An mga Hitsura Puwedeng Nakakadaya
“MAYO nin mapaniniwalaan na mga hitsura,” an sabi kan dramatistang taga-Irlandia na si Richard Sheridan. Ini totoo sa mga kahoy siring man sa mga tawo.
Sarong aldaw sa paghinanapos nin Marso kan taon 33 C.E., naheling ni Jesu-Cristo an sarong higuerra mantang sia asin an saiyang mga disipulo naglalakaw hale sa Betania pasiring sa Jerusalem. An kahoy marambong na marhay, alagad an mas haraning pagsiyasat nagpaheling na iyan mayo man lamang nin bunga. Kaya sinabi dian ni Jesus: “Mayo na nin makakan nin bunga hale sa saimo sagkod lamang.”—Marcos 11:12-14.
Taano ta sinumpa ni Jesus an kahoy na iyan mantang, arog kan ipinaliliwanag ni Marcos, “bako kaidtong panahon nin mga higos”? (Marcos 11:13) Bueno, kun an higuerra nagdadahon, sa normal nagbubunga man iyan nin amay na mga higos. Pambihira para sa higuerra na magkaigwa nin mga dahon sa panahon na iyan nin taon. Alagad mantang iyan igwa nin mga dahon, tama sanang laoman ni Jesus na makakua dian nin mga higos. (Helingon an retrato sa itaas.) An katunayan na an kahoy nagkaigwa sana nin mga dahon nangangahulogan na iyan magigin bakong mabunga. An hitsura kaiyan nakakadaya. Mantang an mga kahoy na prutas binubuwisan, an daing bungang kahoy sarong pagabat sa ekonomiya asin kinakaipuhan na putolon.
Ginamit ni Jesus an daing bungang higuerra na iyan tanganing iilustrar an mahalagang leksion manongod sa pagtubod. Kan sumunod na aldaw, nakubhan an saiyang mga disipulo na maheling na alang na an kahoy. Ipinaliwanag ni Jesus: “Magtubod kamo sa Dios. . . . An gabos na bagay na saindong ipinamimibi asin hinahagad tubodon nindo na haros naako na nindo, asin iyan makakamtan nindo.” (Marcos 11:22-24) Sa dugang na pag-ilustrar kan pangangaipo na mamibi na may pagtubod, an alang na higuerra klarong nagpaheling kun ano an mangyayari sa sarong nasyon na mayong pagtubod.
Mga pirang bulan bago kaiyan ikinomparar ni Jesus an Judiong nasyon sa sarong higuerra na nagin daing bunga sa laog nin tolong taon asin puputolon kun iyan magdanay na daing bunga. (Lucas 13:6-9) Paagi sa pagsumpa sa higuerra apat na aldaw na sana bago kan saiyang kagadanan, ipinaheling ni Jesus kun paano an Judiong nasyon dai nagprodusir nin mga bunga na angay sa pagsolsol asin kun siring nakalinya para sa kalaglagan. Minsan ngani an nasyon na iyan—arog kan higuerra—artipisyal na garo mataba, an mas haraning pagheling nagpapahayag nin pagkadaing pagtubod na suminagkod sa pagsikwal kan Mesiyas.—Lucas 3:8, 9.
Sa saiyang Sermon sa Bukid, nagpatanid si Jesus tumang sa “mga falsong propeta” asin nagsabi: “Paagi sa saindang mga bunga mamimidbid nindo sinda. Noarin man an mga tawo dai minaguno nin ubas sa mga tonok o nin mga higos sa mga binit, bako daw? Siring man an gabos na kahoy na marahay nagbubunga nin marahay, alagad an gabos na kahoy na raot nagbubunga nin daing data; an marahay na kahoy dai makakapagbunga nin daing data, ni makakapagbunga man nin marahay an raot na kahoy. An gabos na kahoy na dai nagbubunga nin marahay pinuputol asin iinaapon sa kalayo. Tunay, kun siring, paagi sa saindang mga bunga mamimidbid nindo an mga lalaking ini.” (Mateo 7:15-20) An mga tataramon na ini ni Jesus asin an kasaysayan kan isinumpang higuerra malinaw na nagpapaheling na kinakaipuhan niatong magin mapagbantay sa espirituwal, huli ta an relihiyosong mga hitsura puwede man na nakakadaya.