Kosan’m be su tɛlɛ

◼ ?Ngue yɛ ɔ fata kɛ e bu i akunndan ka naan y’a fa ajalɛ kɛ sɛ e wu’n, ninnge kpakpa nga e le be’n, be nun wie annzɛ i wunmuan’n wɔ Zoova i anuannzɛ’n i sa nun ɔn?

Kɛ sran kun ko wun’n, i sa nunman ninnge nga ɔ le be’n, be su kun. (Aku. 9:5, 6) I ti’n, blɛ mɔ sran kpanngban be ɲin te o su’n, be dun mmua klɛ wafa nga be kunndɛ kɛ be cɛcɛ be ninnge mun’n be sie. (2 Fam. 20:1) E janunfuɛ’n annzɛ sran nga ɔ́ nían aja ninnge’m be cɛcɛlɛ’n su’n, i dunman’n klɛ fluwa sɔ’n nun. Sanngɛ, sɛ b’a klɛman fluwa sɔ’n, nvle sunman nun’n, awa yɛ ɔ́ síesíe ɔwuliɛ’n i ninnge be cɛcɛlɛ’n niɔn. Ɔ maan, sɛ e ninnge’m be cɛcɛlɛ’n i wun akunndan trele yɛ e waan é bú’n, naan sɛ e kunndɛ kɛ be nun wie annzɛ i wunmuan’n wɔ Zoova i anuannzɛ’n i sa nun’n, ɔ ti cinnjin kɛ e klɛ e sie. Kpɛkun e janunfuɛ’n annzɛ sran nga ɔ́ nían su’n, maan e klɛ i dunman wie.

E janunfuɛ’n annzɛ sran nga ɔ nian aja ninnge sɔ’m be su’n, i junman’n cɛnnin. Sɛ ɔwuliɛ’n i ninnge’m be sɔnnin o, sɛ b’a sɔnman o, be nuan yiayialɛ’n, ɔ nin be cɛcɛlɛ’n kwla yo tɛkɛtɛkɛ, kpɛkun ɔ fa blɛ kpanngban wie. Asa ekun’n, wie liɛ’n, wafa nga awa’n siesie ninnge sɔ’m be yolɛ’n, ɔ fata kɛ i su yɛ aja ninnge’m be sunianfuɛ’n nanti ɔ. Nán kɛ sran kun ti asɔnun’n nunfuɛ’n ti yɛ ɔ́ kwlá yó e janunfuɛ’n annzɛ sran aja ninnge’m be sunianfuɛ kpa ɔ. Ɔ fata kɛ sran nga é fɛ́ i’n, ɔ yo sran mɔ be kwla lafi i su’n, mɔ i klunklo su’n, ɔ́ kwlá dí ajalɛ nga e klɛli su ɔ.​—An nian “ Préparer sa succession : une mesure sage ” m’ɔ o Réveillez-vous !, afuɛ 1998 Desamblu 8 nun.

Sɛ be se amun kɛ amun yo janunfuɛ’n annzɛ aja ninnge’m be sunianfuɛ: Sɛ be se amun sɔ’n, amun bu i akunndan kpa be nian. Kpɛkun maan amun srɛ Ɲanmiɛn nian, sɛ amun kwla di junman sɔ’n nin o. (Lik 14:28-32) Kɛ sran’n ko wu’n, ɔ fata kɛ amun nuan to be kwlaa nga aja ninnge’m bé kɔ́ be sa nun’n, mɔ be dunman o fluwa’n nun’n. Kɛ amun ko ɲɛn i wun atin’n, amun kwla nian fluwa’n nun naan amun a cɛcɛ aja ninnge sɔ’m be nun. Sɛ aja ninnge sɔ’m be sɔnnin annzɛ b’a sɔnman o, nán maan sran nga ɔ́ cɛ́cɛ́ be’n, ɔ kpɛ ndɛ ng’ɔ o fluwa’n nun’n i wun kaan sa. Aja like kwlaa nga ɔ kɔ Betɛli biolo’n i sa nun’n ti like mɔ b’a sie b’a man Zoova i anuannzɛ’n niɔn, ɔ maan ɔ ti Zoova i anuannzɛ’n i liɛ.​—Lik 16:10; 21:1-4.