LIKE SUANLƐ 39
Wafa nga Ɲanmiɛn bu mmoja’n
Mmoja’n ti like cinnjin kpa. Sran ng’ɔ leman mmoja’n ɔ kwlá tranman nguan nun. Kɛ mɔ Ɲanmiɛn yɛ ɔ yili e’n ti’n, ɔ le atin kle e like ng’ɔ fata kɛ e fa mmoja’n e yo’n. ?Mmoja’n i su ndɛ benin yɛ Ɲanmiɛn kannin-ɔn? ?E kwla di mmoja annzɛ kusu e kwla fa wla e kplo’n nun? ?Ngue yɛ ɔ kwla uka e naan y’a faman mmoja’n y’a yoman like tɛ-ɔ?
1. ?Wafa sɛ yɛ Zoova bu mmoja’n niɔn?
Laa’n Zoova seli i sufuɛ’m be kɛ: “Ninnge kwlaa nga be o nguan nun’n, be nguan’n yɛle be mmoja’n.” (Sanwun Yolɛ 17:14) Zoova ɲrun’n, mmoja’n ti nguan’n i nzɔliɛ. Kɛ mɔ nguan’n ɔ ti like cinnjin kpa mɔ Ɲanmiɛn fa cɛli e’n ti’n, mmoja’n kusu ɔ ti like cinnjin wie.
2. ?Ngue yɛ Ɲanmiɛn kunndɛman kɛ e fa mmoja’n e yo-ɔ?
Ka naan Klisifuɛ’m be blɛ’n w’a ju’n, Zoova dun mma seli i sufuɛ’m be kɛ nán maan be di mmoja. (Kanngan Bo Bolɛ 9:4 nin Sanwun Yolɛ 17:10 nun.) Klisifuɛ klikli’m be blɛ su’n, Zoova kleli kɛ ɔ fata kɛ be di mmla sɔ’n su titi. Yɛle kɛ aniaan nga be dun Klisifuɛ’m be ɲrun mmua’n be seli be kɛ maan be “ci mmoja.”—Kanngan Sa Nga Be Yoli’n 15:28, 29 nun.
?Kɛ be se kɛ maan e ci mmoja’n i bo’n yɛle benin? Sɛ dɔɔtrɔ kun se wɔ kɛ a ci nzan’n a su nɔnman. ?Yɛ sɛ be fa nzan be guɛ i aliɛ wie nun’n nin? ?Á dí? ?Annzɛ kusu á kplín su kɛ be fa nzan be wla ɔ kplo’n nun? I wafa kunngba’n kɛ Ɲanmiɛn se e kɛ e ci mmoja’n, i lɛ’n kle kɛ ɔ fataman kɛ e di mmoja, kusu ɔ fataman kɛ e di nnɛn wie mɔ b’a guɛmɛn i mmoja’n i ase’n. Sɛ kusu be fa mmoja be guɛ i aliɛ wie nun’n e su diman.
?Yɛ sɛ dɔɔtrɔ’m be waan bé mán e mmoja’n nin? Ajalɛ wie o lɛ’n, ɔ fɔn Ɲanmiɛn i mmla’n. I wie yɛle kɛ be kwla se kɛ bé fá mmoja bɔbɔ ba’n annzɛ mmoja’n i nun ninnge cinnjin mun bé wlá e kplo’n nun. Mmoja’n i nun ninnge cinnjin nnan’n yɛle globili ruzu, nin globili blan, nin plakɛti’n ɔ nin plasma’n. Ayre yolɛ wafa uflɛ wie o lɛ’n e kwlá kɛnmɛn i trele kɛ ɔ fɔn Ɲanmiɛn mmla’n. I wie yɛle kɛ be kwla fa mmoja’n i nun ninnge cinnjin mun be nun ninnge kanngan wie mun be fa yo ayre. Kusu be kwla fa sran kun i bɔbɔ i mmoja’n be fa yo i ayre. Ninnge sɔ’m be nun’n, sran kun bɔbɔ yɛ ɔ fɛ i tiaun ajalɛ-ɔ.a—Galasifuɛ Mun 6:5.
