?Wan yɛle Zan Batɛmun yofuɛ’n?

Ndɛ nga Biblu’n kan’n

Zan Batɛmun yofuɛ’n ti Ɲanmiɛn nuan ijɔfuɛ. (Liki 1:76) Be wuli i afuɛ 2 ka naan Klisifuɛ’m be blɛ’n w’a ju’n nun, yɛ ɔ wuli afuɛ 32 nun. Ɲanmiɛn sunmɛnnin i kɛ ɔ bo Mesi’n i ɲrun atin. I sɔ’n ti’n, Zan kannin Ɲanmiɛn i nuan ndɛ kleli i wiengu Zifu mun naan be sa be sin Ɲanmiɛn wun.—Marki 1:1-4; Liki 1:13, 16, 17.

Ndɛ nga Zan kannin’n ukali be nga be awlɛn ti kpa’n naan b’a wun i wlɛ kɛ Zezi m’ɔ fin Nazarɛti’n yɛ ɔ ti Mesi nga be seli kɛ ɔ́ bá’n niɔn. (Matie 11:10) Zan wlali sran’m be fanngan kɛ be kaci be akunndan’n naan be yo be batɛmun fa kle kɛ b’a kaci be sa. (Liki 3:3-6) Kɛ mɔ Zan yoli sran kpanngban be batɛmun’n ti’n, be wa flɛli i Zan Batɛmun yofuɛ’n. Be nga Zan yoli be batɛmun’n, be nun cinnjin kpafuɛ’n yɛle Zezi.a—Marki 1:9.

Ndɛ nga é wá yíyí nun’n:

• ?Ngue ti yɛ Zan Batɛmun yofuɛ’n yoli i liɛ ngunmin-ɔn?

• ?Zan Batɛmun yofuɛ’n i si nin i nin yɛle wan?

• ?Wan ti yɛ be kunnin Zan Batɛmun yofuɛ’n niɔn?

• ?Zan Batɛmun yofuɛ nin Zezi be sili kwla?

• ?Biblu’n nun’n, sran nɲɛ yɛ be flɛ be Zan-ɔn?

?Ngue ti yɛ Zan Batɛmun yofuɛ’n yoli i liɛ ngunmin-ɔn?

Be dun mmua kannin junman ng’ɔ́ wá dí’n i ndɛ: Jasin fɛ mɔ Zan boli’n, ɔ yiali ndɛ ng’ɔ se kɛ Zoova i ngaliɛ kanfuɛ kun wá bá’n i nuan. (Malasi 3:1; Matie 3:1-3) Zan yɛ ɔ ti sran m’ɔ fata kɛ ‘ɔ siesie nvle kun man Zoova’n’ niɔn. Afin ɔ ukɛli i niaan Zifu mun naan b’a tie ndɛ nga Zoova i janunfuɛ klikli’n mɔ yɛle Zezi Klisi’n wá kán’n.—Liki 1:17.

Ɔ le ɲrun dan: Zezi seli kɛ “be kwlaa nga bla wuli be’n, be nun wie fi nunman lɛ mɔ i dan tra Zan Batɛmun Yofuɛ’n niɔn. Sanngɛ sran ng’ɔ ti kaan ɲanmiɛn su lɔ Famiɛn Diwlɛ’n nun’n, i dan trɛ i.” (Matie 11:11) Zezi i ndɛ sɔ’n kle kɛ Ɲanmiɛn i sufuɛ nga be wuli be ka naan b’a wu Zan’n, be nun wie fi i dan traman Zan. Like nga ti yɛ ɔ ti sɔ’n, yɛle kɛ Zan ti Ɲanmiɛn nuan ijɔfuɛ, kpɛkun i kunngba’n ɔ ti “ngaliɛ kanfuɛ” nga be seli kɛ ɔ́ bá’n. Zezi i ndɛ sɔ’n kle ekun kɛ Zan w’a ɔman ɲanmiɛn su lɔ Famiɛn Diwlɛ’n nun.b Afin ɔ wuli ka naan Zezi Klisi w’a tike ɲanmiɛn su lɔ kɔlɛ atin’n. (Ebre Mun 10:19, 20) Sanngɛ ɔ́ wá trán be nga bé trán mɛn klanman’n nun asiɛ’n su wa’n be nun wie.—Jue Mun 37:29; Liki 23:43.

?Zan Batɛmun yofuɛ’n i si nin i nin yɛle wan?

Zan i si suan Zakari, yɛ i nin suan Elizabɛti. I si Zakari ti Ɲanmiɛn ɲrun jranfuɛ. Zan i awuliɛ’n yoli abonuan. Afin i nin Elizabɛti i klun ti kpan, ɔ kwlá wuman ba. Asa’n, kɛ ɔ nin i si Zakari bé wú i’n, nn “b’a yo kpɛnngbɛn kpa.”—Liki 1:5-7, 13.

?Wan ti yɛ be kunnin Zan Batɛmun yofuɛ’n niɔn?

Famiɛn Erɔdu Antipasi yɛ ɔ seli kɛ be kpɛ Zan i ti’n niɔn. I yi Erodiasi yɛ ɔ seli i kɛ ɔ yo sɔ-ɔ. Bla sɔ’n kpɔ Zan i tɛtɛ kpa. ?Ngue ti-ɔ? Yɛle kɛ Famiɛn Erɔdu waan be nian kɛ ɔ ti Zifu. Kusu Zifu’m be mmla’n nun’n, ɔ leman atin jaman Erodiasi. I sɔ mɔ Zan kannin’n ti’n, bla’n fɛli i ɲin cili Zan lele ɔ kunnin i.—Matie 14:1-12; Marki 6:16-19.

?Zan Batɛmun yofuɛ nin Zezi be sili kwla?

Be nga be se kɛ Zan Batɛmun yofuɛ nin Zezi be sili kwla’n, be ndɛ sɔ’n nin Biblu’n nun ndɛ’n kɔman likawlɛ kaan sa. (Zan 3:25-30) I kpa bɔbɔ’n, Zan kɛnnin i weiin kɛ ɔ su siesie atin’n man Mesi’n, naan ɔ nin i be siman kwla. Cɛn kun’n, Zan seli kɛ: “N bali kɛ ń yó sran’m be batɛmun nzue nun naan Izraɛlifuɛ’m be kwlaa be wun i wlɛ” kɛ Zezi “yɛ ɔ ti Ɲanmiɛn i Wa’n niɔn.” (Zan 1:26-34) Ɔ maan kɛ Zan tili i kɛ sran kaka be su Zezi su’n, ɔ yoli i fɛ kpa.