An Katuyohan nin Dios Nagdadangadang Na sa Kulminasyon Kaiyan
An katuyohan nin Dios sa paglalang sa daga pag-istaran iyan nin maogmang mga tawo na nabubuhay sa matanos na mga kamugtakan. Tanganing magpadagos na mabuhay, an katawohan kaipuhan na kumuyog sa mga pagboot nin Dios, alagad ta an enot na mag-agom na tawo nagmasumbikal asin nagin mga parakasala, na nakondenar sa kagadanan. Ini nagdara nin kasalan asin kagadanan sa gabos na guminikan sa sainda.—Genesis 1:27, 28; 2:16, 17; 3:1-19; Roma 5:12.
An Dios, na an ngaran Jehova, nagdesisyon na haleon sa daga an mga epekto nin pagmasumbikal asin kasalan. Pag-abot nin panahon hineling nia an daga asin naheling nia sa tahaw nin mga tawo an sarong maimbod na tawo, si Abram, na an ngaran liniwat Nia sa Abraham. Pinanugaan nin Dios si Abraham na an saiyang gikan magigin dakulang nasyon asin na paagi sa nasyon na iyan an Dios matao nin sarong banhi na paagi kaiyan an gabos na pamilya sa daga magbebendisyon sa sainda man sana.—Genesis 12:1-3; 18:18, 19; 22:18; Salmo 83:18; Hebreo 11:8-16.
Sa paghinanapos kan ika-16 na siglo B.C.E., an gikan kan makoapo ni Abraham na si Jacob, o Israel, nagin 12 tribo na nasa kaoripnan sa Egipto. Ilinigtas ni Jehova an mga Israelitas na ini sa Egipto asin ginibo sindang sarong nasyon. Paagi ki Moises sa Bukid nin Sinai itinao nia sa sainda an Pagboot bilang konstitusyon kan saindang nasyon. Si Jehova an saindang Hade, Hokom, asin Paraboot. An nasyon nin Israel nagin an piniling banwaan nin Dios, an saiyang mga saksi, na inorganisar tanganing mag-otob sa saiyang katuyohan. Paagi sa sainda maabot an Mesiyas, na mapatindog nin daing sagkod na kahadean para sa kapakinabangan nin mga tawo hale sa gabos na nasyon.—Exodo 19:5, 6; 1 Cronica 17:7-14; 1 Hade 4:20, 25; Isaias 33:22; 43:10-12; Roma 9:4, 5.
Pakalihis nin 15 siglo, o kaidtong mga 2,000 na taon na an nakaagi, isinugo nin Dios an saiyang bugtong na Aki hale sa langit pasiring sa daga, tanganing ipangaki kan daragang Judia na si Maria. Nginaranan siang Jesus asin magmamana sia kan Kahadean na ipinanuga nin Dios sa saiyang apoon na si David. Sa edad na 30, si Jesus binautismohan ni Juan Bautista asin nagpoon na magpahayag kan Kahadean nin Dios. Paagi sa pagpaomay sa may helang, ipinaheling nia kun paano an nagdadangadang na Kahadean na iyan magbebendisyon sa katawohan. Paagi sa mga ilustrasyon, ipinaliwanag nia kun ano an hahagadon sa gabos na boot nin buhay na daing katapusan. Dangan si Jesus ginadan sa hariging pasakitan, na an saiyang sangkap na buhay bilang tawo nagin sarong pantubos para sa katawohan.—Mateo 1:18-24; 3:13-16; 4:17-23; 6:9, 10; kapitulo 13; 20:28; Lucas 1:26-37; 2:14; 4:43, 44; 8:1; Juan 3:16; Gibo 10:37-39.
Ipinaliwanag ni Jesus na an Mesiyanikong Kahadean patitindogon sa harayo pang ngapit, sa pagtatapos kan palakaw nin mga bagay. Sa panahon na iyan sia magigin presente na dai naheheling duman sa kalangitan bilang an natutukaw na Hade asin iparirisa an saiyang presensia paagi sa pagtao kan saiyang atension sa daga. Ipinaheheling kan mga pangyayari sa kinaban na kita nabubuhay na sa panahon na ini poon kan 1914. Arog kan ihinula ni Jesus, an maogmang bareta kan Kahadean ihinuhulit sa bilog na daga bilang patotoo sa gabos na nasyon. Bilang resulta, an mga tawo hale sa gabos na nasyon tinitipon na mapasa lado kan Kahadean nin Dios. An mga ini makaliligtas sa katapusan kan presenteng palakaw nin mga bagay asin magkakamit nin buhay na daing katapusan sa daga sakop kan Mesiyanikong Kahadean.—Mateo, kapitulo 24 asin 25; Kapahayagan 7:9-17.
An dakol na iglesya naghihingako na nag-ootob sa kabotan nin Dios ngonyan. Alagad paano nindo mamimidbid an tunay na Kristianong kongregasyon? Paagi sa pagsiyasat sa Kasuratan manongod sa Kristianong kongregasyon kan enot na siglo dangan pagheling kun siisay ngonyan an nag-aarog sa arogan na iyan.
• Ano an nagin kabtang ni Abraham asin kan Israel sa pagkaotob kan katuyohan nin Dios?
• Ano an nagibo ni Jesus paagi sa saiyang ministeryo asin sa saiyang kagadanan?
• Anong mga pangyayari an ihinula na matanda sa satong presenteng panahon?