Paghanap sa Natatagong Kayamanan
KAN 1848 nadiskobre an bulawan sa Sutter’s Mill sa California, E.U.A. Pag-abot nin 1849 rinibo an nagtaragboan sa lugar na naglalaom na biglang yumaman, asin an pinakadakulang paghanap nin bulawan sa kasaysayan kan Estados Unidos ginigibo na. Sa laog nin sarong taon sana, an pinakaharaning duungan, an San Francisco, nagdakula poon sa sarong sadit na banwaan sagkod sa sarong siudad nin 25,000. An paglaom sa biglang kayamanan nagpatunay na mapuwersang siod.
Si Hadeng Salomon kan suanoy na Israel nakaaaram kun gurano kaigot na nagkokotkot an mga lalaki para sa natatagong kayamanan, asin sinambit nia ini kan sia sumurat: “Siring man, kun mag-apod ka sa pakasabot asin magkurahaw ka sa pagmansay, kun padagos mong hanapon iyan siring baga sa pirak, asin siring baga sa natatagong kayamanan padagos mong hanapon iyan, sa siring masasabotan mo an pagkatakot ki Jehova, asin makukua mo an mismong kaaraman dapit sa Dios.”—Talinhaga 2:3-5.
Makagigibo kamo nin kadakol na bagay paagi sa bulawan asin pirak, pero makagigibo kamo nin mas dakol paagi sa pakasabot asin pagmansay. Matatabangan kamo kaini na gumibo nin tamang mga desisyon, resolberan an mga problema, pangganahan an pag-aragoman, asin manompongan an kaogmahan. (Talinhaga 2:11, 12) Siring man, an tunay na kaaraman asin kadonongan makatatabang saindo na mamidbid an saindong Kaglalang, masabotan an saiyang mga katuyohan, asin kuyogon patin paogmahon sia. Dai kamo matatawan kan bulawan nin mga bagay na ini.
Totoo an mga tataramon kan Biblia: “An kadonongan proteksion kun paanong an kuwarta proteksion, alagad an pakinabang nin kaaraman iyo ini: na an kadonongan pinagdadanay na buhay an kagsadiri kaiyan.” (Eclesiastes 7:12, New International Version) Mantang an dakol nangangarap nin biglang kayamanan, mas madonong nanggad na buksan an Biblia asin magkotkot para sa pagmansay, pakasabot, kaaraman, asin kadonongan na iyo an tunay na kayamanan.