Kapahayagan—An Mamuraway na Kulminasyon Kaiyan Harani Na!

Kasumpay kan Kapitulo 25: Pagbuhay Liwat sa Duwang Saksi

25. (a) Kasuarin sinabihan an duwang saksi na, “Sakat kamo digdi,” asin paano iyan nangyari? (b) Ano an nakakasustong epekto sa dakulang siudad kan pagbalik liwat sa duwang saksi?

²⁵ Paorootrong pinagmaigotan kan Kakristianohan na otrohon an saiyang kapangganahan kan 1918. Isinagibo nia an pagsururog, legal na pagmaniobra, pagbilanggo, minsan mga paggadan​—na gabos daing kamanungdanan! Pakatapos kan 1919 an espirituwal na nasasakopan kan duwang saksi dai na nia naaabot. Kan taon na iyan sinabi sainda ni Jehova: “Sakat kamo digdi,” asin sinda nagsakat sa halangkaw na espirituwal na kamugtakan kun saen naheheling sinda kan saindang mga kaiwal alagad dai sinda nadudotdot. Ilinadawan ni Juan an nakasusustong epekto sa dakulang siudad kan pagbabalik sainda: “Asin kan oras na iyan nangyari an makosog na linog, asin an ikasampulong kabtang kan siudad nahulog; asin pitong ribo katawo an nagadan huli kan linog, asin an iba natakot asin nagpamuraway sa Dios kan langit.” (Kapahayagan 11:​13) Nagkaigwa nanggad nin makokosog na kariribokan sa rona nin relihiyon. An daga garo natanyog sa irarom kan mga lider kan establisadong mga iglesya mantang nagpadagos sa gibohon an grupong ini nin napakosog liwat na mga Kristiano. An ikasampulong kabtang kan saindang siudad, an piguratibong 7,000 katawo, naapektaran nanggad kaya sinasabing sinda nagkagaradan.

26. Sairisay an irenerepresentar kan “ikasampulong kabtang kan siudad” asin kan “pitong ribo” sa Kapahayagan 11:​13? Ipaliwanag.

²⁶ An ekspresyon na “ikasampulong kabtang kan siudad” nagpapagirumdom sato na si Isaias naghula dapit sa suanoy na Jerusalem na an ikasampulong kabtang makaliligtas sa kalaglagan kan siudad bilang banal na banhi. (Isaias 6:13) Sa kaagid na paagi, an bilang na 7,000 nagpapagirumdom sato na kan namatean ni Elias na sia sana an nagdanay na maimbod sa Israel, sinabihan sia ni Jehova, na sa katunayan, 7,000 pa an dai naghorohod ki Baal. (1 Hade 19:​14, 18) Kan enot na siglo, sinabi ni apostol Pablo na an 7,000 ini nagladawan sa natada kan mga Judio na naghimate sa maogmang bareta manongod sa Cristo. (Roma 11:​1-5) An mga kasuratan na ini matabang sato na masabotan na an “pitong ribo” asin an “ikasampulong kabtang kan siudad” sa Kapahayagan 11:​13 iyo idtong mga naghimate sa ibinalik liwat na duwang saksi asin binayaan an makasalan na dakulang siudad. Nagadan sinda, an boot sabihon, sa Kakristianohan. An saindang ngaran hinale na sa listahan nin mga miembro. Dai na sia nag-eeksister kun manongod sa saiya.a

27, 28. (a) Paano an ‘iba nagpamuraway sa Dios kan langit?’ (b) Ano an napiritan na akoon kan klero kan Kakristianohan?

²⁷ Alagad paanong an ‘iba [kan Kakristianohan] nagpamuraway sa Dios kan langit’? Sierto nanggad na bakong paagi sa pagbaya sa saindang apostatang relihiyon asin pagigin mga lingkod nin Dios. Imbes, ini siring kan ipinaliwanag sa Vincent’s Word Studies in the New Testament, sa pagkomento sa ekspresyon na “nagpamuraway sa Dios kan langit.” Sinasambit duman: “An frase nagpapaheling bako nin pagkakombertir, ni pagbakle, ni pagpasalamat, kundi pagmidbid, na iyo an perming kahulogan kan kasuratan. Ikomparar an Jos. vii. 19 (Sept.). Juan ix. 24; Gibo xii. 23; Roma iv. 20.” Sa saiyang kasosopgan, kaipuhan na akoon kan Kakristianohan na an Dios kan mga Estudyante kan Biblia nagsagibo nin dakulang paghiro sa pagbalik liwat sainda sa Kristianong gibohon.

²⁸ Tibaad ginibo kan klero an pag-akong ini sa kaisipan sana, o sa sainda mismo. Sierto nanggad, mayo sainda sono sa rekord an nag-ako sa publiko kan Dios kan duwang saksi. Alagad an hula ni Jehova paagi ki Juan nakatabang sato na masabotan kun ano an nasa puso ninda asin marealisar an nakasosopog na pagkabigla na naeksperyensiahan ninda kan 1919. Magpoon kan taon na iyan padagos, mantang binayaan kan “pitong ribo” an Kakristianohan sa ibong kan saiyang determinadong pagmamaigot na pogolan an saiyang mga karnero, napiritan an klero na akoon na an Dios kan grupong Juan mas makosog kisa saindang dios. Sa masurunod na mga taon marerealisar ninda ini nin mas malinaw, mantang an kadakol pang iba kan saindang mga aripompon mahale, na magtataram kaagid kan mga tataramon kan mga tawo kaidtong nanggana si Elias tumang sa mga relihiyonista ni Baal sa Bukid nin Carmelo: “Si Jehova an tunay na Dios! Si Jehova an tunay na Dios!”​—1 Hade 18:39.

29. Ano an sinabi ni Juan na marikas na nagdadangadang, asin anong dugang na pagtanyog an naghahalat sa Kakristianohan?

²⁹ Alagad dangoga! Sinasabi sato ni Juan: “An ikaduwang herak man nakaagi na. Uya! An ikatolong herak man marikas na nagdadangadang.” (Kapahayagan 11:​14) Kun an Kakristianohan natanyog sa mga nangyari na, ano an gigibohon nia kun ianunsio na an ikatolong herak man, patanogon kan ikapitong anghel an saiyang trumpeta, asin an banal na hilom nin Dios matapos na sa katapustapusi?​—Kapahayagan 10:7.

[Nota sa Ibaba]