Ɲanmiɛn sulɛ wafawafa mɔ be sanngan nun’n
?Ɲanmiɛn kunngba’n yɛ Ɲanmiɛn sulɛ wafawafa’m be kwlaa be su i-ɔ?
?Zoova i klun jɔ Ɲanmiɛn sulɛ wafawafa’m be kwlaa be su?
Mat 7:13, 14; Zan 17:3; Efɛ 4:4-6
Biblu’n nun ndɛ mɔ be kwla uka e’n:
Zoz 24:15—Zozie kleli kɛ ɔ fata kɛ sran kun kle like nga ɔ́ sú i’n, sɛ Zoova-o, sɛ ɲanmiɛn onga mun-o.
1Fa 18:19-40—Zoova sinnin i nuan ijɔfuɛ Eli i lika kleli kɛ be nga be su Ɲanmiɛn Kpli’n, ɔ fataman kɛ be fa be wun sanngan be nga be su ɲanmiɛn onga mun kɛ Baali sa’n be nun.
?Wafa sɛ yɛ Zoova bu ɲanmiɛn nga nvlenvle’m be su be’n ɔ nin manmanlɛ nga be manman be’n niɔn?
?Kɛ sran’m be waan be su su Zoova mɔ sanngɛ be yo ninnge ng’ɔ kpɔ be’n, wafa sɛ yɛ i wun yo i-ɔ?
Eza 1:13-15; 1Ko 10:20-22; 2Ko 6:14, 15, 17
Biblu’n nun ndɛ mɔ be kwla uka e’n:
Tul 32:1-10—Izraɛlifuɛ’m be mianmiannin Aarɔn ti’n, ɔ yoli nannin ba amuin kun mannin be. Be dili i ti cɛn. Kpɛkun be waan be su ‘di cɛn bé mán Zoova.’ I ti’n, Zoova fali be wun ya dan kpa.
1Fa 12:26-30—Kɛ mɔ Famiɛn Zeroboamun kunndɛman kɛ nvlefuɛ’m be wɔ Ɲanmiɛn sulɛ Zerizalɛmun lɔ’n ti’n, ɔ yoli amuin wie mun kpɛkun i waan amuin sɔ’m be ti Zoova i nzɔliɛ. I sɔ’n ti’n, nvlefuɛ’m be yoli sa tɛ.
?Nvle nga be sɔ amuin’n, be su ndɛ benin yɛ Zoova kan kleli Izraɛlifuɛ mun-ɔn?
?Kɛ Zoova i sufuɛ’m be fali be wun wlɛli i amuin sɔlɛ nun’n, ngue yɛ ɔ yoli-ɔ?
Jɔl 10:6, 7; Ju 106:35-40; Zer 44:2, 3
Biblu’n nun ndɛ mɔ be kwla uka e’n:
1Fa 11:1-9—Famiɛn Salomɔn i yi’m be yoli maan ɔ sɔli amuin, yɛ ɔ wlali nvlefuɛ’m be fanngan kɛ be yo sɔ wie. I sɔ’n ti’n, Zoova fɛli i wun ya dan kpa.
Ju 78:40, 41, 55-62—Azafu seli kɛ, kɛ Izraɛlifuɛ’m be yacili Zoova lɛ mɔ be sɔli amuin’n, ɔ yoli Zoova i ya kpa yɛ ɔ yili i sa be su.
?Zezi suannin ndɛ nga Ɲanmiɛn sulɛ wafa’m be kan mɔ be nin Ɲanmiɛn Ndɛ’n be sansan be wun’n be bo?
Biblu’n nun ndɛ mɔ be kwla uka e’n:
Mat 16:6, 12—Zezi fali ndɛ nga Farizifuɛ mun nin Sadisefuɛ’m be kan’n fa sunnzunnin levii. Afin be ato ndɛ sɔ’m be tru ndɛndɛ kpa kpɛkun be saci Ɲanmiɛn Ndɛ m’ɔ ti nanwlɛ’n.
Mat 23:5-7, 23-33—Zezi tuli mmla klɛfuɛ mun nin Farizifuɛ’m be fɔ kekle kpa, afin be nzuɛn’n timan kpa kpɛkun ndɛ nga be kan’n ti ato.
Mar 7:5-9—Zezi buli mmla klɛfuɛ mun nin Farizifuɛ’m be fɔ, afin be nannan’m be mmla’n yoli be cinnjin tra Ɲanmiɛn Ndɛ’n.
?Zezi kunndɛ kɛ i sɔnnzɔnfuɛ’m be bubu be wun nun naan be kpɛ asɔnun fanunfanun ba?
Biblu’n nun ndɛ mɔ be kwla uka e’n:
Zan 15:4, 5—Zezi fali viɲin sama i su sunnzun ase fa kleli kɛ ɔ fata kɛ i sɔnnzɔnfuɛ’m be nin i bɔbɔ nin be niaan Klisifuɛ mun be bo yo kun.
Zan 17:1, 6, 11, 20-23—Kɔnguɛ kasiɛn ka naan b’a kun Zezi’n, kɛ ɔ nin i akoto’m be yiali’n, ɔ srɛli Ɲanmiɛn kɛ ɔ yo naan i sɔnnzɔnfuɛ kpa’m be bo yo kun titi.
?Kannzɛ Klisifuɛ klikli’m be asɔnun bo’m be sɔnnin’n, sanngɛ like nga be lafi su’n ɔ nin wafa nga be su Zoova’n yoli kun?
Biblu’n nun ndɛ mɔ be kwla uka e’n:
Yol 11:20-23, 25, 26—Asɔnun nga be o Antiɔsu nin Zerizalɛmun lɔ’n, be kleli kɛ be bo ti kun yɛ be dili junman likawlɛ.
Rɔm 15:25, 26; 2Ko 8:1-7—Klisifuɛ klikli’m be blɛ su’n, asɔnun bo’m be kwlaa be mannin like fa suannin be niaan nga sa ɲannin be’n be bo. I sɔ’n kle kɛ be kwlaa be klo be wun naan be bo ti kun.
?Sɛ sran wie’m be waan be lafi Zezi su’n, ngalɛ’n ngunmin ti yɛ Ɲanmiɛn i klun jɔ́ sulɛ nga be su i’n su-ɔ?
?Sɛ sran wie’m be faman ndɛ nga Zezi nin i akoto’m be kleli’n su’n, Ɲanmiɛn sɔ́ sulɛ nga be su i’n nun?
Biblu’n nun ndɛ mɔ be kwla uka e’n:
Mat 13:24-30, 36-43—Zezi seli kɛ kɛ nga ijre tɛ fa tru fie kun nun sa’n, i wafa kunngba’n be nga be tɔn be wun suɛn kɛ be ti Klisifuɛ’n be nun sunman bé wlú asɔnun’n nun.
1Zn 2:18, 19—Kɛ afuɛ nga be flɛ i 100 wá wíe’n, akoto Zan seli kɛ Klisi i kpɔfuɛ’m be nun kpanngban b’a dun mmua b’a wlu asɔnun’n nun.