11 Asin nabaretaan man kan gabos na Judio na nasa Moab, Ammon, asin Edom, siring man kan gabos na yaon sa iba pang kadagaan, na tinugutan kan hadi kan Babilonya na may matadang mag-istar sa Juda asin na ninombrahan niyang mamahala sa mga ini si Gedalias na aki ni Ahikam na aki ni Safan. 12 Kaya nagpuon na magbaralik an gabos na Judio hali sa gabos na lugar kun sain sinda nagkawararak, asin nagpasiring sinda sa daga nin Juda, ki Gedalias sa Mizpa. Asin nagtipon sinda nin dakulon nanggad na arak saka mga prutas sa tig-init.