An Pinakadakulang Tawo na Nabuhay Kasuarin Pa Man

Kapitulo 11: Inandam ni Juan an Dalan

DESISIETENG taon na an uminagi magpoon kan si Jesus sarong 12-anyos na aki na hinahapot an mga paratokdo sa templo. Tigsoli ngonyan kan taon 29 C.E., asin garo baga an gabos nag-oorolay manongod sa pinsan ni Jesus na si Juan, na naghuhulit sa bilog na kadagaan sa palibot kan Salog nin Jordan.

Si Juan tunay nanggad na kahangahangang tawo, kapwa sa itsura asin pananaram. An saiyang gubing gibo sa balukag nin kamelyo, asin binubugkos nia nin hagkos na anit an saiyang habayan. An saiyang kakanon mga doron asin tangguli. Asin an saiyang mensahe? “Magsorolsol kamo, huli ta an kahadean kan kalangitan naghaharani na.”

An mensaheng ini nakapukaw sa mga nagdadangog saiya. An dakol nakarealisar kan saindang pangangaipong magsolsol, an boot sabihon, bakleon an saindang ugale asin isikwal an dati nindang paagi nin pamumuhay bilang daing data. Kaya hale sa bilog na teritoryo sa palibot kan Jordan, asin patin hale sa Jerusalem, kadakol na tawo an nagduruman ki Juan, asin binautismohan nia sinda, na ilinaladop sinda sa katubigan kan Jordan. Taano?

Binautismohan ni Juan an mga tawo bilang simbolo, o pagpaheling, kan saindang odok sa pusong pagsolsol sa mga kasalan tumang sa tipan kan Pagboot nin Dios. Kaya, kan may mga Fariseo asin Saduceo na nagduruman sa Jordan, kinondenar sinda ni Juan. “Mga kapag-arakian nin mga rimoranon,” an sabi nia. “Magpaheling ngani kamo nin bunga na maninigo sa pagsolsol; asin dai kamo mangahas na magsabi sa saindong sadiri, ‘Igwa kami nin Abraham bilang samuyang ama.’ Huli ta sinasabi ko sa saindo na kaya nin Dios na bumuhay nin mga aki ni Abraham hale sa mga gapong ini. An patok namumugtak na sa gamot kan mga kahoy; an lambang kahoy, kun siring, na dai namumunga nin marahay papalodon asin isusugba sa kalayo.”

Huli kan pagigin popular ni Juan, an mga Judio nagsugo sa saiya nin mga saserdote asin Levita. An mga ini nagharapot: “Siisay ka?”

“Bako ako an Cristo,” an pagtuga ni Juan.

“Ano, kun siring?” an hapot ninda. “Ika si Elias?”

“Bako ako,” an simbag nia.

“Ika An Propeta?”

“Bako!”

Kaya nag-insister sinda: “Siisay ka? tanganing kami makatao nin simbag sa mga nagsugo samo. Ano an sinasabi mo manongod sa saimong sadiri?”

Si Juan nagpaliwanag: “Ako sarong tingog kan saro na nagkukurahaw duman sa kaawagan, ‘Tanosa nindo an dalan ni Jehova,’ siring sa isinabi ni Isaias na propeta.”

“Taano, kun siring, ta nagbabautismo ka,” an boot nindang maaraman, “kun ika mismo bakong an Cristo o si Elias o An Propeta?”

“Ako nagbabautismo sa tubig,” an simbag nia. “Sa tahaw nindo may saro na nagtitindog na dai nindo midbid, an saro na madatong sa hudian ko.”

Iinaandam ni Juan an dalan paagi sa pagbugtak kan mga tawo sa tamang kamugtakan nin puso sa pag-ako sa Mesiyas, na magigin Hade. Manongod sa Saro na ini, si Juan nagsabi: “An saro na masunod sa sako orog na makosog kisa sako, na dai ngani ako angay na magtangkas sa saiyang sandalyas.” An totoo, si Juan nagsabi pa ngani: “An saro na madatong sa hudian ko naenot sa sako, huli ta sia nabuhay nin enot sa sako.”

Sa siring, an mensahe ni Juan na, “an kahadean kan kalangitan naghaharani na,” nagserbing pagpapaisi sa publiko na an ministeryo kan linahidan na Hade ni Jehova, si Jesu-Cristo, magpopoon na. Juan 1:6-8, 15-28; Mateo 3:1-12; Lucas 3:1-18; Gibo 19:4.

▪ Anong klaseng tawo si Juan?

▪ Taano si Juan ta nagbautismo nin mga tawo?

▪ Taano ta nasabi ni Juan na an Kahadean naghaharani na?