LIKE SUANLƐ 44
?Cɛn dilɛ’m be kwlaa yɛ Ɲanmiɛn i klun jɔ su-ɔ?
Zoova kunndɛ kɛ e di aklunjɔɛ. Yɛ kɛ e di cɛn blɛ wie nun’n i sɔ’n yo i fɛ. ?Sanngɛ cɛn’m be dilɛ kwlaa yɛ be jɔ i klun-ɔn? ?Wafa sɛ yɛ e kwla fa ajalɛ ng’ɔ́ jɔ́ Zoova i klun’n niɔn?
1. ?Ngue ti yɛ Zoova i klun jɔman cɛn dilɛ wie’m be su-ɔ?
Wie liɛ’n, sa nga ti yɛ be di cɛn wie’n ɔ nin Biblu’n nun ndɛ’n be kɔman likawlɛ. Cɛn dilɛ wie’m be kusu be finwlɛ’n be timan kpa. Yɛle kɛ Ɲanmiɛn sulɛ wafa nga be timan su’n yɛ be kpɛli be ba-ɔ. Cɛn dilɛ wafa sɔ’m be nun wie’m be taka bae dilɛ’n su, annzɛ ndɛ nga be kan se kɛ, kɛ e wu’n like kun o e nun m’ɔ wuman wie’n i su. Cɛn dilɛ wie mun ekun be taka ato ndɛ uflɛ wie’m be su. (Ezai 65:11) Zoova seli i sufuɛ’m be kɛ: “Amun jaso be afiɛn. Nán amun kan fiɛn kun mlɔnmlɔn.”—2 Korɛntifuɛ Mun 6:17a
2. ?Wafa sɛ yɛ Zoova bu cɛn dilɛ nga be nun’n be manman klɔ sran mun-ɔn?
Zoova se e kɛ nán e ‘fa e wla gua klɔ sran su.’ (Kanngan Zeremin 17:5 nun.) Cɛn dilɛ wie’m be nun’n be manman mɛn siefuɛ wie mun annzɛ sonja mun. Wie mun ekun be nun’n, be manman nzɔliɛ ninnge wie mun. Nvle wie’m be kusu be di cɛn nga be ɲannin be ti nvle uflɛ sa nun’n, i ti cɛn. (1 Zan 5:21) Cɛn dilɛ wie mun ekun be manman politiki anuannzɛ wie mun, annzɛ be manman sran wie mɔ be miannin be ɲin kpa naan ninnge wie’m b’a kwla kaci’n. ?Sɛ e manman sran wie annzɛ anuannzɛ wie, i li sɛ sran sɔ’n annzɛ anuannzɛ sɔ’n i ninnge ng’ɔ yo be’n ɔ nin Zoova liɛ’m be kɔman likawlɛ’n, wafa sɛ yɛ Zoova i wun yó i-ɔ?
3. ?Ngue ti yɛ Zoova i klun jɔman cɛn dilɛ wie’m be su-ɔ?
Biblu’n se kɛ ‘nzan nga be nɔn i lele be bo’n, ɔ nin cɛn nga be di i sinnzin su’n ɔ nin nzan nɔnlɛ’n nun akplowa silɛ’n,’ be timan kpa. (1 Piɛli 4:3) Cɛn dilɛ wie’m be nun’n, sran’m be nianman be wun su ninnge nga be yo’n i nun. Kpɛkun be fa be wun wlɛ i bian nin bla kunndɛ sukusuku’n nun. Sɛ e kunndɛ kɛ Zoova i klun jɔ e wun titi’n ɔ fata kɛ e kpalo ayeliɛ sɔ mun.
SI NDƐ’N NUN KPA EKUN
É wá kán wafa nga ajalɛ nga e fa be cɛn dilɛ’m be nun’n be kwla jɔ Zoova i klun’n, be ndɛ.
