Paglikay na Magkasolo sa Harong

SONO sa estorya, nasipa kan baka ni Mrs. Patrick O’leary an lampara sa kamalig asin iyan an pinonan kan grabeng pagkasolo sa Chicago kan 1871. Grabe an napierdeng mga rogaring asin buhay. Sono sa sarong reperensia, an pagkasolo hinalean nin harong an 100,000, linaglag an labing 17,400 na edipisyo, asin ginadan an 250 katawo.

Ngonyan, pakalihis nin 120 taon, an modernong teknolohiya sa paglaban sa kalayo nakatabang na malikayan an dakol na mahiwas na mga pagkasolo. Minsan siring, an pagkasolo nin harong nagpapadagos na tumao nin peligro. An NFPA (National Fire Protection Association) nagsasabi na sa Estados Unidos, haros limang ribo katawo an nagadan sa mga pagkasolo nin harong sa laog nin sarong taon. Arog kan nakarekord sa The Vancouver Sun, an NFPA nagtao nin pirang simpleng ideya na makatatabang na maolang an pagpopoon nin pagkasolo sa harong. Sa pinakasustansia, iyan an minasunod:

◻ Dai pagtogotan sa harong an pananabako. An mga aksidente may labot sa bakong maingat na mga paratabako nagpapadagos na iyo an pangenot na causa nin pagkagadan sa mga pagkasolo sa harong.

◻ Dai pabayaan na nag-aandar na daing nag-aasikaso o mantang natotorog kamo an mga portable heater.

◻ Dai pagsaksakan nin sobra sa kapasidad kan koryente o gumamit nin patpat nang kordon. Gumamit sana kan tamang fuse.

◻ Papagdanayon na malinig an mga pugon asin tsimeneya. Helingon iyan taon-taon.

◻ Regular na helingon an mga smoke detector, asin salidahan an bateriya taon-taon. Siertohon na midbid kan gabos sa pamilya an alarma kan smoke detector.

◻ Helingon kun baga aram kan gabos sa pamilya an agihan sa pagdulag kun magkasolo, asin dai pagbugtakan nin ano man an mga luluwasan.