Sarong Madonong na Ginibo Bago an Kalamidad

MANTANG darakula na an mga aki ni Mary, may panahon na sia asin nagdesisyon siang magtrabaho nin por ora. Alagad, kan sabihan nia an saiyang agom, si Enos, liniwanag kaini na dai sia kaipuhan na gumibo kaiyan. “Kun kaya kong buhayon ka asin an mga aki, seguradong kaya kong buhayon kitang duwa ngonyan,” sabi nia. Imbes na papagtrabawohon an saiyang agom na babae, isinuherir nia na mapagngayongayo niang horophoropon an pagigin payunir, bilog na panahon na parabalangibog kan Kahadean.

Minsan ngani si Mary nawiwiling darahon sa saiyang pagtaraed an mensahe kan Kahadean, sia masosopgon asin daing kompiansa sa sadiri. Pero, boot niang kuyogon an hatol kan saiyang agom. Kaya, medyo nag-uurong-sulong, sia nagpalista bilang auxiliary payunir kan Abril 1981.

Si Mary madaling tinubuan nin pagkamoot sa paghuhulit kan Kahadean na dai pa nia namatean kaidto. Dai nahaloy, apat na an pinangengenotan niang pag-adal sa Biblia kaiba an mga interesado. Sa laog nin sarong taon sia nagin regular payunir, na nangengenot sa sampulong pag-adal sa Biblia. Si Christine, sarong Saksi ni Jehova na may duwang aking nag-eeskuwela pa, entusiastikong nag-iba ki Mary bilang partner nia sa pagpapayunir. An mga bagong interesado nagpoon na mag-atender sa mga pagtiripon sa lokal na Kingdom Hall, na duman nagtutubo an marahay na espiritu sa pagpapayunir. Asin an pinakadakulang kaogmahan ni Mary nag-abot kan an aki nia, si Christopher, magdesisyon na umarog sa saiyang halimbawa asin magin man payunir.

Dangan, bigla na sana, kan 1985 nag-abot an makamomondong pangyayari. Nadismayo si Mary. An aneurisma sa saiyang payo nagbunga nin grabeng pagdugo sa hotok, asin pagtolong aldaw gadan na an 45 anyos na si Mary.

Alagad, sa laog kan apat na taon na pagpapayunir, si Mary nakagibo nin marahay na ngaran sa saiyang komunidad. Labing 300 an nakilobong sa saiya, kabale an dakol na pagtaraed. An saro sa mga presente dati niang amiga sa klase na naghanga sa pagtubod ni Mary, gustong makanood nin orog pa manongod kaiyan, asin naghagad nin pag-adal sa Biblia. Nagbubunga pa an ministeryo ni Mary.

“Ako auxiliary payunir naman ngonyan,” sabi ni Enos, “pero kutana nag-iba ako ki Mary kan sia nagpapayunir. Dai siang pondo sa pag-estorya kan saiyang mga eksperyensia asin maogmahon sia. An totoo, an pirang taon na idto iyo an pinakamaogma sa samong pag-iba-iba, pero ngonyan ko sana nasabotan kun taano.”

Mayo nin makapagsasabi kun noarin maniningil an “panahon asin pagkanorongod,” arog kan biglang ginibo kaiyan ki Mary. Minsan siring, an mga nagdadanay na maimbod bilang mga parabalangibog kan Kahadean nakaseseguro sa marahay na pagmidbid kapwa nin Dios asin nin tawo, minsan sa atubangan nin kalamidad.—Eclesiastes 9:11; 11:1, 2.

[Mga ritrato sa pahina 31]

An pakikikabtang sa ministeryo panahon na ginamit sa marahay