Ano daw an Magigin Ngapit Niato Asin kan Satong mga Aki?
AN SARONG pamilya dai puwedeng gumasto nin labi sa nakukua kaiyan asin magdanay na daing utang. An sarong nasyon dai puwedeng magbayad nin labi sa nareresibi kaiyan asin umasenso pa man giraray; ni ikapagpapadagos man niato an satong paggasto kan palibot hale sa utang. Dai niato puwedeng rawrawan an mas dakol na daga kisa napoporma, gumibo nin mas dakol na carbon dioxide kisa kayang gamiton nin mga tinanom, magpalod nin mas dakol na kahoy kisa ikasasalida, atian an mas dakol na aire asin tubig kisa kayang linigan kan daga. An mga kakulangan sa palibot, kapareho nin nasyonal na mga kakulangan, maghahagad nin kuwentada. Iyan kaipuhan na bayadan, magsalang nin kuwarta asin internasyonal na kooperasyon o nin buhay—niato asin kan satong mga aki.
Ginibong posible kan modernong teknolohiya an paglaglag sa daga. Iyan puwedeng gamiton sa pag-olang kaiyan. Taano ta dai iyan ginagamit? Huli sa pagkamoot sa pirak. Binilyon an gagastuson dian. An kinaban na ini dai naheheling—o habong humeling huli sa kapasloan kaiyan—an lihis pa sa halipot an pananaw na materyalistikong mga kamawotan kaiyan. Huling iyan nagsasayumang magbayad nin kuwarta, iyan magbabayad nin pagkawara nin pan-ibabaw na daga, pagkawara nin mga kadlagan, pagkawara nin mga parte nin daga na may tubig, atmosperang perming mainit an temperatura, may ilong tubig, naggagrabeng helang, buhay nin tawo. Asin tanganing dai mawaran nin kuwarta, an kinaban na ini ipinababakal an ngapit kan mga aki kaiyan.
Iyan daw mapapagmata nin nasa panahon? An simbag kan kasaysayan dai nakabubuhay nin boot, pero an simbag nin Dios iyo. Si Jehova Dios mismo nagsasabi na sia mangugunlabot asin ‘lalaglagon idtong mga naglalaglag kan daga.’ (Kapahayagan 11:18) Hahaleon nia sa daga an mga naglalaglag sa palibot kaiyan asin rinaraot an kagayonan kaiyan, huli ta linalang nia iyan tanganing makasustenir sa buhay asin magin magayon. “An kalangitan iyo an sakuyang trono, asin an daga iyo an tongtongan kan sakong bitis,” sabi nia, asin: “Papamurawayon ko an namumugtakan kan sakuyang mga bitis.”—Isaias 66:1; 60:13.
Linalang nia iyan tanganing pag-istaran nin mga tawo na namomoot sa katanosan—asin iyan iistaran, nin minilyon na nabuhay kan nakaagi, nin minilyon na nabubuhay ngonyan, asin nin minilyon na aki na mamumundag pa sa ngapit. Ini ipinasurat nia sa saiyang Tataramon, an Biblia, asin puwede nindong basahon iyan sa Isaias 45:18 asin Juan 5:28, 29.
Dangan, huling inaataman kan mga namomoot dian, an daga mabalik sa kagayonan na itinao dian kan enot kan satong Kaglalang. Dangan an matanos na mga tawo asin an saindang mga aki magkakaigwa nin ngapit, mamuraway na ngapit: “Dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian. Alagad an mga mahoyo mismo magmamana kan daga, asin sinda nanggad magkakararanga nin labi-labi sa nagsosopay na katoninongan. An mga matanos mismo magmamana kan daga, asin sinda mag-eerok dian sagkod lamang.”—Salmo 37:10, 11, 29.
Asin dai na noarin man magagadan? Asin dai na noarin man magagadan! “An Dios mismo masasakaibanan ninda. Asin papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:3, 4) Sobra karahay tanganing magin totoo? Bako, an presenteng maraot na kinaban na ini sobra karaot tanganing magdanay.—Daniel 2:44.
Alagad kamo asin an saindong mga aki puwedeng magdanay. Iyan ginigibong posible ni Jehova Dios paagi sa atang kan saiyang Aki. An pakanood manongod ki Jehova asin sa saiyang Aki mangangahulogan nin buhay na daing katapusan para sa saindo asin sa saindong mga aki—buhay sa sarong bagong kinaban na dian an katanosan an mag-eerok. (Juan 3:16; 17:3; 2 Pedro 3:13) Ini an puwedeng magin maogmang ngapit para sa saindo asin sa saindong mga aki. Nasa saindo kun baga iyan magigin ngapit nindo o bako.