Panahon nin Pag-ani!
TAANO an kasaysayan kan “Kristianismo” ta nagin grabe kabakong sa Kristiano? Dakol na mapaghorophorop na tawo an naghahapot kaini, alagad sinimbag ini ni Jesus haros 2,000 na taon na an nakaagi paagi sa sarong parabola. Sia nagsabi manongod sa “sarong tawo na nagsabwag nin marahay na banhi sa saiyang oma.” Dangan, “nagdatong an saiyang kaiwal asin nagsabwag nin mga doot sa tanga kan trigo.” Kan tumubo an mga banhi, narisa kan mga trabahador an mga doot asin boot na gaboton iyan. Alagad an lalaki nagsabi: “Pabayai nindong tumubo sindang magkaibanan sagkod sa pag-ani.” Sa panahon nin pag-ani, ibubulag an trigo sa mga doot.—Mateo 13:24-30.
Sa pag-esplikar kan parabola, nagsabi si Jesus na sia mismo an saro na nagsabwag kan “marahay na banhi”—an tunay na mga Kristiano. An kaiwal iyo si Satanas, na nagsabwag kan “mga doot”—na pinalalaog an palsipikadong mga Kristiano sa kongregasyon. Tinogotan ni Jesus an falso asin an tunay na mga Kristiano na iribang mag-eksister—pero sagkod sana sa pag-ani. Dangan pagbubulagon sinda.—Mateo 24:36-44.
Kun siring, dai kita nagngangalas kun naaaraman niato na an “Kristianong” mga organisasyon sa nag-aging mga siglo binasangbasang an Dios paagi sa pagkakaigwa nin paganong mga doktrina, pagkonsinte sa inmoralidad, pagsuportar sa mga guerra nin pananakop, asin paggibo nin maringis na mga inkisisyon. Namimidbid niato digdi an maraot na banhi na itinanom ni Satanas. Alagad, kun nakakabasa kita manongod sa mga indibiduwal na nagtios nin pagkabilanggo o kagadanan imbes na ikompromiso an mga prinsipyo sa Biblia, naheheling niato na an marahay na banhi dai nawara.
Sinabi ni Jesus na an pag-ani “pagtatapos kan palakaw nin mga bagay.” Mantang kita nabubuhay sa pagtatapos kan presenteng palakaw na ini nin mga bagay sa kinaban, siertong ini an panahon nin pag-ani! Kaya an pagbubulag siertong nangyari na sa pag-oltanan kan tunay asin falsong mga Kristiano. Ngonyan, kaipuhan na mag-eksister an sarong banwaan, bako sanang wararak na mga indibiduwal, na tama sa pagkaladawan ni Jesus sa tunay na mga Kristiano—na mga sakop kan Kahadean nin Dios asin naghuhulit kan maogmang bareta manongod dian, na nagpapalakop kan moralidad na basado sa Biblia asin isinisikwal an paganong mga doktrina apabor sa katotoohan kan Biblia, na ipinahahayag an ngaran nin Dios asin bakong kabtang kan kinaban.—Mateo 6:33; 24:14; Juan 3:20; 8:32; 17:6, 16.
Inaasegurar mi kamo, an siring na banwaan nag-eeksister! Mawot daw nindong maglingkod sa Dios sa inooyonan na paagi? Kun siring hanapon an mga tawong ini, asin maglingkod sa Dios kaiba ninda.