SI NDƐ’N NUN KPA EKUN
Sɛ be waan bé fá mmoja bé yó wɔ ayre’n like ng’ɔ kwla uka wɔ naan w’a fa ajalɛ kpa’n, é wá kɛ́n i ndɛ.
3. Fa ajalɛ ng’ɔ́ jɔ́ Zoova i klun’n
?Ayre yolɛ nun’n, wafa sɛ yɛ a kwla fa ajalɛ ng’ɔ su fɔnman Ɲanmiɛn i mmla’n niɔn? An bo VIDEO’N, i sin’n an koko sa nga ti yɛ ɔ ti cinnjin kɛ e fa ajalɛ nga be boboli be su lɛ’n i su yalɛ.
Srɛ Ɲanmiɛn kɛ ɔ man ɔ ngwlɛlɛ.—Zaki 1:5.
Fa ɔ ɲin sie i Biblu’n nun ndɛ nga be kwla uka wɔ’n be su.—Ɲanndra Mun (13:16)
Ayre wafawafa nga amun asa’n su lɔ’n be kwla yo’n kunndɛ be su like.
Ayre nga a kunndɛman kɛ be fa yo wɔ mlɔnmlɔn’n bu i akunndan sie.
Bu ajalɛ nga sɛ a fa’n ɔ akunndan’n su buman ɔ fɔ’n i akunndan.—Sa Nga Be Yoli’n 24:16.b
Ɔ fata kɛ a wun i wlɛ kɛ ajalɛ wie o lɛ’n, ɔ bɔbɔ yɛ ɔ fata kɛ a fa-ɔ. Nán ɔ yi annzɛ ɔ wun, annzɛ asɔnun kpɛnngbɛn wie, annzɛ sran ng’ɔ kle wɔ Biblu’n nun like’n yɛ ɔ́ fá ajalɛ’n niɔn.—Rɔmunfuɛ Mun 14:12.
Ajalɛ nga a fali’n klɛ sie.
4. Zoova i Lalofuɛ’m be kunndɛ ayre ng’ɔ ti kpa’n
Sɛ Zoova i mmla’m be su falɛ ti’n e se kɛ e yoman ayre nga mmoja o nun’n, ayre kpa wie’m be o lɛ mɔ be kwla fa yo e-ɔ. An bo VIDEO’N.
An kanngan Titi 3:2 nun, i sin’n an koko kosan yɛ’n i su yalɛ:
?Kɛ e nin dɔɔtrɔ mun é kókó yalɛ’n ngue ti yɛ ɔ fata kɛ e kle kɛ e ti wɛtɛɛfuɛ naan e kloman utre-ɔ?
Nga e faman’n |
Nga Klisifuɛ kun bɔbɔ yɛ ɔ kle ajalɛ ng’ɔ́ fá’n |
|---|---|
Plasma |
Plasma’n i nun ninnge mun |
Globili blan |
Globili blan’n i nun ninnge mun |
Plakɛti |
Plakɛti’n i nun ninnge mun |
Globili ruzu |
Globili ruzu’n i nun ninnge mun |
5. Sɛ be waan bé fá ninnge kanngan wie mɔ be o mmoja’n nun’n bé yó wɔ ayre’n
Mmoja’n i nun ninnge cinnjin’m be ti nnan. Be yɛle globili ruzu, globili blan, plakɛti, ɔ nin plasma. Ninnge kannganngan wie’m be o ninnge cinnjin nnan sɔ’m be nun.c Be kwla fa ninnge kanngan sɔ’m be nun wie’m be yo tukpacɛ wie’m be ayre, annzɛ kusu sɛ mmoja tu sran kun’n be kwla fa yo naan mmoja’n w’a jran.
