kanngan Sa Nga Be Yoli’n 14:17 nun.
2. ?Wafa sɛ yɛ e kwla kle Zoova kɛ nguan’n ti e cinnjin-ɔn?
I nun nga e te o e nin klun lɔ bɔbɔ’n e ndɛ lo Zoova. Srɛlɛ kun nun’n, Ɲanmiɛn i sufuɛ kun m’ɔ suan Davidi’n seli kɛ: “I nun mɔ n te yo mmoja min nin i ku sɛ’n nun bɔbɔ’n, ɔ ɲinma’m be wunnin min.” (Jue Mun 139:16) E nguan’n ti Zoova i cinnjin kpa. (Kanngan Matie 10:29-31 nun.) I sɔ’n ti’n, sɛ sran kun i bɔbɔ i ɲinfu ɔ kun sran uflɛ annzɛ ɔ kun i wun’n, ɔ́ yó Zoova i ya kpa.a (Ezipti Lɔ Tulɛ 20:13) Sɛ e fa e bɔbɔ e nguan’n annzɛ e wiengu’m be nguan’n e sie i wie nuan’n, i sɔ’n su yoman Zoova i fɛ kaan sa. Sɛ e nian e wun su naan y’a yoman sɔ’n, é klé kɛ nguan mɔ Zoova fa cɛli e’n ti e cinnjin.
SI NDƐ’N NUN KPA EKUN
É wá kán wafa nga a kwla kle kɛ nguan’n ti ɔ cinnjin’n i ndɛ.
3. Nian ɔ wun su naan w’a tɔman tukpacɛ
Klisifuɛ mɔ be fali be wun be mannin Ɲanmiɛn’n, like ng’ɔ ti be cinnjin’n yɛle Ɲanmiɛn i klun sa’n i yolɛ. Ɔ ti kɛ b’a fa be wun b’a yi tɛ b’a man Ɲanmiɛn sa. An kanngan Rɔmunfuɛ Mun 12:1, 2 nun, i sin’n an koko kosan yɛ’m be su yalɛ:
?Ngue ti yɛ ɔ fata kɛ e nian e wun su naan y’a tɔman tukpacɛ-ɔ?
?Ninnge benin wie mun yɛ e kwla yo naan i sɔ liɛ’n w’a yo ye-ɔ?
4. Nian ɔ wun su naan like yaya w’a yoman wɔ annzɛ w’a wuman
Biblu’n se e kɛ nán e yo ninnge wie mɔ be kwla fa e nguan’n sie i wie nuan-ɔn. An bo VIDEO’N. Ɔ kan sa nga e kwla yo be naan y’a nian e wun su’n be ndɛ.
An kanngan Ɲanndra Mun 22:3 nun, i sin’n an koko wafa nga a kwla nian ɔ wun su naan sa w’a ɲanman wɔ, annzɛ sran uflɛ’n i su yalɛ.
Awlo lɔ.
Junman su lɔ.
Kɛ á yíyí ɔ ɲin su’n.
Kɛ a o loto nun annzɛ moto su’n.
5. Maan ba ng’ɔ te o i nin ku sɛ nun’n i nguan’n yo wɔ cinnjin
Davidi seli kɛ ba ng’ɔ te o i nin ku sɛ nun’n, i nguan’n ti Zoova i cinnjin. An kanngan Jue Mun 139:13-17 nun, i sin’n an koko kosan yɛ’m be su yalɛ:
?Zoova ɲrun’n blɛ benin nun yɛ nguan’n bo i bo-ɔ? ?Kɛ e te o e nin i ku sɛ nun’n annzɛ kɛ be ko wun e’n niɔn?
Laa’n mmla nga Zoova fa mannin Izraɛlifuɛ mun’n, ɔ sasa wunnzɛfuɛ mun, ɔ nin be mma nga be o be ku sɛ’n nun’n. An kanngan Ezipti Lɔ Tulɛ 21:22, 23 nun, i sin’n an koko kosan yɛ’m be su yalɛ:
?Wafa sɛ yɛ Zoova bu sran kun mɔ nɛ́n i ɲinfu yɛ ɔ kunnin ba kun m’ɔ te o i nin i ku sɛ’n nun’n niɔn?
