An Maigot na mga Kristiano sa Britania

Mayong 10 porsiento sa 56 milyones na tawo sa Britania an maigot na mga Kristiano ngonyan, sono sa The Economist. Kun ordinaryong Domingo, kulang sa apat na milyon katawo an nagsisimba. Sa mga ini, 1.1 milyones sana an Anglicano. Pero sa ibong kan lakop na agnostisismo, ipinagpapadagos kan Iglesya nin Inglaterra an dati na kaining katongdan bilang relihiyon kan Estado. “An Britania dakol nang taon na bakong Kristianong sosyedad pero nagsasayumang admitiron an agnostisismo, sa pangenot huli sa paggirumdom sa mga nakaagi,” an sabi kan iyo man sanang peryodiko. Bakong makangangalas na an modernong mga politiko asin peryodiko hinahagad an pagdis-establisar sa Iglesya, na pagputol sa koneksion kan Iglesya asin Estado.

“An sarong kinaban na sa katunayan sekular, na naghihingakong Kristiano, iyo an pinakamaraot sa mga kinaban,” an agrangay ni Walter Bagehot, an editor kan The Economist kan ika-19 siglo. Pero kan enot na siglo C.E., sinabi ni Jesus na an saiyang mga disipulo ‘bakong kabtang kan kinaban, kun paanong sia bakong kabtang kan kinaban.’ (Juan 17:16) Alagad, isinugo nia sinda sa kinaban na maghulit kan Kahadean nin Dios. Siring man ngonyan, an mga Saksi ni Jehova sa bilog na kinaban midbid na marhay sa maigot na paghuhulit “sa publiko asin sa pagharongharong.”​—Gibo 20:20.

Kun ikokomparar sa mga Anglicano, an 126,173 na Saksi sa Britania sadit an bilang. Pero naggagamit sinda nin mga 20 oras kada bulan sa pag-atender sa Kristianong mga pagtiripon. Dugang pa, durante kan 1992 an kada Saksi naggamit nin promedyong 16 pang oras kada bulan sa pagpahayag sa iba kan maogmang bareta kan Kahadean nin Dios, an gobyerno na sa dai na mahahaloy maestablisar nin sarong matanos na bagong kinaban. (Mateo 24:​14; 2 Pedro 3:13) Sa sunod na dumalaw sa harong nindo an mga Saksi ni Jehova, hihinanyogon daw nindo an saindang nagpapamidbid na mensahe asin aaramon kun ano an nagmomotibar sa saindang kaigotan?