NDƐ NG’Ɔ KLƐ FLUWA’N SU’N | ?ANZI MUN BE O LƐ SAKPA?

Anzi’m be su ndɛ nanwlɛ’n

?Wan yɛle anzi mun? ?Nin yɛ be fin-ɔn? ?Ngue yɛ be yo-ɔ? A kwla wun kosan sɔ’m be su tɛlɛ’n Ɲanmiɛn Ndɛ’n nun. (2 Timote 3:16) Anzi’m be su ndɛ nga Biblu’n kan’n yɛ:

Anzi’m be ti aolia nun sran kɛ Ɲanmiɛn sa. E kwlá wunman be. Be “lɛ-man wunnɛn nin owie.” (Lik 24:39; Matie 18:10; Zan 4:24) Anzi’m be tran ɲanmiɛn su lɔ, yɛ be ɲin ta Ɲanmiɛn cɛn kwlakwla.—Lik 24:39; Matie 18:10; Zan 4:24.
Laa kpa nun’n, Ɲanmiɛn sunman anzi mun asiɛ’n su wa. Kɛ be ju wa’n, be fa klɔ sran wunnɛn. Kpɛkun, kɛ be wie be junman’n i di mɔ bé sá be sin’n, be kaci aolia nun sran ekun.—Jɔlɛ Difuɛ Mun 6:11-23; 13:15-20.
Wafa nga Biblu’n kan anzi’m be ndɛ’n, ɔ waan yasua mun-ɔn. Kɛ be ba asiɛ’n su wa kusu’n, be ti kɛ yasua mun sa. Sanngɛ, anzi’m be timan kɛ klɔ sran mun sa. Yɛle kɛ wie timan yasua, yɛ wie timan bla. Be jaman bla annzɛ bian, yɛ be wunman ba. Asa kusu’n, nán sran nga be wu’n yɛ be kaci anzi-ɔ. Zoova bɔbɔ yɛ ɔ yili anzi mun-ɔn. I sɔ’n ti, Biblu’n flɛ anzi mun kɛ “Nyanmiɛn mma mun.”—Bo Bolɛ 6:2; Jue Mun 148:2, 5.
Biblu’n kan klɔ sran’m be “aniɛn wafa-wafa nin anz’m be liɛ’n” i ndɛ. I sɔ’n kle kɛ aolia nun sran’m be ijɔ. Laa’n, Ɲanmiɛn maan anzi’m be nin klɔ sran’m be kokoli yalɛ. Sanngɛ, Ɲanmiɛn kplinman su kɛ e koto anzi’m be bo e manman be, annzɛ e srɛ be.—1 Korɛntfuɛ Mun 13:1; Sa Nglo Yilɛ 22:8, 9.
Anzi’m be kwla ju miliar kpanngban. —Daniɛl 7:10; Sa Nglo Yilɛ 5:11.
Anzi’m be ti “tinwa tra sran” mun. Asa ekun’n, be si ngwlɛlɛ tra sran mun. Wafa nga be wun kpɛ’n, ɔ ti abonuan. Asiɛ’n su wa like fi kwlá toman be.—2 Piɛr 2:11; Daniɛl 9:20-23.
Anzi’m be ti tinwa sɔ. Sanngɛ, be kwlá yoman ninnge ngba. Yɛ be siman sa ngba.—Matie 24:36; 1 Piɛr 1:12.
Ɔ le anzi kun nin i nzuɛn. Ɲanmiɛn yili be kɛ i bɔbɔ sa. Yɛ be kwla yo like nga be klo’n. Sɛ be klo’n, be kwla yo sa kpa annzɛ sa tɛ kɛ klɔ sran mun sa. Anzi wie’m be yoli ɲin kekle Ɲanmiɛn su.—Zid 6.

Anzi’m be ti Akpasua-akpasua

Anzi kpɛnngbɛn Misɛli: I yɛ ɔ ti anzi’m be su kpɛn’n niɔn. Ɔ le tinmin tra be ngba. Biblu’n kle kɛ Zezi Klist yɛ be flɛ i ekun kɛ Misɛli’n niɔn.—1 Tɛsalonikfuɛ Mun 4:16; Zid 9.

Serafɛn mun: Anzi sɔ’m be le ɲrun dan. Be bo sin yia Ɲanmiɛn i famiɛn bia’n.—Ezai 6:1-3.

Anzi nga be nian Ɲanmiɛn i ninnge’m be su’n: Be le ɲrun wie. Be di Ɲanmiɛn mɔ like fi nunmɛn i sin’n i junman cinnjin wie mun. Kɛ Biblu’n kán be ndɛ’n, blɛ sunman’n be o Ɲanmiɛn bɔbɔ i wun lɛ be su di i junman.—Bo Bolɛ 3:24; Ezekiɛl 9:3; 11:22.

Anzi kpanngban kpa ekun be o lɛ: Ɲanmiɛn mɔ like fi nunmɛn i sin’n, ɔ sunman be naan be yo i klun sa.a—Ebre Mun 1:7, 14.

a Sɛ a kunndɛ kɛ á sí anzi’m be su ndɛ wie mun ekun’n, nian fluwa ?Ngue like yɛ Biblu’n kle i sakpasakpa ɔ? i ndɛ tre 10 nun. Fluwa sɔ’n i nun ndɛ’m be bo tulɛ lika’n nun lɔ’n, be tɛ kosan yɛ’n su: “?Wan yɛle anzi kpɛnngbɛn Misɛli?” Zoova i Lalofuɛ mun yɛ be yili fluwa sɔ’n niɔn. A kwla fɛ i www.pr2711.com/bci su.