Report kan mga Parabalangibog kan Kahadean

Maogmang Pag-iriba-iba Liwat sa Brazil

Sa 67 mga misyonerong nag-adal sa Gilead na naglilingkod sa presente sa Brazil, an 63 nagtiripon sa sangang opisina asin nagpakua kan makasaysayan na retratong ini. An maogmang pag-iribaiba liwat na ini nangyari kan Nobyembre 18, 1986, sa pagsongko ni A. D. Schroeder, sarong miembro kan Namamahalang Grupo nin mga Saksi ni Jehova sa Brooklyn, Nueva York.

Haros eksakto sa aldaw 41 taon na an nakaagi—kan Nobyembre 17, 1945—na an duwang naggraduwar sa enot na klase kan Watchtower Bible School of Gilead nag-abot sa Brazil. Para sa saro sa sainda, si Charles Leathco (sa likod, sa wala kan nasa tahaw), ini espesyal na pag-iribaiba liwat ta sia asin an bisitang si Charlotte Schroeder magkaklase sa Gilead, asin si Tugang na Schroeder saro sa mga instruktor.

Poon kan enot na klaseng idto, 258 misyonero na an nagduman sa Brazil. Kabilang sainda an 16 na propiong taga-Brazil. An saro sa sainda, si Augusto Machado (sa wala sa atubangan), nakanood kan katotoohan sa sarong naenot na misyonero, nag-adal sa Gilead asin nagbuwelta sa Brazil. Naglilingkod sia sa sangang opisina sa nakaaging 30 taon asin ngonyan iyo an coordinator kan Komite kan Sanga. Minsan ngani an dakol sa mga misyonero mayo na sa paglilingkod bilang misyonero, nagdadanay an marahay nindang nagibo. Kan 1945 394 sana an parahayag kan Kahadean sa nasyon na iyan; ngonyan an Brazil nakalihis na sa 200,000, na nagreport nin peak na 201,226 na parahayag kan Pebrero 1987.

Kanigoan kagayagaya para sa mga misyonero sa Brazil, hoben asin gurang, na girumdomon sa maogmang pag-iribaiba liwat na ini an gabos na maogmahon na aktibidad sa nakaaging 41 taon.