LIKE SUANLƐ 13
Ɲanmiɛn sulɛ wafa nga be timan su’n be saci Ɲanmiɛn i dunman
Ɲanmiɛn ti klolɛ. ?Sɛ ɔ ti sɔ’n ngue ti yɛ Ɲanmiɛn sulɛ wafa’m be yo sa tɛtɛ kpanngban sɔ-ɔ? Yɛle kɛ Ɲanmiɛn sulɛ wafa sɔ’m be timan su. Be saci Ɲanmiɛn i dunman. ?Ngue yɛ be yo m’ɔ saci Ɲanmiɛn i dunman-ɔn? ?Wafa sɛ yɛ Ɲanmiɛn bu i sɔ liɛ’n niɔn? ?Ngue yɛ Ɲanmiɛn wá yó-ɔ?
1. ?Wafa sɛ yɛ like nga be kle’n ɔ saci Ɲanmiɛn i dunman-ɔn?
Ɲanmiɛn sulɛ wafa nga be timan su’n be kanman ndɛ nanwlɛ m’ɔ fin Ɲanmiɛn’n, “ato ndɛ’n su yɛ be lafi-ɔ.” (Rɔmunfuɛ Mun 1:25) I wie yɛle kɛ be nun kpanngban b’a faman Ɲanmiɛn i dunman’n b’a kleman be nga be su be su’n. Kusu nn Biblu’n se kɛ ɔ fata kɛ sran’m be bo Ɲanmiɛn i dunman’n. (Rɔmunfuɛ Mun 10:13, 14) Ɲanmiɛn sulɛ wafa wie’m be su kpɛnngbɛn’m be se sran’m be kɛ sa kekle nga be ju’n be fin Ɲanmiɛn. Sanngɛ i sɔ’n ti ato. Ɲanmiɛn faman sa tɛ yiman sran su le. (Kanngan Zaki 1:13 nun.) Ng’ɔ yo ɲrɛnnɛn’n yɛle kɛ be ato ndɛ sɔ’m be ti’n sran wie’m b’a faman be wun b’a mantanman Ɲanmiɛn kun.
2. ?Wafa sɛ yɛ like nga be yo’n ɔ saci Ɲanmiɛn i dunman-ɔn?
Ɲanmiɛn sulɛ wafa nga be timan su’n be kloman sran kɛ Zoova sa. Biblu’n se kɛ be sa tɛtɛ mun “b’a sɔn lele b’a ju ɲanmiɛn su lɔ.” (Sa Nglo Yilɛ 18:5) Kɛ ɔ fɛ i laa lele andɛ’n, Ɲanmiɛn sulɛ wafa nga be timan su’n be fa be wun wlɛ i politiki nun, be suan alɛ kunlɛ’n i bo. Yɛ be dunman nun ti’n, sran kpanngban kpa be wuli. Be su kpɛn’m be nun wie mun be klo pɔɔ nun tranlɛ. Kpɛkun be mian be nga be su be su’n be kɛ be man be sika naan b’a kwla yo sɔ titi. Be ayeliɛ sɔ’n kle kɛ be siman Ɲanmiɛn, yɛ be leman atin be ijɔmɛn i nuan.—Kanngan 1 Zan 4:8 nun.
3. ?Wafa sɛ yɛ Ɲanmiɛn bu i sulɛ wafa nga be timan su’n niɔn?
Kɛ e wun ninnge nga Ɲanmiɛn sulɛ wafa sɔ’m be yo’n ɔ yo e ya. ?Yɛ nn wafa sɛ yɛ Zoova bɔbɔ bu be-ɔ? Ɲanmiɛn klo sran. Ɔ maan kɛ ɔ wun kɛ be nga be tɔn be wun suɛn kɛ be su i’n be laka sran mun’n i sɔ’n yo i ya. Ɲanmiɛn seli kɛ ɔ́ wá núnnún i sulɛ wafa ng’ɔ timan su’n, “yɛ be su wunmɛn i kun mlɔnmlɔnmlɔn.” (Sa Nglo Yilɛ 18:21) Ɔ maan ɔ cɛ kan’n, Ɲanmiɛn wá núnnún i sulɛ wafa ng’ɔ timan su’n.—Sa Nglo Yilɛ 18:8.
SI NDƐ’N NUN KPA EKUN
Maan e fa e ɲin e sie i wafa nga Ɲanmiɛn bu i sulɛ wafa ng’ɔ timan su’n i su. I sin’n, é wá kán like nga Ɲanmiɛn sulɛ wafa sɔ’m be yo’n i ndɛ. Yɛ é kán sa nga ti yɛ ɔ fataman kɛ i sɔ’n bubu ɔ sa sin’n i ndɛ wie.
4. Ɲanmiɛn i klun jɔman i sulɛ wafa kwlaa su
Sran kpanngban be waan Ɲanmiɛn sulɛ wafa’m be ti kɛ atin fanunfanun mɔ be kwlaa be fa e kɔ Ɲanmiɛn wun lɔ’n sa. ?Sanngɛ i sɔ’n ti su? An kanngan Matie 7:13, 14 nun. I sin’n an koko kosan yɛ’n i su yalɛ.
?Akpɔ nga i agualiɛ’n yɛle nguan’n i su ndɛ benin yɛ Biblu’n kan-ɔn?
An bo VIDEO’N, i sin’n an koko kosan yɛ’n i su yalɛ.
?Biblu’n se kɛ Ɲanmiɛn i klun jɔ i sulɛ wafa kwlaa su?