?Ɔ maan sɛ sran kun i ɲinfu kun ba kun m’ɔ te o i nin i ku sɛ’n nun’n, wafa sɛ yɛ Ɲanmiɛn bú i-ɔ?b
?Wafa sɛ yɛ a bu i sɔ liɛ’n niɔn?
Kannzɛ bɔbɔ bla kun bu nguan’n i like cinnjin’n, sanngɛ blɛ wie nun’n ɔ kwla se i wun kɛ kuɛ tulɛ’n kwla ti i wun ɲanman nun. An kanngan Ezai 41:10 nun, i sin’n an koko kosan yɛ’m be su yalɛ:
?Sɛ be mian bla kun kɛ ɔ tu kuɛ’n, ngue yɛ ɔ kwla ukɛ i-ɔ? ?Ngue ti-ɔ?
SRAN WIE’M BE WAAN: “Bla kun le atin se kɛ ɔ́ tú kuɛ annzɛ ɔ su tuman. I bɔbɔ i ndɛ-ɔ.”
?Ngue ti yɛ a bu i kɛ ba ng’ɔ te o i nin ku sɛ nun’n ɔ nin i nin, be nguan’n ti Zoova i cinnjin-ɔn?
NDƐ’N I KPƆLƐ BOLƐ
Biblu’n se e kɛ e klo nguan mɔ Zoova fa cɛli e’n, naan e bu i like cinnjin. Ɔ fata kɛ e yo i sɔ e bɔbɔ nin e wiengu’m be lika.
Ndɛ’n i nun flanlɛ
?Ngue ti yɛ nguan’n ti cinnjin Zoova ɲrun-ɔn?
?Kɛ sran kun i bɔbɔ i ɲinfu kun sran uflɛ’n, wafa sɛ yɛ Zoova i wun yo i-ɔ?
?Kɛ e o nguan nun’n i sɔ’n yo ɔ fɛ? ?Ngue ti-ɔ?
NDƐ WIE MUN EKUN
?Wafa sɛ yɛ e kwla kle Zoova kɛ e si nguan m’ɔ fa cɛli e’n i su ye-ɔ?
?Ɲanmiɛn kwla yaci bla kun m’ɔ tuli kuɛ’n i wun sa’n cɛ i?
“?Kuɛ tulɛ’n i su ndɛ benin yɛ Biblu’n kan-ɔn?” (jw.org su ndɛ)
Sɛ nguan’n ti e cinnjin annzɛ ɔ timan e cinnjin’n, wafa nga e yiyi e ɲin su’n ɔ́ yí i sɔ liɛ’n nglo.
“Be ɲin su yiyilɛ wafa ng’ɔ fa be nguan’n sie i wie nuan’n” (An Tinnge! nun ndɛ)
Wafa nga Biblu’n nun ndɛ’n kwla uka sran kun m’ɔ kunndɛ kɛ ɔ́ kún i wun’n.
“Biblu’n kwla uka sran kun m’ɔ kunndɛ kɛ ɔ́ kún i wun’n” (jw.org su ndɛ)
a Be nga be awlɛn w’a kpɔtɔ’n be ndɛ lo Zoova. (Jue Mun 34:18) Wafa nga sran kun i wun yo i’n, m’ɔ kwla kunndɛ kɛ ɔ́ kún i wun’n, Zoova wun i sɔ liɛ’n i wlɛ, yɛ ɔ kunndɛ kɛ ɔ́ úkɛ i sɔfuɛ’n. Sɛ a kunndɛ kɛ á wún wafa nga Zoova ukɛ i sɔfuɛ mun’n, kanngan ndɛ nga be flɛ i kɛ “Biblu’n kwla uka sran kun m’ɔ kunndɛ kɛ ɔ́ kún i wun’n” nun. Ɔ o ndɛ akpasua ng’ɔ suan Ndɛ Wie Mun Ekun i nun.
b Sɛ sran kun tuli kuɛ laa’n, ɔ fataman kɛ i akunndan’n bu i fɔ tratra su. Afin Zoova kwla yaci i wun sa’n cɛ i. Sɛ a kunndɛ kɛ á sí ndɛ’n nun kpa ekun’n, kanngan ndɛ nga be flɛ i kɛ “?Kuɛ tulɛ’n i su ndɛ benin yɛ Biblu’n kan-ɔn?” nun. Ɔ o ndɛ akpasua nga be flɛ i kɛ Ndɛ Wie Mun Ekun i nun.