An Pagkatakot daw Perming Nakararaot?
IYAN puwedeng makaraot sa kaogmahan asin makalaglag sa paglaom. Iyan inaapod na ilo sa isip, an paralaglag nin rason, asin iyan sinasabing orog kamapanlaglag kisa pinakagrabeng pisikal na kamatean. Iyo, an pagkatakot sarong makapangyarihan na emosyon. Alagad, iyan daw perming nakararaot?
Imahinaron na nagmamaneho kamo sa sarong dai kabisadong tinampo. An tinampo pasakat sa kabukidan asin nagpopoon na magkurbada asin magsikosiko. Nagpopoon nang magdiklom an banggi, asin nagpopoon naman na magtapuyas nin niyebe. An saindong kotse nagpopoon nang mapahalnas, asin narisa nindo na yaon na kamo sa halangkaw na lugar na an tinampo nagigin nang mahalnas huli sa yelo.
Ngonyan kaipuhan na kamong magin biyong alisto. Mantang maingat kamong nagmamaneho sa lambang mayelong kurbada, iniisip nindo na madali sanang mawaran nin kontrol an kotse sa mahalnas na lugar asin maholog sa kababan sa ibaba. Dugang pa, dai nindo aram an iba pang peligro na naghahalat sa kadikloman. Mantang minasabong an mga arog kaini sa saindong isip, an saindong ngoso nagmamara asin an saindong puso nagkukutabkutab nin mas marikas. Biyo na kamong mata. Ano man an saindong iniisip kan enot, biyo nang nakasentro an saindong isip ngonyan sa saindong ginigibo: na papagdanayon na yaon sa tinampo an kotse asin likayan an aksidente.
Katapustapusi, an tinampo palugsot na sa mas hababang lugar. Igwa na nin mga ilaw sa kalye, asin mayo na nin yelo. Luway-luway, nahahale na an kahaditan sa saindong hawak. Pamugtak na an saindong boot asin nakakahangos na kamo nin hararom huli sa pakaginhawa. An makuring pagkatakot na idto dai man nin kamanungdanan!
Alagad gabos daw idto daing kamanungdanan? Bako man. An rasonableng pagkatakot sa irarom nin siring na mga kamugtakan sarong normal na reaksion. Ginigibo kita kaining alisto, marigmat. An marahay na pagkatakot makatatabang sato na dai gumibo nin ano man na paborobigla, na ipinahahamak an sadiri. Iyo, an pagkatakot bakong perming paralaglag nin rason o sarong ilo sa isip. Sa irarom nin nagkapirang kamugtakan, iyan puwede nganing magin kapakipakinabang.
An Biblia nagtataram manongod sa pagkatakot asin duwang partikular na klase an dinadara sa satong atension. An sarong klase nin pagkatakot saro nanggad na ilo sa isip. Alagad an saro bako sanang normal asin marahay kundi kaipuhan sa satong kaligtasan. Ano an duwang klaseng pagkatakot? Asin paano niato manonodan na makultibar an saro mantang linilikayan an saro? Ini an pag-oolayan sa masunod na artikulo.