Lumikay sa Mapalangkaw na Espiritu!
An sarong madonong na talinhaga sa Biblia nagsasabi: “An siisay man na ginigibong halangkaw an saiyang pinto naghahanap nin kagabaan.” (Talinhaga 17:19) Ano an diperensia sa halangkaw na pinto? Asin ano an pangenot na punto kan talinhagang ini?
KAN suanoy na mga panahon an mga indibiduwal asin mga grupo nin tulisan na nakasakay sa kabayo ordinaryo sana. An bakong protektadong mga harong sa puwerang mga lugar madaling laogon nin mga mahabon. Tanganing maingatan an saindang mga rogaring sa mahabon, an pirang kagharong naggibo nin lanob na may espesyal na pinto. An lanob halangkaw, pero an pinto hababa. Sa katunayan, an nagkapira dai malangkaw nin sarong metro—hababaon kun malaog an sarong kabayo asin an sakay kaiyan. Idtong mga dai pinahababa an pinto palaog sa saindang patyo nameligro na an mga nangangabayo lumaog asin habonon an saindang mga rogaring.
Sa mga siudad an mga pinto palaog sa patyo kadaklan hababa asin bakong magayon helingon, na mayo nin maririsa sa kayamanan na nasa laog kan nalalanoban na natad. Alagad, sa Persia an sarong halangkaw na pinto saro sa mga tanda nin pagigin mahal na tawo, na hiningoang arogon nin nagkapirang sakop sa ibong nin grabeng peligro. An siisay man na naggibo nin halangkaw na pinto nagdadagka nin paghabon huli sa pagpaheling kan saiyang prosperidad.
Kun siring an Talinhaga 17:19 nagpapaheling na idtong mga ginigibo an saindang pinto na halangkaw naghahanap nin kapahamakan paagi sa pagtaong halaga sa saindang sadiri na labi sa saindang tunay na halaga. An talinhagang ini puwedeng mapanongod man sa ngoso bilang sarong pinto na ilinalangkaw nin mapalangkaw asin mapaabaw-abaw na pananaram. An siring na pagtaram nagkacausa nin pag-iriwal asin puwedeng gumiya sa tawong mapalangkaw pasiring sa kapahamakan. Kanigoan kadonong, kun siring, na lumikay sa mapalangkaw na espiritu!
[Picture Credit Line sa pahina 30]
Picturesque Palestine, Sinai and Egypt, Tomo 1, ni Colonel Wilson (1881)