Bukas daw an Saindong Isip Manongod sa Dios?
NAMOMOOT daw kamo sa Dios? Boot daw nindo na orog siang mamidbid? An paaging magibo iyan isinabi kan 19 siglo na an nakaagi. Si apostol Pablo naghulit sa saralak na grupo nin mga Judio asin Griego sa sarong Judiong sinagoga sa Tesalonica. An nagkapirang Judio asin Griego nakombensir asin nagliwat nin relihiyon, alagad an dakol na Judio, “pano nin kaanggotan, nagpatabang sa sarong grupo hale sa sadan, sinutsutan an kadaklan, asin dai nahaloy naribok an bilog na siudad.”
Sa kadikloman, si Pablo nagdulag sa magkasururog asin nagduman sa Berea asin dai nahaloy yaon na sa sinagoga na naghuhulit sa mga Judio asin Griego. “Digdi an mga Judio orog na bukas an isip kisa kan mga nasa Tesalonica, asin madali nindang inako an tataramon; aroaldaw pinag-aadalan ninda an kasuratan tanganing helingon kun baga idto totoo. An dakol na Judio nagturubod, siring man an dakol na babaeng Griego na mga may kaya asin an nagkapira sa mga lalaki.”—Gibo 17:1-12.
An mga Judio sa Tesalonica nangapot sa saindang relihiyon na ginatos nang taon an edad na may mga tradisyon na ginibong basang an Tataramon nin Dios. (Mateo 15:1-9) Laen nanggad an mga nasa Berea—naghinanyog sinda na may bukas na isip, siniyasat an Kasuratan tanganing helingon kun baga totoo an mga sinasabi ni Pablo, asin nagliwat nin relihiyon.
An mga komentaristang Katoliko, na kinotar sa sinusundan na artikulo, ini an sinasabi manongod sa mga Saksi ni Jehova. Sinda “primero pag-abot sa init, igot, aktibismo.” Sinda “iyo an enot na namumuhay sono sa pagtubod na ihinuhulit ninda,” asin “nagsusunod sinda sa marahay asin sadiosan na pamumuhay.” An saro “inaako na may init asin pagmate nin pagkamagturugang asin pagkasararo.” “Permi sindang may kapot na Biblia,” asin an saindang paagi nin “pagbasa sa Biblia maliwanag na nagpapanigo sa tunay na mga pangangaipo na dai na napaninigoan nin ibang teolohiya.” An saindang mensahe “nakatatabang sa paghale sa kahaditan kan indibiduwal sa atubang kan mga kasakitan kan kinaban na ini.” Ini gabos asin an dakol pang iba sinasabi nin mga klerigo asin komentaristang Katoliko. Bako daw na ini gabos pag-omaw sa mga Saksi ni Jehova?
Kun siring, bako daw na madonong na hinanyogon an saindang pakikipag-olay na basado sa Biblia kun sinda minasongko sa saindong harong? Asin girumdoma, an bagay na an saindang relihiyon may pagtuyang inaapod na sarong “sekta” dai minagibo kaiyan na falso. An enot na mga Kristiano inapod na “an sekta kan Nazareno.” Sinasadol kita gabos kan Biblia na “patunayan an gabos na bagay: pangaptan an marahay.” (Gibo 24:5; 1 Tesalonica 5:21, Douay Version) Bako daw na an gabos na namomoot sa Dios asin boot na makamidbid sa saiya maninigong kumuyog sa banal na hatol na ini?
[Kahon/Mga ritrato sa pahina 9]
Kun kamo Katoliko asin boot nindong orog na mamidbid an Dios, may bukas na isip na horophoropon an mga hapot na ini kaiba an mga tekstong sinitar, na ginagamit an sadiri nindong Biblia.
An Katolikong Biblia na Douay Version nagtotokdo na an kalag nagagadan—an saindo daw na iglesya nagtotokdo na iyan inmortal?—Ezequiel 18:4; Gibo 3:23; Apocalipsis 16:3.
Iyan nagtotokdo na an bayad nin kasalan kagadanan—an saindo daw na iglesya nagtotokdo na an mga parakasala pinadudusahan sa impierno o sa purgatoryo?—Eclesiastes 9:5, 10; Roma 6:23.
Iyan nagtotokdo na si Jehova sarong Dios asin na si Jesus bako niang kapantay—an saindo daw na iglesya nagtotokdo na an Dios sarong Dios sa tolong persona asin na si Jesus saro sa tolo na magkakapantay?—Deuteronomio 6:4; Juan 14:28.
Iyan nagtotokdo na si Jesus iyo an gapo na natotogdokan kan iglesya nin Dios—an saindo daw na iglesya nagtotokdo na iyan natotogdok ki Pedro?—Efeso 2:20, 21; 1 Pedro 2:4-8.
Iyan nagtotokdo nin pamimibi sa Dios paagi ki Cristo Jesus—an saindo daw na iglesya nagtotokdo nin pamimibi sa o paagi sa iba?—Filipos 4:6; 1 Timoteo 2:5.
Iyan nagtotokdo nin pagtuga nin mga kasalan asin paghagad nin kapatawadan sa Dios paagi ki Jesu-Cristo—an saindo daw na iglesya nagtotokdo na an mga pabor na ini nakakamtan paagi sa sarong padi?—1 Juan 1:9; 2:1.
Asin an iyo man sanang Bibliang Katolikong iyan nagtotokdo na an pakikikatood sa kinaban asin pakikilabot sa politika kan kinaban na ini pakikiiwal sa Dios—an saindo daw na iglesya nakikilabot sa politikal o militar na mga gibo-gibo kan kinaban na ini?—Juan 15:19; 18:36; Santiago 1:27; 4:4.
[Mga ritrato]
Impiernong may kalayo?
Trinidad?
Mga tagapag-oltanan?