4. Nán maan e di cɛn nga be jɔman Zoova klun’n be wie
An kanngan Efɛzifuɛ Mun 5:10 nun, i sin’n an koko kosan yɛ’m be su yalɛ:
?Kwlaa naan y’a fa ajalɛ kɛ é dí cɛn kun annzɛ e su diman’n, ngue yɛ ɔ fata kɛ e bu i akunndan-ɔn?
?Cɛn benin yɛ sran’m be tɛ i di amun asa’n su lɔ-ɔ?
?A lafi su kɛ cɛn dilɛ sɔ’m be jɔ Zoova klun?
?A si akunndan nga Ɲanmiɛn bu i awuliɛ cɛn’m be dilɛ’n su’n? Biblu’n nin-a kanman Ɲanmiɛn i sufuɛ kun m’ɔ dili i awuliɛ cɛn’n i ndɛ le. Sran nɲɔn nga be kannin be ndɛ kɛ be dili be awuliɛ cɛn’n, be timan Zoova i sufuɛ. An kanngan Bo Bolɛ 40:20-22 nin Matie 14:6-10 nun, i sin’n an koko kosan yɛ’m be su yalɛ:
?Sa benin yɛ ɔ juli awuliɛ cɛn nɲɔn sɔ’m be dilɛ’n nun-ɔn?
?Ɔ maan kɛ a niɛn i sa’n wafa sɛ yɛ Zoova bu awuliɛ cɛn’m be dilɛ mun-ɔn?
?A kwla usa ɔ wun kɛ sɛ n di cɛn wie mɔ be nin Biblu’n nun ndɛ’n be kɔman likawlɛ’n, i sɔ’n ti Zoova i cinnjin sakpa? An kanngan Ezipti Lɔ Tulɛ 32:1-8 nun. I sin’n, an bo VIDEO’N yɛ an koko kosan yɛ’m be su yalɛ.
?Ngue ti yɛ ɔ ti cinnjin kɛ e nian sɛ Zoova i klun jɔ cɛn nga e di’n su-o?
?Wafa sɛ yɛ e kwla yo sɔ-ɔ?
?É yó sɛ naan y’a si kɛ cɛn dilɛ kun jɔman Ɲanmiɛn klun?
?Cɛn dilɛ sɔ’n ɔ takaman ato ndɛ wie’m be su yɛ ɔ o lɛ-ɔ? Kunndɛ cɛn dilɛ sɔ’n i finwlɛ’n.
?Cɛn dilɛ sɔ’n nun’n be manman sran kun, annzɛ anuannzɛ kun annzɛ awa’n i nzɔliɛ ninnge wie mun? Zoova yɛ e mɛnmɛn i-ɔ. Yɛ e lafi su kɛ i yɛ ɔ́ wá síesíe mɛn nun sa mun-ɔn.
?Ninnge nga be yo i cɛn dilɛ sɔ’n nun’n ɔ nin Biblu’n nun ndɛ’n be kɔ likawlɛ? Ɔ fata kɛ e ayeliɛ’n yo kpa titi.
5. Uka sran mun naan be wun ajalɛ nga a fali’n i wlɛ
Sɛ sran’m be mian ɔ kɛ a di cɛn wie mɔ Zoova i klun jɔman su’n, ɔ kwla yo kekle man wɔ. Ajalɛ nga a fali’n, yiyi nun kle be aɲinyiɛ su. Sɛ a kunndɛ kɛ á wún wafa nga a kwla yo i sɔ liɛ’n, an bo VIDEO’N.
An kanngan Matie 7:12 nun, i sin’n an koko kosan yɛ’m be su yalɛ:
?Kɛ a nian ndɛ mma nga nun’n, ɔ fata kɛ a se ɔ osufuɛ’m be kɛ nán be di cɛn wie mun?
?Ngue yɛ a kwla yo fa kle ɔ osufuɛ’m be kɛ kannzɛ a nin be diman cɛn mun likawlɛ’n, sanngɛ a te klo be-ɔ?
