Sarong Banggi na Maninigong Girumdomon

An petsang Nisan 14 iyo an anibersaryo kan pagkaligtas kan Israel sa Egipto. Iyan anibersaryo na ipinagboot sa mga Judio na girumdomon taon-taon paagi sa sarong espesyal na pamanggihan. Sa panahon kaiyan kaipuhan na ipaliwanag ninda sa mga akion pa kun paanong an dugo kan kordero nin Paskua na ibinugtak sa mga harigi asin itaas kan mga tata nakaprotehir sa mga panganay kan mga pamilyang Israelita tumang sa anghel nin Dios na nangagadan.—Exodo 12:21-27.

Mga 1,545 na taon sana pakalihis kaiyan, sa Nisan 14 man giraray, pinonan ni Jesu-Cristo para sa saiyang mga disipulo na kalinya para sa langitnon na Kahadean an bagong selebrasyon na masalida sa Paskua. Sa sarong simpleng seremonya, ginamit ni Jesus an daing lebadurang tinapay asin an arak bilang mga simbolo kan saiyang buhay bilang tawo, na saiyang iaatang para sa katawohan. An saiyang atang may puwersang magligtas na mas makosog ki sa kordero nin Paskua. (Juan 1:29) Kan pinoponan an memorial kan saiyang atang, si Jesus nagsabi: “Padagos na gibohon nindo ini sa paggirumdom sa sako.”—Lucas 22:19.

An mga Saksi ni Jehova nag-iimbitar sa saindo na magin presente para sa pagselebrar kan mahalagang gayong Memorial na ini. Sa taon na ini an petsa sa satong kalendaryo na katimbang kan Nisan 14 Lunes, Marso 24, pagkasolnop kan aldaw. Puwede kamong umatender sa aldaw na iyan sa Kingdom Hall na pinakaharani sa saindong harong. Ihapot sa lokal na mga Saksi ni Jehova an eksaktong oras.