“Siring sa Nangangarob na Leon”
NANINIWALA daw kamo na igwa nin Satanas? Ngonyan, dakol an dai. Minalataw na ibinibilang nindang “bakong sientipiko” an siring na paniniwala. Kaidto pang 1911, an Encyclopædia Britannica nagsabi: “Ipinaliwanag nang marhay kan siensia an kadakol na proseso nin panluwas na naturalesa asin kan panlaog na buhay nin tawo kaya dai nang lugar para sa Satanikong ahensia.” An mga teologo nangangatanosan na si Satanas simbolo sana, eroestorya sana. An The World Book Encyclopedia nagsasabi: “An dakol na modernong teologo ibinibilang an Diablo na simbolo kan puwersa nin karatan, nin pinakamaraot na mga kuwalidad kan naturalesa nin tawo.”
Alagad ta ano an mga katotoohan? Kun kamo nagtutubod sa Biblia, kamo dapat na tumubod na si Satanas tunay. Si Jesus bako sanang nagtubod na sia nabubuhay kundi inapod man siang “poon kan kinaban.” (Juan 14:30) Si apostol Pablo inapod si Satanas na “dios kan palakaw na ini nin mga bagay.” (2 Corinto 4:4) Asin an gurang nang si apostol Juan nagsabi: “An bilog na kinaban namumugtak sa kapangyarihan kan maraot.”—1 Juan 5:19.
Kun kamo dai oyon ki Juan, isipa an bago pa sanang kasaysayan. Horophoropa an mga death squad asin an paggamit nin mga gobyerno nin pagpasakit. Girumdoma an mga guerra asin paglaglag sa mga rasa na naheling kan satong kapag-arakian. Asin kumusta man an maringis na mga krimen na nababareta sa satong mga diaryo—an lagduan na mga paggadan, an mga panlulugos, an sunod-sunod na paggadan, an panlulugos sa mga aki, sa pagngaran sana sa nagkapira? Igwa pa daw nin ibang dios an kinaban na ini apuwera ki Satanas?
An Kristianong si apostol Pedro nagpatanid: “Magpuka kamo. An saindong kaiwal, an Diablo, naglalakaw na siring sa nangangarob na leon, na naghahanap nin masisiba.” (1 Pedro 5:8) Kun may nakabutas na leon sa lugar nindo, pag-oolayan daw nindo kun baga iyan nabubuhay o dai? O kamo daw matago?
Manarig kamo na si Satanas nabubuhay. Sia daing herak asin maringis, asin sia mas makosog kisa sato. Kaya paili sa Saro na mas makosog pa. “An ngaran ni Jehova makosog na torre. Dian minadalagan an matanos asin tinatawan nin proteksion.” (Talinhaga 18:10) Paili ki Jehova Dios, asin aramon nindo na sa dai na mahahaloy an katawohan makakalda sa impluwensia kan maraot na iyan, si Satanas. Iyan magayagaya nanggad na pakaginhawa!—Kapahayagan 20:1-3.