5. Ɲanmiɛn sulɛ wafa nga be timan su’n be yiman Ɲanmiɛn i klolɛ’n i nglo
Ɲanmiɛn sulɛ wafa’m be saci Ɲanmiɛn i dunman ninnge sunman nun. I kun yɛle kɛ be fali be wun wlali alɛ kunlɛ’n nun. Sa kun m’ɔ kle sɔ’n yɛ. An bo VIDEO’N, i sin’n an koko kosan yɛ’m be su yalɛ.
?Alɛ Dan Nɲɔn Su’n nun’n, ngue yɛ asɔnun kpanngban be yoli-ɔ?
?A bu like nga be yoli’n i sɛ?
An kanngan Zan 13:34, 35 ɔ nin 17:16 nun. I sin’n an koko kosan yɛ’m be su yalɛ:
?Kɛ Ɲanmiɛn sulɛ wafa’m be fa be wun wla alɛ kunlɛ nun’n i sɔ’n yo Zoova sɛ?
Ɲanmiɛn sulɛ wafa nga be timan su’n be yoli sa tɛ kpanngban. ?Ngue yɛ be yoli m’ɔ kle kɛ be yiman Ɲanmiɛn i klolɛ’n i nglo mɔ ɔ bɔbɔ a sieli i nzɔliɛ-ɔ?
Ɲanmiɛn sulɛ wafa nga be timan su’n b’a yiman Ɲanmiɛn i klolɛ’n i nglo.
6. Ɲanmiɛn kunndɛ kɛ ɔ́ yó naan sran’m be fin i sulɛ wafa nga be timan su’n be nun fite
An kanngan Sa Nglo Yilɛ 18:4 nun,a i sin’n an koko kosan yɛ’n i su yalɛ.
?Kɛ ɔ bɔbɔ a wun kɛ Ɲanmiɛn kunndɛ kɛ ɔ́ yó naan sran’m be fin i sulɛ wafa nga be timan su’n be nun be fite’n i sɔ’n yo wɔ sɛ?
7. Nán yaci Ɲanmiɛn i su like suanlɛ
?Like nga Ɲanmiɛn sulɛ wafa nga be timan su’n be yo’n ti’n, ɔ fata kɛ a yaci Ɲanmiɛn i su like suanlɛ? Maan e se kɛ ba kun i ɲin yimɛn i si. Ɔ jaso awlo’n nun kpɛkun ɔ ko yo sa tɛtɛ wie mun. Siɛ’n i klun jɔman like nga i wa’n yoli’n su. ?Kɛ a niɛn i sa’n, ɔ fata kɛ be fa sa tɛ nga ba ɲin keklefuɛ sɔ’n yo’n be fa guɛ i si su?
?Sa tɛ nga Ɲanmiɛn sulɛ wafa nga be timan su’n be yo’n, ɔ fata kɛ e fa guɛ i Zoova su naan e se kɛ e suɛnmɛn i su like kun?
SRAN WIE’M BE WAAN: “Ɲanmiɛn ndɛ’n timan min cinnjin. Afin be nga be waan be su Ɲanmiɛn bɔbɔ’n be yɛ be kpɛ ndɛ man sran mun-ɔn.”
?Akunndan kunngba’n yɛ a bu-ɔ?
?Ngue ti yɛ ɔ fataman kɛ Ɲanmiɛn sulɛ wafa nga be timan su’n be ti’n e se kɛ e suman Zoova-ɔ?
NDƐ’N I KPƆLƐ BOLƐ
Ɲanmiɛn sulɛ wafa nga be timan su’n be like nga be kle’n, ɔ nin be sa tɛtɛ nga be yo’n ti’n be saci Ɲanmiɛn i dunman. Ɲanmiɛn wá núnnún be.
Ndɛ’n i nun flanlɛ
?Kɛ a wun like nga Ɲanmiɛn sulɛ wafa nga be timan su’n be kle’n ɔ nin sa nga be yo’n i sɔ’n yo ɔ sɛ?
?Wafa sɛ yɛ Zoova bu be-ɔ?
?Ngue yɛ Ɲanmiɛn wá fá yó be-ɔ?
NDƐ WIE MUN EKUN
Ninnge nɲɔn mɔ be nun’n Ɲanmiɛn sulɛ wafa nga be timan su’n be saci Ɲanmiɛn i dunman’n.
?Ngue ti yɛ Ɲanmiɛn kunndɛ kɛ e yia e su i likawlɛ-ɔ?
“?Ɔ ti cinnjin kɛ e nin sran wie mun e su Ɲanmiɛn likawlɛ?” (jw.org su ndɛ)
Plɛti kun i sa sin bubuli i i asɔnun’n ti. Sanngɛ w’a seman kɛ ɔ́ yáci Ɲanmiɛn i su ndɛ nanwlɛ’n i kunndɛlɛ.
“Plɛti kun m’ɔ jasoli i asɔnun’n nun’n” (An Tinnge! nun ndɛ)
Ɲanmiɛn sulɛ wafa’m be kan Ɲanmiɛn i su ndɛ wie m’ɔ timan nanwlɛ-ɔ. I sɔ’n ti’n, sran wie’m be bu i kɛ be kwlá faman be wun be mantanman Ɲanmiɛn. Ato ndɛ nga be kan’n be nun nsan yɛ.
a Sɛ a kunndɛ kɛ á sí sa nga ti yɛ Sa Nglo Yilɛ fluwa’n nun’n, be fa Ɲanmiɛn sulɛ wafa nga be timan su’n be sunnzun bla kun mɔ i dunman’n yɛle Babilɔnin Klɔ Dan’n, nian Ndɛ Wie’m be nun Yiyilɛ 1 i nun.