Maninigo daw Kamong Tumubod sa Trinidad?: Maninigo daw Kamong Tumubod Dian?
1, 2. Ano an ikatataong mga komento manongod sa doktrina nin Trinidad?
MINATUBOD daw kamo sa Trinidad? An kadaklan sa Kakristianohan iyo. Total, iyan an pangenot na doktrina kan mga iglesya sa dakol na siglo.
2 Huli kaini, iisipon nindo na dai na iyan mapagdududahan. Alagad ta iyo, asin kaining mga nakaaagi pa sana pati an pira sa mga parasuportar kaiyan ginatongan pa an kontrobersia.
3. Taano ta maninigo kitang magkainteres sa tema nin Trinidad sa satong aldaw?
3 Taano an temang arog kaini ta dai puwedeng pahelingan nin minaagi sanang interes? Huli ta si Jesus mismo nagsabi: “An buhay na daing sagkod iyo ini: an mamidbid ka, an iyo sanang tunay na Dios, asin si Jesu-Cristo na saimong sinugo.” Kaya an bilog niatong ngapit nasasarig sa satong pakamidbid sa tunay na naturalesa nin Dios, asin iyan nangangahulogan nin pagsiyasat sa pinakagamot kan kontrobersia sa Trinidad. Kun siring, taano ta dai nindo iyan siyasaton mismo?—Juan 17:3, Katolikong Jerusalem Bible (JB).
4. Sa halipot, ano an katokdoan na Trinidad?
4 Igwa nin laen-laen na ideyang Trinitaryo. Alagad sa pankagabsan an katokdoan na Trinidad iyo na an Dios may tolong persona, an Ama, Aki, asin Espiritu Santo; pero, iriba sinda saro sanang Dios. Sinasabi kan doktrina na an tolo pantay, makakamhan sa gabos, asin dai linalang, na nabuhay sagkod lamang sa pagka-Dios.
5. Ano an sinasabi kan mga dai minaako kan doktrina?
5 Alagad an iba man nagsasabi na an doktrina nin Trinidad falso, na an Makakamhan sa gabos na Dios nagsosolo bilang separado, daing sagkod, asin makapangyarihan sa gabos na persona. Sinasabi ninda na si Jesus sa saiyang pagkabuhay bago nagin tawo, kapareho kan mga anghel, separadong espiritung persona na linalang nin Dios, asin sa dahelan na ini sia may kapinonan. Itinotokdo ninda na si Jesus nungka na nakapantay sa Makakamhan sa gabos na Dios sa ano man na sentido; sia poon pa kaidto perming sakop nin Dios asin sagkod ngonyan sakop pa. Sinda man nagtutubod na an espiritu santo bakong persona kundi espiritu nin Dios, an saiyang puwersa aktiba.
6. Paano isinasaysay an ginikanan kan Trinidad (a) kan mga parasuportar? (b) kan mga kritiko?
6 An mga parasuportar sa Trinidad nagsasabi na iyan basado bako sanang sa relihiyosong tradisyon kundi siring man sa Biblia. An mga kritiko sa doktrina nagsasabi na iyan bakong katokdoan kan Biblia, na sinasabi pa ngani nin sarong reperensia sa kasaysayan: “An ginikanan kan [Trinidad] biyong pagano.”—The Paganism in Our Christianity.
7. Ano an pirang ibubunga (a) kun totoo an Trinidad? (b) kun iyan falso?
7 Kun totoo an Trinidad, nakakapababa ki Jesus na sabihon na nungka siang kapantay nin Dios bilang kabtang nin pagka-Dios. Alagad kun falso an Trinidad, nakakapababa sa Makakamhan sa gabos na Dios na apodon na kapantay nia an siisay man, asin mas grabe pa apodon si Maria na “Ina nin Dios.” Kun falso an Trinidad, linalanghadan an Dios sa pagsabi, arog kan sinasabi sa librong Catholicism: “Kun an Pagtubod na ini dai papagdadanayon [nin mga tawo] na bilog asin daing digta, daing duwa-duwa na [sinda] mapapara sagkod lamang. Asin an Pagtubod na Katoliko iyo ini: sinasamba niamo an sarong Dios sa Trinidad.”
8. Ano an sisiyasaton sa minasunod na pirang artikulo?
8 Kaya may marahay na mga dahelan kun taano ta maninigo nindong mawoton na maaraman an katotoohan manongod sa Trinidad. Alagad bago niato siyasaton an ginikanan kaiyan asin an paghihingako na iyan totoo, makatatabang na mas espisipikong ipaliwanag an doktrinang ini. Ano man nanggad an Trinidad? Paano iyan ipinaliliwanag nin mga parasuportar dian?