21 Dangan dinumanan ni David sa Nob+ an saserdoteng si Ahimelec. Tinakigan sa takot si Ahimelec kan mahiling niya si David, asin sinabi niya: “Taano ta solo ka sana? Taano ta mayo kang kaiba?”+ 2 Nagsimbag si David sa saserdoteng si Ahimelec: “May ipinapagibo sako an hadi, pero sabi niya, ‘Dai mo pagsabihon sa kiisay man an manungod sa misyon mo saka sa mga ipinapagibo ko saimo.’ May napagkasunduan kaming lugar kan mga tawuhan ko kun sain kami mataragbuan. 3 Kun igwa ka diyan nin limang tinapay o ano man na makakakan, itao mo na lang sako.” 4 Alagad nagsimbag ki David an saserdote: “Mayo ako nin ordinaryong tinapay, pero igwa digding banal na tinapay+—puwedeng magkakan kaini an mga tawuhan mo basta dai sinda nakidurog* sa mga babayi.”+ 5 Nagsimbag si David sa saserdote: “Talagang dai kami nakikidurog sa mga babayi* pag mahali kami para makipaglaban, arog kan mga nainot ming pakikipaglaban.+ Kun an mga tawuhan ko pinagdadanay na banal an hawak ninda dawa ngani ordinaryo sana an samong misyon, di lalo na ngunyan na mas importante an misyon mi!” 6 Kaya itinao sa saiya kan saserdote an banal na tinapay,+ huling mayo nin ibang tinapay duman kundi idto sanang tinapay na pandulot, na hinali sa atubangan ni Jehova kan aldaw na sinalidahan iyan nin bagong tinapay.