Sobra daw an Pagheling sa Pag-ineksion nin Dugo?
An mga pag-ineksion nin dugo uso sa modernong medisina, alagad iyan daw talagang nakagigibo kan arog sa dangog kaiyan? Ano sa paghona nindo?
Sa The American Journal of Medicine (Pebrero 1993), si Dr. Craig S. Kitchens naghapot: “Sobra daw an Pagheling sa mga Pag-ineksion nin Dugo?” Sinabi nia na sa parate tinitirutimbang nin mga doktor kun baga an pakinabang sa sarong pagbolong labi sa peligrong puwedeng darahon kaiyan. Kumusta an mga pag-ineksion nin dugo?
Rinepaso ni Kitchens an bagong ebidensia nin dakol na peligro na konektado sa pag-ineksion nin dugo, arog kan hepatitis, naraot na sistema nin paglaban sa helang, pagluya nin organo, asin mga reaksion na bunga kan pagsalakay kan mga selula nin ibinalyong organo sa mga selula kan binugtakan. An sarong pagsiyasat na sinumaryo an “kadakol na komplikasyon” gikan sa mga pag-ineksion nin dugo “nagkonklusyon na an kada pag-ineksion nin dugo igwa nin total na 20% posibilidad sa maraot na reaksion, na an iba simple sana pero an iba nakatatao nin helang,” nakagagadan pa ngani.
Minsan siring, an ipinamumugtak daw na mga pakinabang nagtatao nin katanosan sa pag-atubang sa siring na mga peligro?
Rinepaso ni Dr. Kitchens an 16 na ibinaretang pagsiyasat may labot sa 1,404 operasyon sa mga Saksi ni Jehova, na nagsasayumang paineksion nin dugo bilang pagkuyog sa pagboot kan Biblia na ‘lumikay sa dugo.’—Gibo 15:28, 29.
An resulta? “An desisyon kan mga pasyenteng Saksi ni Jehova na dai paineksion nin dugo sa mayor na mga operasyon minalataw na nakadugang nin 0.5% sagkod 1.5% kagadanan sa pankagabsan na peligro sa operasyon. Bakong gayong malinaw kun guranong helang asin kagadanan an nalilikayan kan ginigibong ini, pero iyan posibleng labi sa peligro nin dai pagpaineksion nin dugo.” (Samo an italiko.) An punto nia? An ano man na medikal na peligro sa pagsayuma sa dugo posibleng mas kadikit kisa mga peligro na kalabot sa pagpaineksion nin dugo.
Kun siring, an rasonableng hapot ni Kitchens: “Kun an dai pag-ineksion nin dugo sa mga Saksi ni Jehova sa aktuwal nagbubunga nin kadikit na grabeng dagdag na helang asin kagadanan asin nakalilikay sa dakol na gastos asin dai nahahaleng mga komplikasyon, maninigo daw na tawan nin mas kadikit na pag-ineksion nin dugo an mga pasyente?”
An mga nagsasayumang paineksion nin dugo basado sa siring na ebidensia magawe man kaoyon sa mga pagboot kan satong Kaglalang.