“Talagang Garo Dai Kami Makapag-olay-olay!”
SI Michael, na abogado, kinaipuhan na magin mapuwersang parakomunikar. Hinahagad iyan kan saiyang trabaho. Alagad pakalihis nin 16 na taon na makapag-agom, napiritan si Michael na akoon na kun sia minapuli sa harong sa saiyang agom, si Adrian, garo baga nawawara an abilidad nia sa komunikasyon. “An panunuyaw, pananatsar, dikit na pagpadinangogan,” an paggirumdom ni Michael, “kami ni Adrian perming nag-iiwal, asin paghona ko iyan man sana an mapapagal samo. Hinorophorop ko kun iyan an pag-aragoman, an daing pondong kariribokan nin pagkadiskontento asin pagkaanggot. Kun iyan an magigin kamugtakan niamo sa natatada pang buhay na magkaiba kami, gusto ko nang dumulag—dai ako nagsusuba. Dai ko kayang atubangon an 20, 30, 40 taon nin siring kaiyan na klase nin parateng pagkaanggot asin tension.”
An mga saboot na siring kaini siertong bakong pambihira ki Michael asin Adrian. Totoo an mga iyan sa dakol na mag-agom na an relasyon inoorooltan nin pag-iriwal asin pag-inulian. An pinakasimpleng pag-orolay minaputok sa berbal na pag-iriwal. Sinda “nakadadangog” nin mga bagay na dai itinataram. Nagtataram sinda nin mga bagay na dai tinutuyo. Sinda nan-aatake asin nan-aakusar, dangan minapondo sagkod sa may paghinanakit na pagkasilensio. Dai sinda nagbubulag, pero sinda bako talagang “sarong laman.” (Genesis 2:24) An relasyon dai pinagkaoyonan. An pag-atras mangangahulogan nin pagbubulag; an pagpaenotan mangangahulogan nin banggaan na pag-atubang sa mga pagkakalaen. Tanganing malikayan an kolog nin arin man na pagpipilian, an mga mag-agom na ini mismong minapondo na nagdadanay na nasa ligtas na emosyonal na distansia sa kada saro.
An siring na mga mag-agom nagkakaipo na ‘magkaigwa nin marahay na paggiya’ sa saindang pag-aragoman. (Talinhaga 1:5) Makukua an giyang ini sa Tataramon nin Dios, an Biblia. Pinatutunayan kan ikaduwang surat ni Pablo ki Timoteo na an Biblia “kapakipakinabang para sa pagtokdo, sa pagsagwe, sa paghusay kan mga bagay.” (2 Timoteo 3:16) Ini nagpapatunay kan magigin kamugtakan sa pagpakarhay kan pagluya sa komunikasyon nin mag-agom, arog kan maheheling niato.