Sanngɛ sɛ be waan bé fá mmoja’n i nun ninnge kanngan mun bé yó e ayre’n, sɛ é kplín su annzɛ e su kplinman su’n, ɔ o e bɔbɔ e sa nun. Klisifuɛ wie’m be kwla se kɛ be kplinman su kɛ be fa ninnge sɔ’m be yo be ayre, sanngɛ wie’m be kwla kplin su.
Kɛ á bú ajalɛ nga á fá’n i akunndan’n, usa ɔ wun kɛ:
‘?Wafa sɛ yɛ n kwla yiyi nun n kle dɔɔtrɔfuɛ mun-ɔn?’
SRAN KUN KWLA USA KƐ: “?Sɛ n kplin su kɛ be man min mmoja’n i tɛ lika’n o nin?”
?A bu i sɛ?
NDƐ’N I KPƆLƐ BOLƐ
Zoova kunndɛ kɛ e bu mmoja’n i like cinnjin.
Ndɛ’n i nun flanlɛ
?Ngue ti yɛ Zoova ɲrun’n mmoja’n ti cinnjin-ɔn?
?Ngue ti yɛ e kwla se kɛ Zoova i mmla m’ɔ se kɛ e ci mmoja’n ɔ kle kɛ ɔ fataman kɛ e fa mmoja-ɔ?
?Ayre yolɛ wafa nga mmoja ndɛ’n o nun’n i nun’n, ngue yɛ ɔ́ úka e naan y’a fa ajalɛ kpa-ɔ?
NDƐ WIE MUN EKUN
?Sɛ be waan bé fá ɔ bɔbɔ ɔ mmoja’n bé fá yó ɔ ayre’n, ngue yɛ ɔ kwla uka wɔ naan w’a fa ajalɛ kpa-ɔ?
“Fluwa’n nun kannganfuɛ’m be kosan mun” (Sasafuɛ Tranwlɛ’n nun ndɛ)
?Sɛ be waan bé fá ninnge kanngan nga be o mmoja’n nun’n bé fá yó wɔ ayre’n, ngue yɛ ɔ kwla uka wɔ naan w’a si ajalɛ nga á fá’n niɔn?
“Fluwa’n nun kannganfuɛ’m be kosan mun” (Sasafuɛ Tranwlɛ’n nun ndɛ)
Like ng’ɔ ukali siansifuɛ kun naan w’a wun i wlɛ kɛ akunndan nga Ɲanmiɛn bu i mmoja’n su’n ɔ ti su’n.
“Mmoja’n i su akunndan nga Ɲanmiɛn bu’n n wunnin kɛ ɔ ti su” (An tinnge! nun ndɛ)
Wafa nga asɔnun kpɛnngbɛn nga be o komite ng’ɔ nin dɔɔtrɔfuɛ mun be di junman’n nun’n be uka aniaan mun’n.
a Nian like suanlɛ 35 nun. Ɔ suan “?Ngue yɛ ɔ kwla uka e naan y’a fa ajalɛ kpa-ɔ?”
b Nian ndɛ ja 5 su’n nun. Ɔ suan “Sɛ be waan bé fá ninnge kanngan wie mɔ be o mmoja’n nun’n bé yó wɔ ayre’n.” Nian Ndɛ Wie’m be nun Yiyilɛ 3 su’n nun wie. Ɔ suan “Ayre yolɛ wafawafa nga mmoja ndɛ’n o nun’n.”
c Dɔɔtrɔ wie’m be kwla se kɛ bé fá mmoja’n i nun ninnge cinnjin nnan mun be nun kun bé wlá e nun, naan i sɔ’n timan mmoja. I lɛ nun’n sɛ e bɔbɔ y’a fua kpa kɛ é dí Ɲanmiɛn i mmla’n su’n, maan e yiyi nun e kle be kɛ e su faman mmoja, yɛ kusu e su kplinman su kɛ be fɛ i nun ninnge cinnjin’m be nun kun be wla e nun wie.