14 Kan makarani sinda sa mga tawo,+ sarong lalaki an nagdulok saka nagluhod sa saiya, asin nagsabi: 15 “Kagurangnan, mahirak ka sa aki kong lalaki, ta may subi-subi siya saka grabe an kamugtakan niya. Parati siyang natutumba sa kalayo saka sa tubig.+ 16 Dinara ko siya sa mga disipulo mo, pero dai ninda siya kayang paumayan.” 17 Bilang simbag, sinabi ni Jesus: “O daing pagtubod asin makasalan na henerasyon,+ sagkod nuarin ako kaipuhan na magdanay na kaibanan nindo? Sagkod nuarin ko kamo pagpapasensiyahan? Daraha siya digdi sa sako.”

38 Asin uya! sarong lalaki sa sainda an nagkurahaw, na nagsasabi: “Paratukdo, nakikimahirak ako sa saimo na hilingon mo an aki kong lalaki, ta solo-solo siyang aki ko.+ 39 Sinasaniban siya nin sarong espiritu, saka bigla na sana siyang nagkukurahaw, asin pinapakiray-kisay siya kaiyan na nagsasabo an nguso, asin maski kinulgan na kaiyan an aki dai iyan basta-basta nagluluwas sa saiya. 40 Nakimahirak ako sa mga disipulo mo na palayason iyan, pero dai ninda kaya.” 41 Bilang simbag, sinabi ni Jesus: “O daing pagtubod asin makasalan na henerasyon,+ sagkod nuarin ako kaipuhan na magdanay na kaibanan nindo asin magpasensiya sa saindo? Daraha digdi an saimong aki.”+ 42 Alagad maski kan parani na an aki, ilinampog siya kan demonyo asin pinakiray-kisay nin grabe. Pero sinaway ni Jesus an maraot na espiritu saka pinaumayan an aki asin itinao siya sa saiyang ama.