An mga Selebrasyon nin Kompleanyo Nagresulta nin Sunod-sunod na Kagadanan
AN SELEBRASYON nin mga kompleanyo minamansay kan kadaklan na tawo ngonyan bilang inosente sanang kaugalean. Pero an Biblia dai naglaladawan nin positibo manongod sa tradisyon na ini. Sarong dahelan, an Kasuratan mayo nin indikasyon na an siisay man sa maimbod na mga lingkod nin Dios nagselebrar nin mga kompleanyo.
An duwa sanang kompleanyo na talagang sinasambit kan Biblia idtong sa mga poon na kaiwal nin Dios. An kada selebrasyon kabale an paggadan, tanganing an mga bisita mag-ogma huli sa kagadanan kan saro na nakapaanggot sa hade. Sa enot na situwasyon, si Faraon, an hade sa Egipto, ginadan an saiyang pangenot na panadero. (Genesis 40:2, 3, 20, 22) An poon sa Egipto ginibo iyan durante kan bangkete huli ta naanggot sia sa saiyang oripon. Sa ikaduwang situwasyon, si Herodes, an inmoral na poon sa Galilea, pinugotan si Juan na Bautisador bilang pabor sa sarong aking babae na an pagbayle sa parti nakapaogma sa saiya. Kanigoan kanakababaldeng mga eksena!—Mateo 14:6-11.
Alagad bako daw na an Biblia nakasentro an atension sa duwang pambihirang gayong kompleanyo? Dai nanggad. An suanoy na Judiong historyador na si Josefo naghahayag na an mga pangyayaring ini dai nasosolo. Nagsurat man sia nin iba pang pangyayari manongod sa kaugalean na paggadan kun mga kompleanyo para sa pag-aling-aling.
Halimbawa, an iba nangyari pakalaglaga sa Jerusalem kan 70 C.E., kan nagadan an 1,000,000 na Judio asin nakaligtas an 97,000 bilang bilanggo. Kan pasiring sa Roma, an Romanong heneral na si Tito dinara an saiyang mga bihag na Judio pasiring sa haraning duungan sa Cesarea.
Si Josefo nagsurat: “Mantang nagdadanay si Tito sa Cesarea, isinelebrar nia an kompleanyo kan saiyang tugang na si Domisiano na may labi-labing kagayonan, na ginadan an labing 2,500 na bilanggo sa karawat kaiba kan mga hayop asin nin kalayo. Pakalihis kaini sia nagbalyo sa Berytus [Beirut], Romanong kolonya sa Fenicia, kun saen isinelebrar nia an kompleanyo kan saiyang ama paagi sa paggadan nin kadakol pang bihag sa magayon na mga eksibisyon.”—The Jewish War, VII, 37, trinadusir ni Paul L. Maier sa Josephus: The Essential Writings.
Bakong makangangalas na an The Imperial Bible-Dictionary nagkomento: “An mga Hebreo kan huri minansay an selebrasyon kan mga aldaw nin pagkamundag bilang sarong kabtang nin idolatrosong pagsamba, pagmansay na biyong patutunayan kan saindang naheling sa lakop na mga selebrasyon na konektado sa mga aldaw na ini.”
An maimbod na enot na siglong mga Kristiano siertong dai nagustong umayon sa kaugalean na bako nanggad paborableng ilinadawan sa Biblia asin nakapangigirabong gayo na isinelebrar kan mga Romano. Ngonyan, an sinserong mga Kristiano nakarerealisar na an mga rekord sa Biblia dapit sa mga kompleanyo kaiba sa mga bagay na isinurat para sa pagtokdo sa sainda. (Roma 15:4) Linilikayan ninda an pagselebrar nin mga kompleanyo huli ta an siring na mga selebrasyon nagtatao nin dai maninigong pagpahalaga sa indibiduwal. Orog na makahulogan, an mga lingkod ni Jehova madonong na hinohorophorop an bako paborableng pagkaladawan nin mga kompleanyo sa Biblia.
[Ritrato sa pahina 25]
Arena sa Cesarea