Paduman sa Langit o sa Impierno?
“ANO an mga posibilidad nindo sa pagduman sa langit o sa pagduman sa impierno?”
Sa pundamental, ihinapot iyan sa gabos na klaseng Amerikano sa dai pa sana nahaloy na surbey. An Sentro nin Pagsiyasat sa Relihiyon sa Princeton ipinublikar an mga resulta sa Religion in America 1992-1993.
Paano nindo sisimbagon iyan? Ano an mga posibilidad na maduman sa langit pagkagadan an saindong agom o iba pang namomotan sa buhay? Sa paghona daw nindo posible na kamo, o sinda, mapaduman sa impierno?
Ipinaheling kan surbey na 78 porsiento an naghona na marahay o ekselente an saindang mga posibilidad sa pagduman sa langit, mas dakol kisa nagsimbag nin siring mga 40 taon na an nakaagi. Impierno? Mga 77 porsiento an nagsabi na dikit an posibilidad sa pagduman.
Basado daw sa tamang kaaraman sa Biblia an saindang mga simbag? Bueno, mga 4 sa 10 an nag-admitir na mas bihira nang mag-atender sa relihiyosong mga pagsimba kisa kaidtong nakaaging limang taon. Beinte-otso porsiento sana an nagsabi na nakikikabtang sa mga grupo nin pag-adal sa Biblia asin 27 porsiento an sa mga klase nin relihiyosong edukasyon.
Kun maingat nindong pag-aadalan an Biblia, makanonompong kamo nin nakasosorpresang mga katunayan. Halimbawa, direktang nagsasabi an Biblia na kan nagadan si Jesus nagduman sa “impierno,” arog kan pagkatradusir sa nagkapirang bersion kan Biblia. (Gibo 2:31, King James Version; “Hades,” New World Translation) Pinatutunayan man kan Tataramon nin Dios na kan nagadan si Hadeng David asin si Juan Bautista dai nagduman sa langit. (Mateo 11:11; Gibo 2:29) Iyan mga katunayan, bako sanang mga opinyon gikan sa sarong relihiyosong surbey.
An iba pang katunayan na puwedeng makaapektar saindo: Itinotokdo kan Biblia na an mga apostol ni Jesus asin an limitadong bilang nin iba pa kukuanon pasiring sa langit tanganing maghade kaiba ni Jesus. Alagad, an kadaklan sa mga tawo na nagkagaradan na nagduman sana sa pankagabsan na lolobngan nin katawohan. Bubuhayon liwat sinda nin Dios, na ibinabalik sinda sa buhay digdi sa daga na may paglaom sa lubos, maogma, dagos-dagos na buhay sa ibinalik liwat na paraisong daga.
Maoogma an mga Saksi ni Jehova na tabangan kamo na patunayan gikan sa saindong sadiring Biblia an masasarigan na basihan para sa paglaom na iyan.