Kun Ano an Naaaraman kan Dai Pa Namundag na Aki

AN DAI pa nahahaloy na pagsiyasat nagpapatunay na an dai pa namundag na aki sa matris apektado nin orog pang gayo kisa sa pagkakan kan ina kaini, kan droga na tibaad ginagamit nia, o kun naninigarilyo sia o dai. An aki sa matris nakadadangog man kan dinadangog kan ina asin maliwanag na apektado.

Sa pag-ilustrar: An direktor sa musika kan Hamilton Philharmonic Orchestra sa Ontario, Canada, nagbareta na kan mas hoben pa sia, an manlaenlaen na komposisyon nin musika na ineensayo nia garo makangangalas na pamilyar, minsan siring na dai pa nia naheling an mga ini kan enot. Permi idto kabtang kan cello na igwa kaining makangangalas na pagkapamilyar. Sinabihan nia an saiyang ina, na sarong propesyonal na naggagamit nin cello, dapit kaini. Kan naghapot an saiyang ina, sinabi nia saiya an mga ngaran kan mga musikal na komposisyon na ineensayo nia, naresolberan an ngangalasan. Mantang ipinangingidam sia, an paliwanag kan saiyang ina, an mismong mga komposisyon na ini an saiyang ineensayo!

Ngonyan, sono sa kolumnista sa diaryong si Erma Bombeck, an Britanong magasin sa medisina nagbareta manongod sa problema na inaapod kan magasin na “adiksion sa de-seryeng drama kan aki sa matris.” An dai pa namundag na mga aki nagigin adikto sa de-seryeng drama sa TV na dinadangog kan saindang ina. “Mawot kong naaraman ko na kutana ini kan ipinangingidam ko an sakong mga aki,” an komento ni Bombeck. “Nakapako an atension ko sa atubang kan ‘The Waltons,’” sarong marahay na programa sa telebisyon pirang taon na an nakaagi. Idinagdag nia: “Bakong makangangalas na igwa kita nin mga aking nagmamawot nang luhuan an saindang mga talinga sa edad na 2, mag-date sa edad na 9 asin magkaigwa kan saindang sadiring apartment sa edad na 13.”