6. Zoova kunndɛ kɛ e di aklunjɔɛ
Zoova kunndɛ kɛ a nin ɔ osufuɛ mun, ɔ nin ɔ janvuɛ mun amun di aklunjɔɛ likawlɛ. An kanngan Akunndanfuɛ’n 8:15 nun, i sin’n an koko kosan yɛ’n i su yalɛ:
?Wafa sɛ yɛ ndɛ mma sɔ’n kle kɛ Zoova kunndɛ kɛ e di aklunjɔɛ-ɔ?
Zoova kunndɛ kɛ i sufuɛ’m be di aklunjɔɛ. An bo VIDEO’N. Á wá wún wafa nga Ɲanmiɛn i sufuɛ’m be di aklunjɔɛ aɲia dandan’m be bo’n.
An kanngan Galasifuɛ Mun 6:10 nun, i sin’n an koko kosan yɛ’m be su yalɛ:
?Ɔ ti cinnjin kɛ e di cɛn mun naan y’a kwla yo “like ng’ɔ ti kpa’n” y’a man e wiengu mun?
?Sran like cɛlɛ wafa benin yɛ ɔ man aklunjɔɛ-ɔ? ?Kɛ sran’m be su cɛ be wiengu like m’ɔ fata kɛ a yo sɔ’n, annzɛ kɛ ɔ bɔbɔ a fa ajalɛ kɛ á cɛ́ sran like’n niɔn?
Zoova i Lalofuɛ wie’m be yo fɛtri kan be man be mma mun, kpɛkun be cɛ be like. ?Sɛ a le ba’n, ngue yɛ a kwla yo man be naan be klun w’a jɔ-ɔ?
SRAN WIE’M BE WAAN: “Cɛn dilɛ’m be finwlɛ’n timan cinnjin. Kɛ e nin e osufuɛ mun nin e janvuɛ mun e yia e di aklunjɔɛ’n, i sɔ’n yɛ ɔ ti cinnjin-ɔn.”
?Wafa sɛ yɛ á tɛ́ i su-ɔ?
NDƐ’N I KPƆLƐ BOLƐ
Zoova kunndɛ kɛ e nin e osufuɛ mun nin e janvuɛ mun e di aklunjɔɛ likawlɛ. Sanngɛ ɔ kunndɛman kɛ e fa e wun e wlɛ i cɛn dilɛ nga be jɔmɛn i klun’n be nun.
Ndɛ’n i nun flanlɛ
?Sɛ cɛn dilɛ kun jɔ Zoova klun, annzɛ ɔ jɔmɛn i klun’n, é yó sɛ naan y’a wun i wlɛ?
?Ajalɛ nga e fɛ i cɛn dilɛ’m be su’n, é yó sɛ naan e osufuɛ mun nin e janvuɛ mun b’a wun i wlɛ?
?Ngue yɛ ɔ kle ɔ kɛ Zoova kunndɛ kɛ e di aklunjɔɛ-ɔ?
NDƐ WIE MUN EKUN
Cɛn wie mɔ Klisifuɛ’m be diman’n.
“?Ngue ti yɛ Zoova i Lalofuɛ’m be diman cɛn wie mun-ɔn?” (jw.org su ndɛ)
Ninnge nnan mɔ be kle kɛ awuliɛ cɛn’m be dilɛ’n jɔman Ɲanmiɛn klun’n.
“?Ngue ti yɛ Zoova i Lalofuɛ’m be diman awuliɛ cɛn mun-ɔn?” (jw.org su ndɛ)
Nian wafa nga cɛn dilɛ blɛ’n nun’n bakanngan nga be klo Zoova’n be kwla yo like ng’ɔ jɔ i klun’n.
Klisifuɛ miliɔn kpanngban be fali ajalɛ kɛ be su diman Nowɛli. Maan e nian ndɛ nga be kannin’n.
“Like kun m’ɔ ti kpa tra Nowɛli’n” (Sasafuɛ Tranwlɛ’n nun ndɛ)
a Nian Ndɛ Wie’m be nun Yiyilɛ 5 su’n nun. Kɛ sran’m bé dí cɛn’n, ninnge nga e kwla yo i sa trele wie’m be nun’n ɔ kɛn i ndɛ.